وسواس النجاسة: وسواس انتقال البول م17

وسواس النجاسة: وسواس انتقال البول م16
سنية إزالة النجاسة

السلام عليكم، أتمنى من د. رفيف الإجابة على أسئلتي لأني أحتاج أحد يفهم كثير بالدين وأتمنى منكم ما تنزعجون من كثرة الأسئلة وتعذروني لأني والله أحس بضيق شديد أنا تعبانة نفسيًا راجعت دكاترة نفسيين وللأسف أنها كانت تهاوشني وكان الموضوع بيدي ونفس الشيء اللي حولي يكلموني بعصبية وإذا قلت لهم قالوا أن الأفكار غبية وكلها كذب أتمنى أنكم تصيرون معي وتتقبلونها بصدر رحب ولا راح أنساكم من دعواتي، أنا مصابة بمرض الوسواس من 4 سنوات أول مابدأ معي وسواس النجاسة كنت أنجس أماكن (نجاسة حقيقية) ويدي مبللة وأتمنى منكم تتفهمون وتجاوبوني على أنها حقيقية مو لأني أتوهم أو أتخيل لا هي فعلًا حقيقية لكن أنا نجستها لأني أحيانًا أكون مستعجلة وأحيانًا أقول برجع أغسلها وأنسى وأحيانًا للأسف أتهاون وأحفظ المكان عشان لو لمسته أغسل يدي بعده وأحيانًا أتكاسل وفيه أسباب كثيرة

بس بعدين استوعبت لأني شفت أهلي يلمسون هذه الأماكن بالضبط ويديهم مبللة وبرضو الأرض كنت آخذ مناديل نجسة (فيها بول وأحيانًا دم حيض) فأطلعهم للزبالة وكان ينقط على الأرض ولا كنت مسحته فكانوا بعدها يمسحون الأرضيات (مسح مو غسل) حتى مرة كان فيه منديل فيه مذي ورميته على أساس يصير بالزبالة لكن طاح على الأرض شلت المنديل ولصق من المذي بالأرض بس ما غسلته كل شوي أقول الحين اللي ماجو بعدي أهلي ومسحوه مسح مو غسل

الأرض تنجست والممسحة تنجست فكانوا يكملون ويمسحون باقي البيت بنفس الممسحة هذه اللي مسحت أماكن تنجست من المناديل المبللة النجسة لأن كان يسيل من المناديل على الأرض ونفس ما قلت المناديل فيها بول ودم الخ.. وهم ما يعرفون أن فيه نجاسة فأنا كنت أتحرز ولا أهتم لهم لأن راح عن بالي أنهم راح يمشون على الأرضيات برجولهم وهي مبللة بالماء ويدخلون الأماكن اللي أصلي فيها

وأشياء كثير فيها نجاسة حقيقية لكن ما كنت أطهرها فهذا اللي يخليني أخاف آخذ بسنية إزالة النجاسة لأن على أي أساس؟ في بالي أن الموسوس يأخذ بالحكم هذا لأنه كثير شك فهذا الحكم أريح له وأنا فعلًا فيه أماكن أشك فيها فآخذ بالسنية وعادي لكن أنا الحين أتكلم بالنجاسات الحقيقية

حتى أن فيه مرة من المرات كان فيه طفل وتسرب البول من البامبرز فاللي شايلته حست بالبول وقالت إن الرطوبة انتقلت ليدها وبعدها بنفس الدقيقة لمست فرن المطبخ ويدها فيها الرطوبة وبعدها لمست أغراض ثانية ولما كلمتها بالموضوع قالت أنها نست تغسل يدها لكن المشكلة الحين أن الفرن هذا يلمسونه ويديهم مبللة ثم يلمسون مكان ثاني وبكذا انتقلت النجاسة فإذا جيت آكل أكون حريصة ما يطيح شيء علي من الأكل لأني راح أتنجس وحتى بعد الأكل أغسل فمي بقوة عشان بقايا الأكل تروح عشان ما ألمس فمي بالغلط وتتنجس يدي لأنهم سووا الأكل في مكان متنجس

وكانت المناديل يجي فيها بول حقيقي أو براز وأحيانًا دم حيض وأحطهم بالزبالة وأقول لأهلي لحد يأخذ الزبالة فكانوا يتجاهلون كلامي لأنهم يقولون أني موسوسة وهو كان شيء حقيقي أشوفه بعيوني مو وهم فهم يلمسون المناديل هذه وهي رطبة ويطلعونها برة وبعدها يلمسون أماكن بالبيت وجوالاتهم وأحيانًا جوالي ولا يتطهرون ويلمسونها ويديهم رطبة من المناديل وحتى رطوبتها متأكدة ومتيقنة منها 100٪ لأني لامستها أنا بعد بس أنا غاسلة يدي وهم لا بتقولون ممكن غسلوا يديهم أقولكم لا لأني أراقبهم من يوم يلمسونها فأحيانا يستعجلون ويلمسون مقبض الباب أو جوال أو أي شيء وأحيانًا يلمسوني فأروح أغير ملابسي وأغسل يدي منهم تعبت تعبت وإذا قلت لهم غسلوا يديكم يقولون ما فيها شيء عشان نغسلها

ولو قلتم إن النجاسة انتشرت بالبيت وراح يكون معفو عنها فبقولكم أن مثلا البيت يكون فيه كراسي 4 منهم نجسين نجاسة حقيقة وواحد منهم طاهر فأنا دايم أحرص على أني أجلس بالكرسي الخامس لأني لو قلت معفو عنهم وجلست بأي كرسي راح أحس أن مالي عذر وأخاف من الله لأن الكرسي الخامس طاهر ليش ماجلست فيه أو مثلا تكون فرشة الغرفة تنجست من رجولهم وأحيانًا يدخلون بجزماتهم والجزمات نجسة فأحفظ الأماكن اللي يمشون عليها فإذا بدخل المكان مرة ثانية أكون حريصة أني أدخل من الجهة اللي ما لمسوها وللأسف أن فيه غرفة ما أدخلها لأنهم دخلوها من كل مكان وكانت رجولهم مبللة ونجسة فصرت ما أدخلها، فهل أجلس بأي مكان نجس حتى لو كان الطاهر فاضي؟ هل عادي أدخل الغرفة بأي جهة أبي ولا أدخل من جهة معينة لأنها الطاهرة؟ أو مالي عذر لأن فيه خيار ثاني؟

ولو جيت بهون على نفسي وبأخذ بسنية إزالة النجاسة يجيني سؤال على أي أساس آخذ بسنية إزالة النجاسة وأنا التي نشرت النجاسة وغير كذا مذهبي حنبلي يعني لو كنت مالكية كان قلت أن هذا القول عندهم ويجوز حتى لغير الموسوس لكن أنا حنبلية والنجاسة حقيقة 100٪

وأول ما قرأت عن السنية وطبقتها كنت أتعمد ألمس النجاسة وأقول عادي إزالتها سنة فأخذت السماعة اللي أنا متيقنة من نجاستها والحين استوعبت أني أول شيء: استخدمتها بشيء ما يرضي الله ثاني شيء استخدمتها متعمدة وأنا عارفة ومتيقنة من نجاساتها ثالثا أنا بهذه المسألة مو موسوسة لأنها يقين فلو قلت أن حتى الغير موسوس يأخذ بهذا القول يجي ببالي إن صح الغير موسوس يأخذها عند الضروره (باستثناء المالكي المذهب لأنه يجوز له العمل به حتى مو للضرورة) لكن أنا ما كان عندي ضرورة ولا شيء

أنا أتابع موقعكم وشفت أغلب الاستفسارات لك أنت دايم تعطون الحلول للنجاسات اللي يتخيلها الموسوس فأنا أتمنى أنكم تتحملوني وتجاوبون على أنها نجاسة (حقيقة) عشان أعرف أتعامل معها وأنا مرتاحة لأنكم لو بترفضون وتكلموني على أنها أوهام أو خيالات راح تزداد حالتي سوء لأن فيه أشياء كثير ما ذكرتها لكن كانت متنجسة نجاسة حقيقية، أدري أني موسوسة بس أنا أعرف أفرق بين الشك واليقين وكل اللي كتبته شيء متأكدة منه وفيه بعد أشياء ما ذكرتها بس نجاسة حقيقية عشان كذا أبيكم تجاوبوني على أنها حقيقية مو شك لأن فيه أشياء كثيرة شاكة فيها بس عادي متجاهلة لأن الأصل الطهارة فساعدوني وجاوبوا على أسئلتي (أنها حقيقة) أتمنى منكم عشان تنتهي معاناتي بإذن الله ولا عاد أسأل لأني والله تعبت كل شوي أسأل أحد ويهاوشني ويعصب علي أو أحيانًا يقولون لي أنت موسوسة يعني أوهام وأموت من ذا الكلام لأني زي ماذكرت أشياء حقيقية سويتها من قبل والحين ما أدري وش أسوي

وسؤالي الأخير هل يجوز لي أطبق سنية إزالة النجاسة إذا كانت النجاسة حقيقية وأنا متيقنة منها 100٪ ومذهبي حنبلي واخترت القاعدة هذه لأني تعبت من التطهير؟؟ وحتى لو استخدمتها بشيء غلط؟ مثلا يوم لمست السماعات وسمعت موسيقى (أعرف أنه ما يجوز لكن للأسف سويتها) ولبستها وهي متنجسة، وهل أقدر أتجاهل التطهير إذا تنجست حقيقة وأطبق عليه القاعدة حتى لو كنت قادرة على أني أطهر المكان أو البدن بس ما أبي أطهره لأني متكاسلة؟ وأنا كثرت أسئلة عن السماعات لكن إذا أنت جاوبتم عليها من قبل فأعتذر لأن الرد ما وصلني للآن

أتمنى ترحموني وتجاوبون علي ولا ترفضون وتقولون أني أتوهم بس أعطوني الجواب لأنها (حقيقة) لأني الحين ندمانة أني نشرتها بالطريقة ذي فمن البداية كان المفروض أطهر الأماكن وأفتك لأني خايفة خوف مو طبيعي جاوبوني بأقرب وقت تقدرون عليه وأعتذر منكم أشد الاعتذار على الإطالة لكن كتبت شيء عانيت منه الأربع سنين الماضية وبصراحة

أتمنى وأنا مستحية منكم أنكم تجاوبوني على كل شيء كتبته لأني أحيانًا إذا سألت أحد ونسي يجاوب على نقطة من سؤالي أوسوس أنه ما قرأ كلامي كله أو ما قرأ النقطة المهمة
فأشكركم جزيل الشكر على جهودكم وأكرر اعتذاري لكم جزاكم الله خير
19/10/2024