أخاف على خطيبتي من ماضيَّ الجنسي!

السلام عليكم ورحمة الله

أنا شاب عندي 27 سنة من 6 شهور فقط تقريبًا ربنا تاب عليّ وبطلت حاجات كثيرة، من ضمنها العلاقات العابرة مع البنات، بدأت أفكر في الزواج وخطبت بنت من عائلة صديقة ومتوافقين مع بعض وبنحترم بعض جدًا الحمد لله، لكن الماضي يطاردني.

بدأ الموضوع ببنت كنت أعرفها من أقل من سنة، كانت متعلقة بي بشكل مبالغ فيه وغير طبيعي، طلبت منها نبعد- وذا من قبل ما أخطب- عشان علاقتنا ببعض ماترضيش ربنا بكل ما تحمله الكلمة من معنى وهي وافقت واحترمت ده والموضوع انتهى،
 
 لكن بعد ما حطيت صور خطوبتي لقيت البنت دي مسحتني من فيسبوك وده شيء بسطني جدًا إنها أخذت الخطوة ذي من نفسها، لكن اليومين دول رجعت ألاقيها متصلة بي وسايبالي رسائل تحاول تفتح فيهم كلام إلخ..
 
مش مرتاح للأفعال بتاعتها، ومتوقع في أي وقت أنها تحاول توقع بيني وبين خطيبتي بمبدأ عليّ وعلى أعدائي، وأتوقع أنها محتفظة بالشات السيء اللي بيني وبينها،

خطيبتي مش غبية أبدًا بس ده ممكن يخلق مشاكل لا تعد ولا تحصى،
 أو على الأقل الموضوع هيكون مؤذي لها أعمل إيه من فضلكم
 7/1/2025