راجعة عشان أفضفض على مجانين م4
نصيحة للأخت المغربية دمعة
السلام عليكم ورحمة الله أحب أن أحيي الدكتور وائل والدكتورة هدى الصاوي والدكتور أحمد عبد الله على الردود المفيدة.
أحب أن أعطي نصيحة لوجه الله للأخت دمعة: أنا قرأت كل رسائلك وكل همومك ومشاكلك ده من وجهة نظرك إنت بس أنا حابة أقولك اشكري ربنا لأن المؤمن مصاب فكل ده اختبار من الله ولكن للأسف إنى لقيت في كلامك سخط على قضاء الله عز وجل.
أنا من وجهة نظري تأملي وبصي للي حوليك اقرئي الجرايد شوفي كام حادثة بتحصل الابن بيقتل أبويه ويسرقهم ويعذبهم ويكون ابن مدلل زيادة عن اللزوم فيوصل الأمر للقتل أو السرقة فلو كان لديكِ زي ده هتفرحي وتقولي أنا عندي ولاد وخلاص؟؟ فكري وهتلاقي إنه ده بيحصل للأسف ودي من علامات يوم القيامة. حاولي تقربي من ربنا وأرجوكِ لا تحاولي إنك تفكري تاني في حكاية الزنا إنتِ مش لوحدك في المجتمع مش عشان تبقي أم تعملي حاجة من الكبائر.
أنتِ من الواضح إنك مش مثقفة دينيًا فحاولي تتثقفي دينيًا عن طريق القراءة. حاولي مش تفكري في أي حاجة تضايقك حاولي تكوني متفائلة وحبي الناس والحياة مش تكوني كارهة اللي حواليكي من أهلك وأهل جوزك.
أنا عايزة أعرف إنتِ ازاى بتقولي إنك كنتِ بتحبي جوزك وبعد الجواز بعد ماعرفتي إنه مش بيخلف ومريض كرهتيه وبدأتي الخناق معاه؟؟ حاولي تفتكري الحب اللي كان بينكوا في الأول.
حاولي تفتكري اللي كان بينكوا وجددي حياتك. اعملي عمل مفيد اشتركي في أي جمعية خيرية أو مارسي نشاط في النادي قربي من جوزك حاولي تكوني الزوجة والأم والابنة وكل حاجة وهو لما يلاقيكي كدة هو كمان هيقرب منك وهتكوني بالنسبة له الابنة المدللة هيعتبرك طفلة صغيرة بالنسبة له حاولي وصدقيني التجربة لذيذة وربنا معاكي وينولك اللي إنتِ عايزاه قربي من ربنا وصلي وادعي.
من أختك في الله
إيمان
22/6/2005
رد المستشار
جزاكِ الله خيرًا أختنا "أيمان" على نصيحتك الغالية وبالفعل أنا معك أن الهدف ليس مجرد وجود الأبناء لأن وجودهم أحيانًا يكون نقمة.. ولكن الهدف بالفعل هو النجاح في تربية وإنشاء جيل سليم.. فإن لم يرزقنا الله الأبناء خاصتنا فهناك مجالات أخرى منها التدريس ورعاية الأيتام وما إلى ذلك وهذه الأبواب مفتوحة وتشعر المرأة بقيمتها كأم منتجة للمجتمع وإن لم يكن هؤلاء الأبناء من رحمها..
وأنا معكِ في ضرورة التعلم الديني ليس عن طريق القراءة فحسب فهناك أيضًا الصحبة الصالحة ومجالس العلم والاشتراك في دورات نافعة لتعليم القرآن الكريم أو علوم الشريعة.. وإذا لم تكن هذه الأشياء متوفرة في مدينتها فهي موجودة بوفرة على الإنترنت ولو شعرنا بأهمية الوقت لما تركناه يضيع هدرًا لأي سبب وتحت أي ضغط..
غير أني أختلف معك يا صديقتي في تفكيرها في حكاية الزنا فهي على حد علمي لم تذكر ذلك وإنما كانت تأتيها لحظان تقول ليتني لم أتزوج زوجي الحالي وتزوجت فلان مثلا.. وأسأل الله أن يعفو عنها ويحميها من الزلل.. فالغاية لا تبرر الوسيلة على أي حال وقد تتزوج بمن تريد ولا ترزق الولد أيضًا فكل شيء بعلم الله وإرادته..
ويتبع >>>>>: راجعة عشان أفضفض!! على مجانين مشاركة1