بسم الله الرحمن الرحيم
المشكلة أنني لا أريد المذاكرة وأريد اللعب عدم الرغبة ارتفاع مستوى التعليمي رغم درجات النجاح هائلة بس نقص على النهائي لا تتعدى 10 درجات أرجو إرسال إلي طريقة للمذاكرة والنجاح وحب وجدول لتنظيم مواد العام الدراسي لمرحلة الثالث الابتدائي
عندي مشكلة أخرى أنني كثيرة الكذب أقوم بسرقة الأشياء من البيت ومن محل الحلويات عند المدرسة وقمت بسرقة إحدى صديقاتي عندما أعطتني مبلغ من المال سرقت جزء ورديت الباقي قالت له وقعت الفلوس عندما عدت إلى البيت سرقت بعض الأشياء بدون علم أمي .
في حياتي الآن أخ جديد يشاركني في الاهتمام منذ ولادته قبله أمي أصبحت مشغولة عني أنه كانت متزوجة من أبى ليس له أي وجود في حياتي وتم الطلاق وبعد فترة تزوجت رجل آخر طيب معي وهو أبو أخي.
أرجو الرد علي في أسرع وقت بالنسبة للمذاكرة وتنظيم أوقاتها وجدول المذاكرة وصفاتي التي ظهرت بكثرة السرقة عندي والكذب وعدم الأمانة رغم وجودي في المعهد الأزهري التجريبي
ما هو الحل أرجو مساعدتي
1/3/2006
رد المستشار
"آية" يا حبيبتي
تعرفي إنك بنت حلوة قوي وعاقلة قوى وذكية جدا..... يا ليت عندي بنت زيك..... أنا بناتي كبروا خلاص..... وماما لها حق تحبك وتبقى فخورة بك وجوزها له حق يبقى طيب وحنون معك لأنك فعلا بنت حبوبة وأي حد يتعامل معك لازم ها يحبك، حقولك على حاجة مهمة يا "آية"..... حكاية إنك تسرقي حاجات من أصحابك أو من مامتك تكون طبيعية عند الأولاد الصغيرين لأنهم يكونون غير فاهمين أنها سرقة..... يشوفون حاجة تعجبهم يأخدونها أو يأخدون فلوس من أي حد ليشتروها..... بس أنت دلوقت فاهمة وعارفة إنها سرقة..... وإنها حرام..... وإن يمكن صاحبتك دي تفضل حزينة علشان فلوسها اللي ضاعت..... أو إن أهلها يضربوها بسبب كده..... وأنا ما فتكرش إنك حا تنبسطي لما تعرفي إنك تسببت لأي حد في الأذية لأن واضح إنك إنسانة رقيقة قوي
وأنا كنت عاوزة أقولك أنت عملت كده يمكن علشان وأنت صغيرة كنت متغاظة إن باباك الحقيقي ساب ماما وإنه مش مهتم بك..... وكنت عاوزة اللي حواليك يأخذوا بالهم إنك موجودة..... وإنك إنسانة مهمة ولازم يعملوا حسابك وهم يتصرفون..... ولكن في السن الصغير الواحد ما بيبقاش فاهم نفسه كويس.....فأنا بقولك إن أكثر حاجة تخلى كل اللي حوالك يأخذوا بالهم منك ويهتموا بك ...وتبقى أهم وألذ بنت في بورسعيد كلها شوية حاجات نتفق نعملها سوى.
أول حاجة يا "آية".... اتفقي معايا ما تكذبيش أبدا..... علشان الكذاب يبقى ضعيف ومش كويس وشكله يبقى وحش قوي لما الناس بتكتشف كدبه.... والصادق دايما مرتاح.... ولو مش مصدقاني جربى.... جربى وها تلاقي ربنا سبحانه وتعالى بعت لك كل حاجة حلوة وخلاك دايما محبوبة.... لأنه ها ينادى على الملائكة ويقول لهم أنا بحب آية فخلوا كل الناس تحبها..... تصوري يا "آية" لما ربنا ينادي اسمك!!!! بذمتك مش حاجة حلوة
تاني حاجة: ها تنظمي وقتك علشان المذاكرة...... لأنك لما تكوني من الأوائل كل الناس برضه ها تحبك وتحترمك وتدلعك...... والأوائل مش يعنى الأولى على الفصل...... لأ أنا عاوزة نمرتك تكون دايما 8-9 من 10 مش أقل من كده...... لما ترجعي البيت من المدرسة عاوزاك تحلي الواجب بتاعك...... وتقرى الحاجات اللي قالوها المدرسين......يعني أنت مثلا بترجعي من المدرسة الساعة كان؟؟؟ نقول 3 بعد الضهر .تغيري هدومك وتتوضي وتصلي...... وبعدين تتغدي...... نقول بقينا الساعة 4...... مثلا عاوزاك تذاكري من 4-5 تعملي الواجبات وبعدين تروحي تقعدي تلعبي شوية مع ماما أو مع أخوك البيبي (على فكرة يا آية حاجة حلوة قوي إن الواحد يبقى عنده إخوات...... تعرفي أنا ما عنديش أخت...... ودلوقتي وأنا كبيرة بقول يا ريت كان عندي أخت كنت لعبت معاها وبقينا أصحاب) يبقى تلعبي شوية وبعدين نرجع نذاكر تاني من الساعة 5ونصف لغاية 7 وبعد كده تكوني خلصت كل حاجة مهمة وتقدري تلعبي على كيفك- لو عملت كده من أول السنة حا تلاقي نفسك جايبة نمر كويسة وكل الناس فرحانة بك قوي
ثالث حاجة يا "آية": وآخر حاجة حقولها لك علشان تبقي أحسن وأشطر وأجمل بنت عاوزاكي تصلي الخمس فروض..... أنت أكيد أخذت في المدرسة إن الصلوات خمسة كل يوم..... عاوزاكي توعديني تصليهم كلهم..... عارفة يا "آية" اللي بيحب ربنا ويصلي علشانه ربنا يحبه..... وتصوري أنت بقى لما ربنا يحبك ممكن يعمل لك إيه ؟؟؟
لما ماما بتحبك وتبقى مبسوطة منك ممكن تشترى لك لعبة أو تديكي حاجة حلوة..... طيب لو ربنا بقى بيحبك ومبسوط منك؟؟؟أكيد ها يديك حاجات أحلى من كل حاجة.... علشان ده ربنا..... وبعدين هو لما يحبك ويبقى مبسوط منك ممكن تطلبي منه كل اللي أنت عاوزاه وهو ها يبعتهولك يا "آية".... لازم ها يبعتهولك.... ممكن مش على طول ممكن يبعته متأخر شوية..... بس لازم بيبعته..... خلاص
اتفقنا يا "آية".....أنا عاوزاك تكتبي لي كل شهر جواب وتحكي لي عملتي إيه؟؟؟؟ موافقة نبقى أصحاب ؟؟؟ زي ما قلت لك أنا بناتي بقوا كبار وأتمنى يكون عندي بنت صغيرة حلوة وذكية زيك كدهماما نعمت
ويضيف الدكتور وائل أبو هندى الابنة العزيزة أهلا وسهلا بك على مجانين وشكرا على ثقتك، ليست لدي إضافة بعد ما تفضلت به الدكتورة نعمت غير إحالتك إلى بعض الروابط عن السرقة في الأطفال فانقري العناوين التالية:تلغراف : ابن أختي يسرق وأختي تفتقد الحب
سرقةٌ وكذب وعدوانية : اضطراب التصرف
اضطراب السلوك (التصرف) Conduct Disorder
وأهلا وسهلا بك دائما فتابعينا بأخبارك.