أختي في الله وفي الوسواس القهري
بداية السلام عليكم
ثانيا لما قريت رسالتك أو مشكلتك كان نفسي أقولك كلمة هي هوني على نفسك أنت مضيقة للموضوع أكثر مما يستحق لسببين الأول لأنك مشكلتك منحصرة في الدواء والعلاج وفي أنك تأخذيه وتبطليه وحاجات لما قرأتها حسيتها مشكلة تافهة وكعادة الموسوسين لما ما بيلاقوش حاجة يوسوسوا فيها يخلقوا هما الوسواس لأن تناولك للدواء مش محتاج أكثر من إنك تحبيه وتحسي وأنت بتأخذيه إن وبإذن ربنا فقط لا غير إن شاء الله ها يجيب نتيجة ومن ناحية إن توقيفك للدواء ها يخليكي ترجعي توسوسي ده
مستحيل أو حتى تكتئبي بما إنه الاكتئاب مصاحب للوسواس أيضا بقولك مستحيل وده عن تجربة لأن فعلا والحمد لله الدواء أنا لاحظت أنه معي جاب نتيجة ممتازة بس علشان أنا وأنا بأخذه أقول باسم الله هو الشافي فبيجيب نتيجة عالية والحمد لله ونتيجته أنا حسيتها بعد 8 أو 9 شهور من العلاج بس حسيت ولمست إن الحمد لله السيروتونين اللي بيرجعه وأن الدواء الحمد لله الشافي المعافى ما بيرجعش يقل تاني فبالتالي مش لما توقفيه يرجع لك الوسواس والاكتئاب إلا إذا عملتي كده من غير استشارة الطبيب المعالج لك وأيضا لو وقفتي الدواء من غير استشارة الطبيب مش السيروتونين يرجع يقل لا لكن من أهم خطوات العلاج إنه يتوقف في ميعاده وده يقرره الطبيب، أما بالنسبة لأن أنت تبطليه عند الحمل إن شاء الله طبعا كده اطمئني
وعلى فكرة في العلاج السلوكي لازم تتبعيه مع طبيبك وساعتها ح تحسي إن الموضوع مش كله كيميائي زي ما أنت فاكراه طبعا دي كلها حاجات كان ها يقوها لك الدكتور وائل لولا أنه زي ما قرأت في الرد على رسالتك ما كنش فاضي وهو الحقيقة كان الله في عونه وأحب أقولك انك أحسنتي الاختيار ووفقك الله في اختيار الدكتور وائل مستشار طبعا مع احترامي لكل المستشارين وثقتي في أرائهم لأنهم أما زملاء للدكتور وائل أو تحت إشرافه.
والنصيحة الأهم من موسوسة لموسوسة هي نفذي كل ما يشير عليك به الدكتور وائل من غير وسوسة فاضية وده أقصر لطريق العلاج اسأليني أنا على فكرة أنا موسوسة من عيادة الدكتور وائل بمعنى أنه هو الطبيب المعالج لي وده يطمنك على أرائي اللي بقولها لك لأنها سابقة الرجوع له بجانب أني موسوسة الحمد لله شفاها الله وعافها وبالمناسبة حكاية خوفك من أنه الوسواس يتحول إلى جنون ده على حد علمي مش صح وخصوصا معك أنت لأن واضح من رسالتك إن معاناتك مع الوسواس والحمد لله مش عميقة رغم أنك ما ذكرتيش نوع الوسواس بس لأنك بتركزي على توابع الوسواس اللي هي الاكتئاب وده في حد ذاته وسواس بس مع الموسوسين الفاضيين اللي مش لاقيين حاجة يوسوسوا فيها فيهتموا بالتوابع على فكرة حكاية الاكتئاب دي مش مشكلة خالص لأن كلنا نواجه الاكتئاب على مدى يومنا حتى وكلنا اقصد بيها مش الموسوسين بس لا الناس الطبيعيين كمان ويا ريت ما تخافيش بالمرة من موضوع إن شاء الله زوج المستقبل يعرف لأن أنت مادامت نيتك هي الصراحة وإرضاء لله فإن شاء الله ربنا سيرزقك يرجل يتفهم ويقبل وما تفكريش كتير في إنك موسوسة والوسواس رجع لك تاني لأن تفكيرك ده مجرد إحساس بالمسئولية وخوف على المستقبل وده من أهم سمات الموسوسين وأنا بقول سمات مش مجرد صفات يا ريت لا تحوليها أنت إلى عيب
ودلوقتي أنا بقولك خليكي مع دكتور وائل ونفذي كل اللي يقولك عليه وتابعي على مجانين إن شاء الله ها تستفيدي كتير إيه رأيك أتمنى أكون قدرت أفيدك متهيألي ولا أروع زي ما بتقولوا في الخليج وأتمنى لك الشفاء التام بإذن الله القدير والتوفيق في دراسة الطب أعانك الله وأتمنى تردى علي تقولي لي قدرت أفيدك ولا لا وكم في المائة وأنا بريدي الإلكتروني موجود عندك لو تحبي تسأليني في شيء أو تكلميني .
شكرا لكم
والسلام ختام
28/2/2006
رد المستشار
إذن موسوسة من النوع الألذ أنت يا ابنتي، أشكرك على إطرائك الطيب وأسأل الله أن أكون بقدر ما أحسست فيّ، وأن يمنحني الله نعمة القدرة على مساعدة الآخرين.
طبعا سطورك الإليكترونية مليئة بالأخطاء في العربية – سامحك الله -، ولكن أفكارك بسم الله ما شاء الله منتظمة مرتبة، وأسأل الله أن يفتح عليك أكثر فأكثر، فأنا أجدك استوعبت كثيرا مما كنت أظن أنني لم أقله بوضوح بعد، أحمد الله الذي منحني القدرة على توصيل ما أحس تجاه حالة مريضي، وأنا شخصيا متفق معك تماما، خاصة فيما يتعلق بأنها ليست كلها سيروتونين، وبأهمية الاستعاذة بالله من الشيطان الرجيم مع استخدام عقاقير الم.ا.س أو الم.ا.س.ا، إضافة إلى العلاج السلوكي والمعرفي.
أخمن أنك ....... أو .............. أو ربما ..............، ولكنني متأكدٌ أن توحيدك لله عز وجل أهم ما يعنيك وتوسوسين بشأنه.... فلا تعجبين بوسوستك مثلما اتفقنا.... وإنما تستعيذين بالله من الشيطان الرجيم مثلما علمنا رب العزة ورسوله، وتداومين على ذكر الله، وتذكرين دائما أنك مخلوق خطاء وإن حرص فاجعلي خطأك من نفسك الطيبة مقبولا ولا تطلبي الكمال، أتمنى أن أكونَ صادق التخمين.
كما أتمنى أن تستفيد الموسوسة اللذيذة صاحبة المشكلة من سطور الموسوسة الألذ هنا على مجانين، وأعتذر عن إعطائها بريدك الإليكتروني درءًا للوسوسة، سعدت بمشاركتك وأهلا بك دائما، ولا تنسي مشاركتنا في موضوع اسم الموقع، بس من فضلك اعرضي على مراجع لغوي محترف!