أرجو قراءة رسالتي وإعطائي رأي
أنا بنت وحيدة ولي أخ أكبر مني واتخطبت من أقل من سنة لشاب تقدم لي عن طريق واحده صديقة والشاب ده أكبر مني بثلاث سنين وصدقني حضرتك أنا وأهلي أتغضينا عن الفرق في المؤهل بيني وبينه مع العلم أني طبيبة وهو ليس كذلك والمستوي الاجتماعي لأهلي أعلى منه وكان في أسباب كثير تدعوني للتفكير ولكن أنا وأهلي فكرنا بمنطق إذ جاءكم من ترضون دينه وخلقه فزوجوه وفعلا كان والدي متساهل جدا في الاتفاقات حتى لم يكلفه أي شيء صعب أو حتى يحدد أي مواعيد لأننا شوفنا منهم أنهم بيعاملونا كويس وهو كان باين عليه الطيبة الشديدة والاحترام بس كنا دائما خائفين من والدته لأنها كانت بتتجاهلنا في كل المناسبات وحتى اتصالاتها بينا كانت بسيطة.
كنت أنا كمان بلاحظ أنه قدامها بيبقى شخص ثاني بيسمع كل كلامها ويقتنع بيه حتى لو هو واثق إنه مينفعش وبالوقت حضرتك اكتشفت أنه مقدرش أي شيء من اللي والدي عمله معاه واعتبر إن ده يا إما لأنه طبعا عريس لقطه، يا إما إن أهلي كانوا عايزين يجوزوني بأي طريقه وبدا منه معاملة معايا غريبة في الأول عدم اهتمام ومفيش أي مشاعر حسسني بيها لدرجة أنه عمره ما قالي كلمة حلوه طول فترة الخطوبة وحتى الحنية اللي كنت بتمناها من إلي هرتبط بيه والله لقيت قسوة فوق الوصف لدرجة أنه مكنش بيسبني في أوقات الخناق إلا لما أعيط أو أحس أني معتش قادرة استحمل ساعتها كان بيوقف الخناق وحتى مش بيصالحني لحد ما وصلت لدرجة الإهانة الفظيعة من الزعيق في الشارع وقدام أهلي.
وأخيرا وصلت لدرجة الضرب أنه مره رماني بحاجه كانت في أيده لأنه كان مضايق بعدها حسيت أن فعلا معتش ينفع لحد ما حصل مشكله من أمه ومكنتش مشكلة عاديه دي كانت بتحاول تغير في كل الخطوات إلي أحنا داخلين عليها بما أننا هنبدأ نجهز وساعتها صارحت أهلي بكل اللي كان بيعمله فيا وطبعا أنا كنت بخبي عليهم لأني كنت متوقعه إن كالعادة هيعتبروني بكبر الموضوع أو أني مش فاهمه الموضوع صح واني لسه صغيره وتخيل حضرتك إني قضيت فترة فسخ الخطوبة في انهيار محدش كان حاسس بيه كنت فعلا منهارة لأني حسيت إني ضيعت وقت مع شخص ميستاهلش حتى يوم ما بلغناه برفضنا كان رد فعله عنيف وظهر طبيعته الحقيقية والي ريحني أني محبتوش بالعكس أنا كنت بنفر منه جدا وكنت أوقات بتمني انه ميزورنيش أو ميتصلش بيه لأني عارفه أنه يا إما هيفتعل خناقه يا إما هيلومني على حاجه أو أي حاجه.
دلوقتي أنا بقيت حاسه أني أتغيرت بقيت فاقده الثقة إن هيجيلي شخص زي ما بتمناه وزي ما بتمناه دي أنا مش قصدي والله أنه فارس أحلام مفيهوش عيوب لا أنا بس بتمني واحد يقدرني ويحبني بجد ويبقي حنين.... بس حنين وراجل بمعني الكلمة.
أنا فعلا بقيت فاقده الثقة ويأست أني هلاقي الشخص ده وبدأت أحس أن ده نصيبي وأني عمري ما هاخذ شخص كويس مع العلم أني عمري 25 سنه تقريبا، كمان أنا بقيت حساسه جدا لأني من شدة ما ضغطت على نفسي أني أتحمله وأحاول أتأقلم معاه جيت والله على نفسي كتير وده بشهادة كل اللي حكيتلهم بعد فسخ الخطبة لدرجة أني في واحده صاحبتي عيطت وقالتلي أنتي أتحملتي كل ده ليه
أنا بقيت حساسه من كل الناس.... كل الناس وبجد خائفة من المستقبل أوي أوي
6/4/2007
رد المستشار
الأخت الفاضلة؛
كان الله في عونك وفرّج عنك كربك!
لقد كان صعباً وقاسياً ما تعرضت له! ولكن هذا لا يعني نهاية العالم!!
تذكري قوله تعالى: ((وَعَسى أَنْ تَكْرَهُوا شَيْئاً وَهُوَ خَيْرٌ لَكُمْ وَعَسَى أَنْ تُحِبُّوا شَيْئاً وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لا تَعْلَمُونَ)) (سورة البقرة 216)، وتذكري أيضاً أن تجاربنا التي لا تنتهي بالنجاح تعلمنا أكثر من تلك التي تنتهي بالنجاح، والقاعدة ((نحن نتعلم من الخطأ أضعاف ما نتعلمه من الصح))، وما تعاني منه بعد تلك التجربة القاسية يشبه أعراض اضطرب التأقلم Adjustment Disorder .
ومن المفيد عرض مشكلتك على أخصائي نفسي ليقدم لك نوعا من العلاج المعرفي على عدة جلسات أسبوعية، وهي مفيدة لكي تتجاوزي تلك المشاعر المؤلمة.
أتمنى لك التوفيق والعافية.
ويتبع >>>>>: وحيدة وخائفة من المستقبل م