|
| 
|
أحب أهلي بجنون..!؟
السلام عليكم، عايزة أكتب تعليق بسرعة قبل ما أزهق وأقفل.....
قريت الاستشارة دي من كم يوم وفضلت أفكر فيها وفي بالي أرد بس مكنش عندي نفس ويلا اهو أجبرت نفسي أرد عشان أقول كلمة للبنت اللي بتحب أهلها بجنون.
بصي باختصار أقولك أنك بسبب الغربة اللي كنت عايشة فيها متعلمتيش ومبقاش عندك مدارك ولا خبرات باختصار أنت ولا حاجة وعشان متزعليش أنت (طفلة) عندك عشرين سنة زي ما بتقولي لكن عقلك ميجبش عشرة بالكتير وده طبعا عشان الي حصلك وأنتي صغيرة، مستسلميش للتصرفات الطفولية دي وفوقي -سوري يعني- والله أنا بكلمك زي مبكون بكلم نفسي حقيقي لازم تفوقي لنفسك لأنك في مجتمع عمره ما هيعاملك أنك طفلة زي ما أهلك بيعاملوكي وأنتي مش بتحبيهم اوي زي منتي متخيلة كده بس أنتي بتحبي الحماية بتاعتهم وخايفة من الدنيا عشان كده بتنهاري.
لو مش قادرة تساعدي نفسك لازم دكتور يساعدك لازم تخرجي من الشخصية المتغربة المتخلفة فكريا وتنضجي ويبقى تفكيرك أد سنك مش متأخر عنه عشر سنين على أحسن تقدير، أنا عشت نفس ظروفك دي واتبهدلت لغاية ما قلت واديني اهو لسه موصلتش لسني بس بحاول يا ريت تعالجي نفسك وتكوني شجاعة وتقولي لأهلك يواجهوا حياتهم ويرجعوا قبل ما يخسروكي للأبد ولا قبل متخسريهم أنتي ويموتوا وهم في بلد وأنتي في بلد.
عادي يعني متتخضيش بتحصل كتير حصلت معايا ومع تلاتة من زميلي في الجامعة الأب يموت في الغربة ترجع الأم اللي مش متعودة على مصر طبعا تعيش دور الكآبة والعصبية واحنا في الرجلين مش مهم عايشين بئه في مستوى مش هقولك يعني عادي زي كل قرايبنا الي متغربوش أصلا نفس المستوى الي كان جدي وجد جدي عايش فيه لا جديد بس تهاون بعض الناس بيخليهم يضيعوا حياتهم كلها في الغربة ويضيعوا ولادهم.
يلا معلش لو كنت زهقتك بكلامي بس دي نصيحة مجربة ويا رب تفيدك وتصحي لنفسك قبل فوات الأوان وربنا يقدرني أبعت المشاركة دي وأملأ البيانات الكتيرة الي فوق مش عارفة هيعملو بيها دراسة ولا إيه.
شكرا على الموقع وعلى كل اللي بيجاوبو المشاكل
والسلام عليكم
11/9/2007
رد المستشار
الأخت العصبية الزهقانة مرحبا بك معنا؛
أشكرك على مشاركتك وإن كانت عنيفة وتقطر غضبا إلا أنها بالغة المعاني فقد ذكّرتك صاحبة المشكلة بنفسك فجاء غضبك هذا معبرا عن غضبك تجاه نفسك قبل أن يكون تجاه صاحبة المشكلة والتي أترك لها مشاركتك لتقرأها فهي خبرة مجرب وكما يقولون اسأل مجرب ولا تسأل طبيب.
أتمنى من الله أن تجمع أختنا شتات نفسها وتخرج من المشكلة التي تمر بها، فكما يبدو أن ثمن غربة الأهل أكبر من أن يسدد ولكن أتمنى أن تخففي من حدة غضبك على أهلك فهم لم يريدوا بك أو بصاحبة المشكلة إلا الخير، فليس بالسهل على الأهل أن يتغربوا خارج الأوطان التي ضاقت عليهم فخرجوا منها يتلمسون البراح وبحبوحة العيش وليس كل من تغربوا خارج أوطانهم كانوا مثلك بل هناك من شدّة الغربة أعوادهم فالغربة وهجرة الوطن ليست كل السبب بل يدخل من ضمن الأسباب التربية الخاطئة ومن الممكن جدا أن تجدي فتاة مثلك أو كما تقولين طفلة ولم تخرج حتى خارج مدينتها حتى نعزو السبب للغربة بل الأسباب في التربية فمن يُرَبي على أن يكون طفلا سيبقى طوال عمره طفلا.
شكرا لك على مشاركتك وأهلا بك معنا دائما.
تعليقات الأعضاء