إلى مكتئب

عايش في قمقم يا حزين مدفون
شايل همومكْ وكمان همومِ الكون
ليلك يفـــوتْ بين السهر والخوفْ
نفسك تموت عــلشان عذابك يهونْ

بس انت لما تموتْ
يا صاحبي مين قَالكْ
إن العذاب ها يفوتْ
والسعد يـوصلْ لكْ

دا انت اما جيت الحياةْ
جيت يا بن آدم لحِكْمَهْ
كتبــها رب الحياةْ
مش برضُه راضي بحكمُه
مكتوب تكــمِّل طريق
اسمه الحــياة للآخِر
ومهما حالكْ يضيق
ما تقولشى غير حاضرْ
راضي بنصيبي وصابر

وان جيت في مرّة وقعتْ
من كتر ما انت شايلْ
عافِـرْ وقوم حَاول
تكِمّل اللي بدأت
وامشى في طريقك واصل
يا وصلت شيء يستاهل
يالناس يقولوا دا عاش
راجل ومات راجلْ

قوم واصحى فوق جرّب
جايز الأَمَــلْ يِصحى
جايز الحــياة تِحْلَى
جايز الهـدف يِقْرَبْ

وحتى لو ما وصلتش
دا عادي وما تهتمش
واديك كفاية حاولت
لكن القدر محتوم
لا زهقت واستسلمت
ولا عشت يوم مهزوم
ويتبع : إلى مكتئب1!

واقرأ أيضا:
  حكاية عاشق/ الغربة/ إلى مدمن!!!/ إلى مريض الهوس/ إلى مريض الفصام/ إلى مريض الوسواس/ إلى مريض الانشقاق