((الحلقة الأولى))
أنا الشاذلي عبد ربه (ومش عايز تريقة)
25 سنة
خريج تربية قسم تاريخ
من إحدى قرى محافظة القليوبية
منين مش مهم المهم إني بعد عذاب مرير عرفت اتوظف - ده غير عذاب الكلية اللي هحكيلكوا عليه بعدين- ومش أي وظيفة: مدرس أد الدنيا في وزارة التربية والتعليم، ومش كده وبس لا ده كمان في آخر الدنيا..
امبارح الصبح جالي الجواب:
"....... وعلى السيد التوجه إلى المدرسة المعين بها للأهمية"
يا سلام أنا مهم أوي كده؟ بس العنوان كان غريب شوية وتقريبًا مكتوب غلط مش عارف فين كده بعد إيه بعد حتة اسمها التبين بعد حلوان نفسها......
مش مهم الواحد يبدأ صغير المهم انه يكبر بعد كده
أنا وصلت أهو لحلوان وآخر محطة مترو "ضواحي حلوان" .... يا مسهل يا رب
سألت قالولي إنك تركب مواصله التبين دي وأد إيه السكة يا عم؟ قاللي نص ساعة لو الطريق فاضي والعربية فايقة وفاضية والطريق متصلح طبعًا لأن أنا عارف إن كل العوامل دي مش موجودة ضربت الوقت في عشره....... مش مهم أهو الواحد ينام شوية.........
بس للأسف العربيات هناك مش زى أي حتة لالالالالالالالالا دي عربيات نص نقل ومتغطية بقماش قلت أنا طبعا ليا برستيجى لازم اقعد قدام واكتشفت إن العربيات كلها محجوزة قدام لمسافة عشر عربيات........ما علينا هم مش اللي راكبين ورا بنى ادمين ولا إيه؟ هو أنا أحسن منهم؟ ماعلينا ....... ركبت ورا في الركن جوا خالص ورحت في تعسيلة صغيره
مطولش عليكوا........
المهم لقيت المدرسة جميله جد ونضيفه أوى والمدير وكل الناس لابسين بدل وكرافتات وقابلوني أحلى مقابلة و قالولي "اللي نازل المدرسة...........يلا يا أستاذ الطريق واقف "ده البيه السواق بيصحيني من النوم....... المهم أدور على المدرسة مش لاقى حاجه ومش لاقى ناس أصلا ؟ هو فيه إيه مش عارف......لقيت راجل محترم معدي كده......
-لو سمحت يا حاج
- .......................
- هو مدرسة سعد زغلول فين؟
- نعم يا بنى
- مدرسة سعد زغلول فين؟ (بصوت عالي طبعًا)
- الله يرحمه........... نعم يا بنى
- (ده يوم باين من أوله) المدرسة يا حج فين اللي اسمها سعد زغلول
- يا بنى اسمه سعد باشا زغلول يبقى السؤال- مدرسة سعد باشا زغلول فين
- ....................................
- وبعدين مانتا واقف فيها أهو
- فين؟
- هو ده الحوش والمبنى اللي هناك ده هو الفصول والإدارة
- شكرًا يا حاج
- شباب اليومين دول عاوز الحاجة السهلة
شفتوا الغلطة مني أصلا أنا كنت فاكرها كشك كهربا ......... يلا مدرسة صغيرة مش مشكلة بكره تكبر
لقيت يافطة مكتوب عليها تقريبا كده "مدير المدرسة " طبعا مش هقولوكوا اليافطة عاملة ازاي.........خبطت ودخلت وعلى وشي أحلى ابتسامة في الدنيا آه طبعًا الابتسامة أقصر طريق للقلوب والانطباعات الأولى تدوم وكده,,, شفت المدير قاعد ورا المكتب
- السلام عليكم
- ...........................
اهو ممكن يكون سمعه تقيل وكمان ماسك ورقه ومركز أوي
- السلام عليكم ( بصوت عالي شوية بس مش أوي لزوم الأدب)
- .......................... (وبصلي وشافني وكمان تف لبانه كدة ناحيتي كمان)
بس ماردش خالص ...........................
- الســ
- إنت جيت يا ابن الـ.........(الرقابة)
علطول استخدمت ذكائي أكيد مش أنا.. بصيت ورايا علطول........
- بقولك إنت ياد
- أنا سعادتك؟ (منا مش عاوز أعمل مشاكل من أولها)
- هو فيه غيرك يا ابن الـ...........(الرقابة) بس دي شتيمة غير الأولى خالص
- يبقى أنا سعادتك والله أنا اتشرفت جدا إن أنا أبقى مع...........
- هو انت الزفت الجديد؟
- تمام يا فندم
وبعدين قام تافف لبانه تانية من بقه على الأرض (الراجل ده بيجيب اللبان ده كله منين)
- كويس إن انت جيت المدرسة فعلا محتاجه حمار تاني للتاريخ والجغرافيا
- هههه لا سعادتك أنا تخصصي تاريخ
- مش هتفرق كتير ماهو ده منفد على ده ورياضيات كمان فكرتني والله
- اللي تشوفه سعادتك (أهي خبره وتزود في الدروس كمان)
- انت هتكون مدرس عربي وجغرافيا وتاريخ
- جغرافيا وتاريخ ورياضيات سعادتك قلت
- وقلت كمان مش هتفرق
- اللي تشوفه سعادتك ربنا يخلى معاليك لينا
ابتسم أوى وكان فرحان زيادة عن اللزوم وفرحه ده خلاه يدى لبانتين كمان على الأرض
- وعلشان انت واد بتفهم أوي كده وشكلك هتعمر معايا هسيبك ترتاح النهاردة وبكره اقولك على بقيت الوظايف
- هو لسه فاضل ايه حضر......
- الوظايف الإدارية يا حبيبي
- بس حضرتك أنا مش......
- عبد العال (بصوت جهوري خلاني ميت من الرعب وبلعت لساني)
- أمرك يا باشا (ده عبد العال طبعا حيطة- بس جه بسرعة غريبة أوى قبل ما الناظر يقول حرف اللام الأخير كأنه كان بيتصنت)
- اتأخرت ليه يا حمار
- معاليك كنت في البيت وجيت جري
- خد الاستاذ الجديد وريله السكن واديله الاوضة بتاعة أسامة الله يرحمه
- بس يا باشا.......
- بسرعة يا حمار (الراجل ده شخصيته طاغية أوى وعنده صوت جهوري وقوة إقناع جبارة)
- نظر إليّ عبد العال نظره حسيت بيها بالشفقة مش عارف ليه وكان إيه مصير أسامة ده يا ترى؟
وإحنا في الطريق للسويت بتاعي:
- إلا قولي يا عبد العال
- أمرك يا بيه
- إلا إيه حكاية أسامة ده؟
- ده آخر مدرس كان هنا قبل سعادتك هيـــــــه الله يرحمه
- وإيه اللي حصل؟ حادثه ولا مرض؟
- لالالالالالالالالالا والله سعادتك ناس تقول انتحر وناس تقول اتقتل وربك اللي يعلم
(وهنا حسيت إحساس غريب الراجل كلامه ميطمنش وشكله لوحده حكاية أصلا يعنى هو حد يبقى قاعد في بيتهم ويتقتل؟)
- ومين قالك إنه في بيتهم يا بيه؟ ده كان هنا في أوضته دي اتفضل المفتاح
هو الراجل ده بيقرأ افكاري؟ أنا ماقلتش حاجه
المهم دخلت السويت بتاعي ........
وأي سويت والله ده أنا لو القطة بتاعتي عاشت هنا كان جالي انهيار عصبي
عن إذنكم بأه أنا هريح شوية لأني تعبان بجد
ونكمل لما أقوم من النوم إن شاء الله .........
ويتبع:>>>>>>>>>>>>:: يوميات شاب(2)
واقرأ أيضاً:
عِندَ السقوطْ !/ رسائلُ إلى ريم / وجوهٌ شتي !! / حَــيْـضٌ !/ بِـلالُ العِشقِ !/ مَعْـشوقَةُ الأحزانِ !!/ أعظَـمُ منْ حبٍّ !/ الرأسُ القُطْنِـيَّهْ !/ عفوا يا سيدتي!/ ثـورَةُ العشرين !!
عِندَ السقوطْ !/ رسائلُ إلى ريم / وجوهٌ شتي !! / حَــيْـضٌ !/ بِـلالُ العِشقِ !/ مَعْـشوقَةُ الأحزانِ !!/ أعظَـمُ منْ حبٍّ !/ الرأسُ القُطْنِـيَّهْ !/ عفوا يا سيدتي!/ ثـورَةُ العشرين !!
تعليقات الأعضاء