حكاوي القهاوي (60)
(276)
ياريتك معايا يا حبيبي
مراتي قالت بصوت واضح، أنا نازلة ع الميدان ولو مت بالمطاطي ولاّ حتى بالحي ما يهم، سالي فاتت رضيعها، وروحي مش أغلى من روحها. اليوم انتهى على خير ومراتي حبيبتي رجعت لي من ثاني، أصل حبيبتي قطة وبسبع أرواح. حكت لي وقالت وأنا ورا عزة بلبع بأهتف وبأغني؛ ميّل علىّ أخويا وسألني "هالة.. أنت كويسه؟" أنا قلت طبعاً دا أنا بنت أبوك وأمك ومرات جوز أختك اللي بحكاويه للتحرير وداني، طب بس لما أشوفك يا محمود من ثاني، ضحك عليّا رامي وقال اصرخي زي جوزك ما قالك، خرجي خوفك من قلب جوفك وقولي للظلم لأ، قعدت أصرخ ضد كل ولاد الذين وأنت أولهم، وفجأة وأنا في وسط الجموع بأهتف بعلو الصوت؛ عرفت إني بجد بحبك وإن حكاويك حلوة وملياني. الميدان جميل؛ والناس هنا حلوة قوي، ياريتك معايا يا حبيبي؛ كنا قعدنا لحد الصبح؛ ولو تعبنا ننام ع الرصيف، زي كتير ما عاملين قدامي. بجد ياريتك معايا يا حبيبي.
(277)
عزة بلبع
الورد مهما يبقى، ريحته تفضل فيه.. صوتك يا بنت الإيه لسه حلاوته فيه. غني بعزم الصوت "حاحا" وسمعي الحلوين. يا مصر ما أحلى عيالك اللي في ميدانك عاشوا واستشهدوا فيه.
(278)
مصر بلدنا كلنا
قرر الإخوان المسلمون والسلفيون مغادرة الميدان ع المغرب، وقالوا للاعتصام لأ، ما اتفقناش على كده؛ القوى الوطنية قالت بس مظاهرة. الإخوان فكوا المنصة وقالوا يا جماعة امشوا خلاص، بس الميدان بقي على حاله. شباب الثورة قالوا يوم خمسة وعشرين يناير نزلنا بس لمظاهرة؛ هو كان فيه اتفاق يومها على ثورة؟!!
الشعب فرض إرادته والقوى الوطنية قالت آمين. والنهارده في السويس راس حربة الثورة قالوا اعتصام.. اعتصام، يبقى ببساطة اعتصام، واللي عايز يضرب عن الطعام زيهم يضرب. عموماً يا إخوان ويا كل المصريين البلد بلدنا كلنا، والميدان لكم دايماً لكم مفتوح.
(279)
كش مجلس
إما إنْ المجلس العسكري يقوم بتحرك جريء ويضحي بقطع مالهاش لازمة زي الحمار مثلاً، أو ح تبقى اللعبة الجاية من الشعب مات المجلس.
(280)
يا رب أستر من العند
ربنا كرمنا بعند مبارك وغبائه لأجل ما الثورة تستمر. يا رب اهدي المجلس العسكري وجنبه الغباء والعند؛ ويعمل اللي الشعب عايزه، لأجل ما العلاقة بالحب تستمر.
(281)
مصعب الشاعر مصاب الثورة
يا رب انتقم من اللي اختاره قبل ما تنتقم منه يا ربي. لو كان جه بعد الغائط ماكنش حد خد باله من الريحة، لكن بعد النبل والفروسية؟!! والله يبقى حرام.
(282)
ومازالت الجزيرة في المقدمة
نفسي أشوف فيك يا مصر قناة أخبار تعمل تغطية جادة لحظة بلحظة؛ أربعة وعشرين ساعة للي بيحصل عندنا، ربنا يصلح حالنا يا رب.. قولوا آمين.
9/7/2011
ويتبع >>>>>>>>: حكاوي القهاوي (62)
واقرأ أيضاً:
سيكولوجية الأمن في جمهورية الخوف (مصر ـ سابقاً)/ المستقبل الدستوري لصاحب السيادة/ ثورة 25 يناير وعرس الاستفتاء/ حكاوي القهاوي
تعليقات الأعضاء