حكاوي القهاوي (62)
(286)
فقرة إعلانية
عرض ما يتفوْتش، عايز تشعر بطاقة حب وإنك قادر تحضن كل الناس.. "يبقى لازم تنزل للتحرير"، ولو بتحلم إن عقلك يتحرر وتنفض تراب التلاتين سنة اللي فاتت.. "يبقى الحل جلسة طويلة في خيمة للثوار"، أما بقى لو عايز تنزع من قلبك كل الخوف.. "يبقى مفيش غير قنبلة دخان وتفتح صدرك للمطاطي"، ولو يا بطل قررت تكون رجل المستحيل.. "يبقى لازم تطلب خدمة الأمن الوطني أو س تمانية وعشرين"، ولو بتدور على عرض "الصلابة والإصرار" يبقى مفيش غير الإضراب عن الطعام وماتكلش. عزيزي المواطن هذا العرض ولفترة محدودة متوفر حالياً في جميع الميادين بمحافظات مصر، برجاء سرعة التوجه لأقرب ميدان. على فكرة لسه ما خلّصناش؛ فيه عرض عندنا مميز جداً جاي من فرعنا بالسويس، وهو عرض "حقك ياشهيد مايضعش" اللي فيه كفني بإيدي والشهادة في انتظاري. عزيزي المواطن الحق بسرعة قبل العرض ما يفوتك.. بسرعة ماتترددش.
(287)
طب بص جوه يافوزي
تزوج حبيب العادلي من سيدة ألمانية مسيحية أسمها أنوشكا، رايح تعمل حوار أديان بره؟ طب بص جوه يافوزي!! العادلي إتجوزها علشان يعمل غطاء لأمواله ويهربها وقت الزنقة، بست الست طلعت من حواري ألمانيا وحلقت له في التحقيق وقالت معرفوش.. ماشفتوش.. ماإتجوزتوش. يعني فسدنجي بنى له بيت طمعنجي سكن له فيه. من الآخر العادلي أخد قفا من السعد وشالوت من الثوار وخزوق من أنوشكا ومش فاضل غير الإعدام.
(288)
عيسى، فضل، سعد وأبوكونيه
عندما أشاهد أداء ابراهيم عيسى وبلال فضل في برنامج "ف الميدان" أشعر أنهما دائماً مايؤديان بروح مباريات الكئوس؛ فالتعادل مرفوض ولا بديل عن الفوز. أما أداء الكابتن محمود سعد فهو كثيراً ما يؤدي بروح المباريات الودية، إذ يكتفي باللعب ع الواقف؛ ويعتمد على بعض المهارات الفردية واللمحات الفنية التي تستخرج آهات الجمهور، كما يعيبه أيضاً الإرتباك أحيانا عندما يكون منفرداً بالمرمى ليفضل أن يمرر الكرة لأي شخص جنبه حتى لو كان من الجمهور، كما فعل ومرر الكرة لأحد المشجعين ليحرز هدفاً في مرمى المجلس العسكري الخالي. ولكن للأسف بعد إنضمام أبوكونيه والذي يصر على إرتداء حذاء حمدي قنديل، تحول الفريق إلى زملكاوي مية في المية، يجيد خسارة النقاط لصالح الفرق الأخرى، عموماً برضه دي فرصة للمنافس التقليدي ليقوم بتعديل جدوله الأسبوعي فيكون العلاج الطبي في يوم الأحد بدلاً من الأثنين، حتى يكتسح المشاهدة في هذا اليوم على الأقل. عموماً أتمنى أن يرتفع أداء باقي الفرق لتشتد المنافسة حتى يرتفع مستوى الأداء ليقترب إلى العالمية.
(289)
المحامي الفذ
لو مش واثق فيك يا أبوخليل؛ كنت أقول بتاخد عمولة. الفذ بتاعك بيفكرني بفاروق جعفر، أجدع واحد ياخد ضربة جزاء من غير ما حد يلمسه. مره الحكم هدده قبل المبارة وقاله عارف لو وقعت في التمنتاشر ح أديك إنذار، ولما الزمالك معرفش يغلب، هب روءا وقع، والحكم صفر بلنتي وفي نفس اللحظة من غيظه منه أدى له إنذار، شوف مقنع إزاي. هو بنفسه حكى الحكاية دي زمان في برنامج رياضي. الفذ بتاعك مقنع جداً لدرجة إنه ياخد بلنتي من غير ماحد يلمسه.
(290)
شريط لاصق لله
نفسي في شريطين من اللي بيلصقوا وما ينفكوش، أحط كل شريط على فم كلٍ من العصامين، أول فايدة نترحم من مقاطعتهم للحاضرين، والفايدة التانية علشان ربنا يرحمنا من ضحكة العريان.
(291)
كلاكيت تاني مرة
عصام شرف ألقى الآن كلمته الثانية، يارب أستر وميحصلش معاه زي ماحصل مع مبارك وتبقى المره الجايه هي آخر مره.
11/7/2011
ويتبع >>>>>>>>: حكاوي القهاوي (64)
واقرأ أيضاً:
كشف الطيش.. في مسألة الجيش/ المرشحون للرئاسة بين الكاريزما والضمير2/ أهم من الاستفتاء، وأخطر من ثورة مضادة/ هنا والآن.. الثورة تكون إزاي؟؟/ حكاوي القهاوي
تعليقات الأعضاء