حكاوي القهاوي (64)
(301)
بسرعة
(301)
بسرعة
واضح إن المجلس العسكري أخرج بيانه الأخير بسرعة وبدون تدقيق للصياغة من حيث اللغة العربية. أقول هذا بناء على ملاحظة بسيطة تتعلق بالبند السادس من البيان اللي بيقول "إعداد وثيقة مبادئ حاكمة وضوابط لاختيار الجمعية التأسيسية لإعداد دستور جديد للبلاد وإصدارها بعد إتفاق القوى والأحزاب السياسية عليها". فالجملة "إعداد وثيقة مبادئ حاكمة وضوابط لإعداد الجمعية التأسيسية"؛
يفهم منها لغوياً أن الكلام كله عائد على اللجنة التأسيسية، والصياغة الدقيقة التي لا تحتمل اللبس يجب أن تكون "إعداد وثيقة مبادئ حاكمة للدستور، وإعداد ضوابط لاختيار الجمعية التأسيسية لإعداد دستور جديد للبلاد وإصدارهما بعد إتفاق القوى والأحزاب السياسية عليهما". فبنود بيانات المجلس العسكري بمثابة القوانين المنظمة ويجب أن تكون دقيقة بحيث لا تحتمل أي لبس في الفهم ولا يجب أن يعتمد المجلس على إن الناس فاهمة هو يقصد إيه.
(302)
حفنة أشرار
إلغاء المحاكم العسكرية للمدنيين أنهت مخطط الأشرار اللي طلّعوا لسانهم للمجلس العسكري طوال الشهور اللي فاتت؛ وحلفوا ليبعتوا لهم الثوار بتهمة البلطجة، وقالوا أنتوا اللي ح تحاكموهم بنفسكم، وتعملوا فيهم أكتر من اللي إحنا بنعمله، وراح نخليهم يلعنوا أبو اليوم اللي مسكتوا فيه البلد. يارب المخطط يفشل نهائياً بعد حركة تطهير الداخلية منهم.
(303)
شفتوا الميدان حلو إزاي
حركة ضباط الشرطة وإحالة خمسمائة وخمسة لواء شرطة، إضافة إلى إثنين وثمانين عميد وإثنين ثمانين عقيد إلى المعاش، أدت إلى تحريك المياه الراكدة في ترقية صغار الضباط، فتمت ترقية دفعات بأكملها ودفعتين كمان مرة واحدة. شفتوا بقى يا ضباط؛ إنتوا كمان كسبتوا من الثورة ومن الشباب الجميل اللي قاعد في ميادين التحرير. تعالوا بقى نحط إيدنا في إيد بعض ونقعد سوا في الميدان؛ يارب تفهموا بقى.
(304)
نفسي أعرف مين اللي زقني للمنصة
سمعت كلام –الله أعلم بمدى صحته- إن الشيخ صفوت حجازي وقف ع المنصة في التحرير وقال للثوار يا جماعة كل واحد يِرَوْح ويسيب الميدان للبلطجية علشان الداخلية تقبض عليهم. طبعاً كان رد الثوار عليه "إطلع بره". مش عارف مين ابن الذين اللي استغل إن الراجل طيب وعلى نياته وصور له إن الثوار ح يقولوا حاضر ياعمو ويسيبوا الميدان. عموماً يامولانا الميدان بتاعنا كلنا ومحدش يقدر يطلعك منه، زي ما أنت برضه ماتقدرش تخلّيهم يروْحوا علشان يشربوا اللبن ويناموا بعد ما يغسلوا رجلهم وسنانهم.
(305)
مايمشي
إذا كان محمد الصاوي دخل وزارة الثقافة من باب وخرج من الباب التاني بعد كام يوم، وهو راجل محترم جداً جداً، طيب إيه اللي يمنع إن وزير الخارجية يخرج برضه بعد كام يوم خصوصاً إنه راجل... جداً جداً.
(306)
على بدرخان
خسارة المخرج المحترم على بدرخان في انتخابات نقابة المهن السينمائية تعتبر علامة خطر لانتخابات مجلس الشعب القادمة. فالرجل خسر بسبب نشر الشائعات التي توقع بين الناخبين في التليفزيون والسينما؛ لحشد الناخبين من التليفزيون لانتخاب شخص بعينه، أيضاً خسر بسبب إصرار هؤلاء على أن تكون اللجنة الانتخابية في وقت بعينه وفي مكان بعينه، مما جعل من الصعب على السينمائيين الوصول إليه في هذا التوقيت الذي يعتصم فيه الثوار في التحرير. ليس المهم من يفوز ولكن المهم كيف يفوز. يجب علينا الحذر من تلك الأساليب غير الممدوحة بالمرة، وربنا ينتقم من اللي كان السبب.
13/7/2011
ويتبع >>>>>>>>: حكاوي القهاوي (66)
تعليقات الأعضاء