2يناير 2013 مسار الثورة: ترويض النمرة

كانت نكتة بتنقال على جمال مبارك وأبوه، بيتكلموا عن طموح الابن لحكم البلد، وقفص فراخ.... بقى، وكده!! اللي فاكرها يبقى يكتبها في التعليقات.

خطوة1:
لما تقوم ثورة صحيت فيها الفراخ، وكسرت القفص، إوعى تعترض طريقها، إنما افتحلها سكة/تخريمة ترجع بيها ع القفص باختيارها

خطوة2:
السكة دي اسمها السياسة، والأحزاب، والانتخابات، وكل المنظومة الحلوة دي، والقفص اسمه دولة المؤسسات، ويا ريت... تضغط على "مؤسسات" دي.. عشان تبان.
احنا بتوع مؤسسات، ومؤسساتنا هتظبط مؤسساتهم!!!

خطوة3:
أقنع الفراخ إن المهم هو.. لون القفص، أو مين اللي معاه القفل!!
أقنعهم إن ده هو الطريق الصح لاستكمال الثورة، وخلي صراعاتهم محتدمة حول شروط التقفيص، وقوانينه: مين اللي يكتبها، ومين اللي ينفذها!!!
لا تطرح أصل الحدوتة للنقاش، هناك موضوعات ينبغي أن تظل "خارج النقاش"!!!

خطوة4:
الزن ع الودان أقوى من السحر.. لازم الفراخ تفضل مقتنعة إنها مجرد فراخ لا قدرة، ولا قوة، وينسوا بالتدريج إنهم بشر أحرار مرعبين للعالم.. من أول امبارح!!!
عندك قنوات فضائية، وجرائد، ومجلات، وشعب نصفه لا يقرأ، ولا يكتب، ونصفه الآخر يتعتع، إلا من رحم الله.. وليس للجاهل وعي، ولا إرادة.. وعشان كده لازم يفضلوا جهلة، وهم معتقدون أنهم "فلة".. وفاهمين كل حاجة!!!

خطوة5:
خش ع الدولة.. مش مهم مين اللي انتخبه الشعب.. أي حد هنتعامل معاه بنفس الطريقة:
التهديد بنقاط الضعف الحساسة (أقباط-سيناء-الاقتصاد)، وسهل جدا النفخ في السخط الشعبي المتراكم، وإزاحته تجاه من يحكم، مهما كان!!
لو في الحكم إخوان.. سهل تستعدي خصومهم، ولو في الحكم خصومهم، سهل تستعدي الإخوان، والسلفيين، وكل خصوم الخصوم!!!
المهم.. الفراخ تفضل بعيدة عن جحور الثعابين في الأجهزة، والمؤسسات، والبنوك، والشركات.. وإحنا بتوع مؤسسات.. بنتعامل مع مؤسسات، والمؤسسات بقى.. مهمتها تضبط الشعب!!

خطوة6:
في غمرة النكشة جوة العشة.. هنشغل نغمة الاقتصاد المنهار، وطبعا.. محدش له نفس يشتغل في الظروف الهباب دي!!!
والقروض جاهزة، والتهديدات كمان!!! تقترضوا، ولا لأ؟؟ والشارع جاهز، وبيغلي، وعاوز حقه، والفلوس مع الثعابين) يعني يتحركوا كده، أو كده.. يبقى مات الملك!!
واحنا طبعا جاهزين للي بعده!!!!
كفاية كده النهاردة.. كل ثورة.. وأنتم بخير.. مع تحيات السيرك الدولي
2/1/2013

واقرأ أيضاً:
نحو الأمل: تأملات مسافر/ إنه الفن يا أحمق/ خطاب إلى العقل/ أزمة حشيش/ مربط الفرس/ فيلليني.... مشاركة/ التشويش/ مسار الثورة: ثورة ضد الثورة!!!