مسار الثورة: اديني عقلك

 صحفية بتسألني عن تفسيري للميليشيات المسلحة اللي عمالة تطلع!!!
 قلت لها: ده تكرار إحباطي لسيناريو ممل.. مع بعض الإضافات المرعبة، والمضحكة.. في آن!!!
 الشباب مش مصدقين إن مفيش في مصر دولة، وإنهم سقطوها خلاص.. من زمان!!
 الشباب لابسين بلياتشو إرهاب.. في مواجهة العسكر، والعواجيز اللي لابسين بلياتشو, دولة!!!
 
 لأنك لو تصدق إنك قتلت (الأب).. بالمصطلح الفرويدي.. يبقى عليك مسئولية النضج، وتحمل تبعات قتله!!! ويبقى دورك إنك تشيل الليلة، من بعده، وإنت عاوز تصدق بلياتشو السياسة عشان تفضل عيل.. غير مسئول.. تحدف طوب، وتخطف مدرعة من عسكري سيس، وتعمل عليه دكر!!! وتشتم في مرسي، والإخوان.. اللي هم ميتخيروش عن أجهزة الدولة.. من حيث تواضع قدراتهم، بالنسبة لتحديات المرحلة.. وإن ادعوا غير ذلك!!!

مش إحنا كلنا، وعلى عينك يا تاجر.. شفنا يوم 28 يناير 2011.. إنو مفيش في مصر حاجة اسمها دولة؟؟؟؟؟؟؟؟؟

مش اكتشفنا يومها إن البعبع (العسكر) اللي كانوا بيخوفوا بيه الشعب.. طلع خيخية، وبلا مهارة، ولا قدرات.. وإن الجيش ساعة المواجهة الحق تردد في مواجهة الشعب، لأنه لا يريد، ولا يستطيع، وسيخسر إن دخل حربا بين الأخ وأخيه، وابن عمه؟؟؟؟
 وبعدين؟؟

مش شفنا كلنا خلال سنتين.. إنو مفيش حاجة اسمها حكومة ينفع تلم خراب السنين.. اللي فاتت كله؟؟
 
لا عصام شرف نفع، ولا الجنزوري، ولا قنديل، ولا سوبر مان.. ببساطة عشان الأجهزة الرسمية عبارة عن خليط من العجز، والأوهام، والفساد، وناس غير مؤهلة لعمل شيء.. على الإطلاق.. غالبا.. غير التزويغ!!

إحنا في مأزق حقيقي الآن.. ليس بسبب هواجس انهيار وهم مش موجود يسمى الدولة، ولكن بسبب حقيقة الاقتتال عليها!!!
 
بتسألني الصحفية: ممكن يحصل في مصر حرب أهلية؟؟
قلت لها: لو قرر المصريون أن يقتتلوا -على مين فيهم يمسك الدولة- لن يمنعهم أحد!!!
 
نحن في مأزق لأن بابا الفرويدي مات وشبع موت.. من يوم 28 يناير 2011 ، واحنا عاوزين نفضل عيال.. نرضع بالبزازة.. ونشتم ونحدف طوب على كل من يلبس عباءة البابا الهالك!!!
أقترح.. مليونية الجمعة الجاية.. ونسميها: جمعة.. الضرب في الميت!!!!!
هتشلوني
 30/1/2013
                                           ويتبع >>>>>:مسار الثورة : الفريضة الغائبة
 واقرأ أيضاً:
 ​مسار الثورة : سكة السلامة!!!/ 22 يناير مسار الثورة : عامان من الحلم، والدهشة/ 30 يناير مسار الثورة: الشعب أقوى من السلطة