باردة كأخواتها: زرعنا الثلج، ونحصد الجليد

زوجة منزوعة الدسم

توفيراً للوقت والدخول في مقدمات ودباجات وووو، لأني فقدت القدرة على الكلام والحوار في هذا الموضوع، أنا لأول مرة أكتب لموقع متخصص، لأني عارف أني مفيش فايدة لأن اللي فيه طبع ما بيتغيرش، ولكني سأحاول يمكن ألاقي حل مختلف عن الكلمات التي تقول الحوار، والتفاهم،

سأكتب باللغة العامية، حتى أستطيع التعبير عن ما أشعر به في عجالة، زوجتي منزوعة العواطف وحتى أكون منصفا شوية، هي يمكن عندها عواطف ولكنها بااااااااااااااااااردة فضلاً عن أنها لا تستطيع، أو بالعربي، تفتقد، أو ما بتعرفش، تعبر عن أي حاجة، عايشة مع رجل، بنشتغل وناكل ونشرب ونربي العيال وبس، والكلام ده من زمان، ياما اتخانقنا مع بعض بسبب الموضوع ده، ياما حصلت مشدات وحوارات وووو، خنتها قبل كدة بسبب الموضوع ده، ولما عرفت فهمتها أني عرفت بنتين عندهم إسهاب في التعبير عن المشاعر، سواء جنسية عاطفية أو أو أو أي حاجة، ناس بتعرف تتكلم، ناس بتحب تتكلم، ناس بتجد متعة في الحوار، هي مفيش أبيض،

اتحاورنا في الموضوع ده قلت لها أنا محتاج كده أنا عايز كده، قلت لها أنا بتاع كلام، الكلام عندي أهم حاجة، حتى مشاعرها الجنسية استحالة تعبر عنها، أنا اللي لازم أقعد أسأل أسأل أسأل أسأل لحد ما قرفت من السؤال والإجابة، ولو كان فيه إجابة في يوم ما، بتكون عبارة عن إجابة علمية، حتى لم باكون مريض عمرها ما جت تحضني وتقرب مني وتقول لي سلامتك، بتعمل زي الممرضات من بعيد كدة وهي بتمر في الأوضة، ها عامل إيه انهاردة، كويس، أو تجيب الدواء وشكراً،

عمرها ما زعلت وتيجي تصالحني، حاولت مرتين، وكانت فترة المصالحة 20 ثانية، جامدة، باردة، جاااااااااااااااااااااااااافة، تفتقر كيفية التعبير عن المشاعر انا حتى مش عارف ليه، مفيش، ما بتعرفش، بتتكسف، مش عارف، طيب طول السنين ده ما اتعلمتش حاجة، احنا متجوزين 18 سنة دلوقتي، عندها 3 أطفال، الكبيرة 14 الصغيرة 5

ردود أفعالها في الفرح والسعادة مكتومة، حتى لو عملت لها مفاجأة كبيرة التعبير عن الفرح أو السعادة مخنوق، مجرد ثواني، لدرجة أني أصبحت أقرف أعمل لها أي حاجة، بطلت أعمل عيد ميلاد أو حفلات، أو أو، كنا بنشتري شقة، وحبيت أعمل لها مفاجأة فكتبت العقد باسمي واسمها، قال يعني هي ليها نص الشقة، فاكرها حتفرح، وتنبسط، هي ممكن تكون مبسوطة بس جواها في البير تحت، بس مين يعرف الله وأعلم،

ولا أي تعبير ولا أي ردة فعل مفيش، تمر السنين، وكتبت لها شقة تانية باسمها في التجمع الخامس، كانت باسمي غيرت العقد والعداد باسمها: لا شكرا ولا حضن ولا بوسة ولا أي تعبير ولا أي تعليق...... هوس هوس، ترمي الأبرة تسمع صوتها، هي بتشتغل وفلوسنا مع بعض، ومعندناش فلوسي وفلوسك، ده بالمختصر لكن الشكوي محتاجة ألفين سطر وسطر، كرهتني في العيشة وفي نفسي

أنا من النوع اللي كنت لما نتخانق أنا اللي أجري عليها، أنا اللي أصالح، أنا اللي أطلب أي حاجة جنس مشاعر حب عواطف، قلت لها حبيني شوية زي ما أنا باحبك، بالعافية تقول لي في لحظة كسوف أو إحراج أو أو أو، وأنا كمان باحبك. وشكراً .

نعم إنها منزوعة الدسم بالمرة
أشكركم جداً
27/6/2016