عواقب التحرش : الخوف من الزواج !

خوف ورهاب واضطراب في الهوية الجنسية

السلام عليكم ورحمة الله وبركاته
أنا ترددت كثيراً جداً قبل ما أكتب الكلام ده بس أنا فعلاً تعبت نفسياً جداً وحياتي بتروح مني .. أنا بنت من عائلة محترمة أب وأم و3 أولاد أنا الصغرى على مستوى عالي من الجمال والحمد لله علاقتي بالله جيدة محافظة على الصلاة دائماً ولله الحمد ... مشكلتي أنه من صغري تعرضت لمحاولات اعتداء وتحرش من أكثر من شخص ناس خارج نطاق العائلة "أصدقاء للعائلة" الموضوع كان عبارة عن لمس غير لائق وكذا محاولة بوس واحتضان والحمد لله مش أكثر من كده بس الموضوع دا تعب لي نفسيتي أنا مصارحتش أي حد من عائلتي بالذي حصل .. في الغالب الأشخاص دول مشفتهمش كثير بعد كده ..

نحن كنا عايشين طول حياتنا في السعودية ولدت وربيت فيها "في فترة المراهقة كان عندي على ما أظن أنه اضطراب في الهوية الجنسية" كان عندي إعجاب ببنت وتصاحبنا وكان في بيننا مشاعر أنا كنت عارفة أن دا غلط بس كنت سايبة نفسي للموضوع محصلش بنا أي اتصال جسدي مجرد مشاعر

وبعدين خلصت ثانوية واضطررت أرجع مصر على شان أكمل دراستي "كانت حالتي النفسية سيئة جداً ومكنتش عارفة أتعايش مع الناس ولا الحياة الجديدة دخلت تعليم مفتوح على شان ما اضطرش أروح الجامعة ولا أتعامل مع الناس .. وبرضو كنت دائماً بحس بانجذاب ناحية البنات أكثر من الأولاد أو بحس بالأمان للفكرة دي أكثر وبدأت أتقرب من قريباتي وتصاحبنا جداً وخصوصاً بنت خالي أنا للأسف مشاعري ماكنتش صداقة كانت أكثر من كده بكثير كنا على طول مع بعض غصب عني مكنتش بفكر ولا قادرة أسيطر على المشاعر دي" هي كانت تعاملني على أننا أصحاب وأخوات وبس "المشكلة كانت عندي أنا بس" ...

بعد فترة تقدم لي شخص وكان ممتاز وكويس جداً وأنا انبسط أن حد شافني وأعجب بي ووافقت عليه بس بعد الخطوبة على طول حسيت أني غلط أني وافقت عليه وحاولت أفسخ كثيير بس أمي وأهلي كانوا يضغطوا عليَّ أني مسبوش وأنه كويس وممتاز ويحبني جداً هو كان عارف أني مش عارفة أحبه خالص بس كان يقول لي أنه سيصبر عليَّ وأنه يعمل كده وهو راضي بس أنا دا كان يخليني أحس بالذنب أكثرررر وأتعب أكثر

وفي المقابل مشاعري تجاه بنت خالي زادت أكثر وبقيت أتهرب من خطيبي أكثر والموضوع زاد لحد ما جاء يوم وصارحتها قولت لها أني عندي مشكلة وأني مشاعري مش بس أننا أصحاب هي احتوتني واحتوت الموقف وقالت لي متخافيش يمكن دا من أثر تربيتك طول عمرك في السعودية وأنتي لازم تسيطري على نفسك ومتفكريش كده وأنا قولت لها تمام طبعاً الموضوع مكنش سهل بس أنا فضلت أحاول أعمل الكلام دا وفي نفس الوقت مقدرتش أظلم خطيبي أكثر من كده وفعلاً فسخت الخطوبة بالعافية ضد رغبة أهلي لدرجة أنهم خاصموني ووالدتي تعبت جداً .. بعد فترة أنا حصلت لي مشكلة مع بنت خالي وتخاصمنا جامد ومبقناش قريبين خالص والحمد لله دلوقتي نحن أصدقاء عاديين ومبقتش بحس لها أي مشاعر مش طبيعية ..

الموضوع قل جداً وبقيت أقدر أسيطر على مشاعري تجاه البنات بقي الموضوع يعتبر عادي دلوقتي مبنكرش أني أنجذب للبنات برضه بس في نفس الوقت بقدر أسيطر على نفسي وتفكيري وكمان تأكدت أني أنجذب للأولاد كمان مش أي حد بحس أنه لازم يكون شكلاً وسيم أو على الأقل وسيم في عيني أنا كنت خائفة أن الانجذاب يكون ناحية البنات بس لكن في رجال كثير تجذبني كمان الحمد لله " المشكلة أني عندي خوف من أي حد تقدم لي وأرفض كثير جداً لما أعرف أن في عريس جسمي بيتلبش وبخاف خوف مش طبيعي مش قادرة أسيطر على نفسي ولا قادرة أوافق على أي حد وطبعاً دا أتعب لي نفسيتي ويتعب أهلي معي خصوصاً أن أنا شكلاً على مستوى عالي من الجمال والنسب الطيب والمستوى الاجتماعي كويس والدي دكتور وأخواتي 3 أولاد كلهم كويسين في أي حد يتمنى يناسبنا "

للأسف الشديد أنا أمارس العادة السرية أحاول أبطلها وأستغفر ربنا كثيير وأدعي أنه يتوب عليَّ منها بس بقطعها بالشهور وفجأة أضعف وأرجع لها وأبعد ثانية فترة وغصب عني أرجع ثانية وأستغفر وأبعد فترة طويلة والشيطان يدخل لي وأرجع غصب عني وهكذا .......

بحس كثير أنا الناس الكويسة اللي تتقدم لي ميستاهلوش واحدة زي هما فاكرين أني بنت ناس ومؤدبة وبريئة وأنا من جوايا حاسة أني مش كده وحاسة أني مستاهلش حد كويس على شان أنا مش كويسة ومش قادرة أستحمل تأنيب الضمير ومش قادرة أسيب لحد فرصة أنه يدخل حياتي والموضوع بقي مؤذي لعائلتي ولأمي على شان هي كبيرة في السن هي وأبويا ودائماً تقول لي أنها نفسها تطمئن عليَّ وأنها خائفة تموت قبل ما تشوفني في بيتي ودا يموتني نفسياً وأنا مش قادرة أعمل حاجة أمي أخذتني لدكتورة نفسية في القاهرة بس أنا مقدرتش أحكي لها على كل الحاجات دي كل اللي قلته لها أني تعرضت للاعتداءات وأنا طفلة بس مقلتش على العادة ولا الاضطراب اتكسفت منها مقدرتش أحكي خصوصاً أني خفت أن أمي تعرف أي حاجة عني ..

أنا مش عارفة أعمل أيه مش قادرة أتخلص من الخوف الذي عندي تجاه خطوت الزواج أو حتى الخطوبة ياريت حد يساعدني ..
آسفة على الإطالة وشكراً ...
28/3/2017