|
| 
|
مشكلة زوجية
أنا تزوجت من 5 سنين ومعي ولد عنده 4 سنين وبنت 3 شهور، زوجي مهندس وأنا مدرس مساعد في الكلية... من أول زواجنا وزوجي بيضربني ويحاول دائما يقلل مني ويتريق علي، على طول شايفني مش فاهمة حاجة وغبية وازاي أنا دكتورة في الكلية... وأنا والله عمري ما تكبرت وحسسته أني أصلا بشتغل في الكلية... دايما آخذ الكلام علي محمل الهزار وخلاص، مرتبي كاملا بحطه في البيت .
أول الزواج جبنا عربية وبعت شبكتي برضا تام من غير علم أهلي، المهم أنا مشكلتي معه أنه بيضربني جامد جدا وبشتم بأ قذر الألفاظ .. لدرجة أنه كسر ذراعي في إحدى المرات، وأنا قعدت 5 سنين مستحملة وما قلت لأهلي أي حاجة نهائي، كنت ساعات أشتكي لوالدته لأن والده متوفي وكانت تتكلم معه وتقوله ماينفعش تعمل كده وكان حاله يتضبط شوية ويرجع تاني لدرجة أنه وصل به الأمر أنه يمد يده علي قدام أهله ووالدته، ودائما كان يضرب ابنه جامد جدا وبينتقد فيه دايما
المهم أنا من حوالي 5 شهور كنت حامل وهو يضربني جامد لدرجة أنه كنت هسقط .. وشتم على أهلي بأقذر الألفاظ ..علشان أنا بقوله أنا المرة دي مش ها أسكت وأدخل أهلي
المهم بعد ما ضربني سابني واقعة في الشقة وراح بات عند والدته أسبوع ..وما اتصل بي ولا مرة وعمل بلوك على كل وسائل الاتصال زي عادته دائما
المهم أنا المرة دي قررت أني أروح لوالدتي بس ما تكلمت بأي حاجة ليها خالص.. أنا تكلمت مع أخويا بس .. وطبعا ما كان مصدق أن أنا بضرب وساكتة كل الفترة دي وتضايق جدا، واتصل بزوجي وقاله عايز أقابلك.... وفعلا تقابلا في كافيه برا البيت ولام زوجي وقاله أن أنا ما صدقت أن يصدر منك الكلام ده.... وهو وعد أخويا أنه ما يضربني ثاني
ورجعنا البيت وفضل زعلان وأن إزاي أنا أدخل أخويا .. وهو حاسس أني ظلمته وأن هو ما صدر منه أي حاجة .. ومن اليوم ده وهو مجاش عند والدتي نهائي... قطع علاقته بكل أهلي على الرغم أنهم كلهم بي عاملوه كويس لأنهم ما يعرفوا أي حاجة...
خرج من الجروب بتاع عائلتي، قالي مش ها نسافر ثاني معهم أبدا في أي مكان، بقي يتكلم على أمي بشكل وحش جدا جدا وبيشتم عليها ويقولي مش عايزها تتصل بك ثاني، ويزعق جامد لما تتصل بي
ومش عايزني أروح عند اهلي غير مرة في الشهر .. وأنا قلت له أنت ليه عايز تقطعني منهم ؟ إخواتي بيتجمعوا كل أسبوعين عند والدتي وهو رافض أني أروح، حتي والدتي جاءت تزورني تعامل معاها بقلة ذوق جدا .. ومرضاش يطلع من الغرفة يسلم عليها
المهم من أربع أيام حصل وفاة لأحد أقاربي وأنا نزلت معه بسرعة من البيت علشان نروح العزاء والصلاة .. ونزلت بسرعة جدا من غير ما آخذ أي هدوم معايا .. وقلت أننا هنحضر الصلاة ونرجع البيت
واليوم ده بتنا عند والدته وما كان معي أي هدوم لي أو للأولاد وهو عارف كده بس أنا قلت خلاص مفيش مشكلة ده هو يوم وهنروح الصبح... لما صحينا قالي أنا هروح العزا وتعالي روحي لوالدتك ولما أخلص هعدي عليك.. قعدت أتصل بيه كتير بعد العزاء... راح باعث لي رسالة قال لي مش أنا بقطعك من أهلك زي ما قلت لي ؟ خليك بقي قاعدة عندهم، وسابني بقالي 4 أيام وعملي بلوك علي كل وسائل الاتصال بيه.
وأنا دلوقتي مش عارفة أعمل إيه؟؟ هل أطلب أوبر وأروح البيت؟ ولا أعمل لنفسي كرامة وأقعد عند أهلي ؟ ولا أتواصل مع والدته وأقول لها ..؟؟
على العلم أنه عنيد جدا وما بيهمه ..
وممكن يسيبني شهر وما يفكر حتى يسأل علي أو على الأولاد
9/1/2020
رد المستشار
شكراً على مراسلتك وكان الله في عونك.
قضيتك هي قضية ضحية عنف منزلي وتسلط نفسي قسري في نفس الوقت، وأنت سيدة على درجة عالية من الثقافة والمعرفة، ويجب إعادة النظر في هذه العلاقة.
هذه الصدمات التي تتعرضين لها ستترك آثارها عليك طوال العمر ويجب التعامل معها بصورةأو بأخرى. عملت أولا ما تعمله أي زوجة في العالم الشرقي في طلب المساندة من الأهل ومحاول ترويض العنف والحصول على عوامل خارجية للسيطرة على الوحدة العائلية. هذه الخطوة قد تنجح أحياناً في وقف العنف وتغيير مسار الحياة الزوجية رغم أن السبب هو القبول بالأمر الواقع وتجنب الوصمة الاجتماعية.
الخطوة الثانية هي الدخول في علاج عائلي نفساني للتخلص من الأزمات المنزلية. تحتاج هذه الخطوة قبول الطرفين بأن هناك مشكلة داخل البيت ولكن المعتدي في العنف المنزلي نادراً ما يقبل بها في مختلف الثقافات.
الحل الأخير هو الخروج من هذا الزواج. الطلاق أحيانا هو الحل الأفضل وليس الأسوأ كما يتصور البعض. دون ذلك ستتغير شخصيتك بصورة دائمية وسيترك العنف والقسوة النفسية آثارها الدائمية عليك.
نصيحتي بصراحة هي طلب الطلاق أو خلعه. لا أنت بحاجة له ولا الأطفال بحاجة لأب غليظ لا يحترم أنثى.
وفقك الله.
تعليقات الأعضاء