حب الجامعة البريئ والله زمان!! م2

حب الجامعة البرئ والله زمان ! ! م1
نفسي عاطفي : حب love
 
 من ٧ شهور اشتغلت في شركة ودخلت ترينينج training ٢١ يوم، الـ ٢١ يوم دول كنت بشوف واحد كل يوم في الترينينج وكنت مبسوطة كل يوم وأنا شايفاه، كنت حاسة إنه حب وإنه مش لي، من نظرته لأي حد كنت بشوف إنه بيحب أو مش معايا أصلاً، عمري ما كلمته في الشغل خالص، كنت شايفة إنه في حاله ومش بتاع بنات لحد ما من شهر ونص كلمني يعزيني في والدي وبدأ كل ما أنزل حاجة يبعت يقول لي "يسلم اللي رباكي" وإنه بيقولي "بعد كل الشهور دي لسه منسيتيش ولا حزنك قل على باباكي" وكلامي معاه طمّنه من ناحيتي إني منساش حد حبيته ويدأ يتكلم معايا، يسلم عليّا أو يسأل.
 
 وفي يوم بعت قال لي "هو إيه يخلي البنت تسيب واحد حبها وحبته جداااً ؟" قلت له "أسباب كتير بس ليه؟" قال لي حكاية كبيرة هحكيلك في الفون قلت له تمام وكلمته بعدها بكام ساعة، قالي كنت حاسس هتطنشي مش هتتصلي، قولتله أنا قولتلك هتصل واتصلت وحكى لي إنه كان بيحب واحدة أوووووي من ١٠ سنين من وهما أطفال، هو عنده ٢٢ سنة دلوقتي، هو من ١٠ سنين كانوا صحاب جدااً ومكنش بيكلم غيرها، كان معاها دايماااااً لحد ما البنت دي كلمته في يوم وقالت له إن مامتها تعبانة أوووي وأخدهم وداهم المستشفي لحد قريبه ووقف معاهم وجابلهم أكل وشرب، يومها لما روحهم البنت قالت له إنها بتحبه ويرتبطو وهو حبها وارتبطو بس مش خطوبة.
 
 يعني بدل صحاب بقوا بيحبوا بعض، قال لي بدأت تستغلني وتطلب هدوم وسلاسل ذهب وفضة ولو مش معايا فلوس نروح مكان غالي كانت تقوله هتوديني مكان بيئة بلاش ننزل، وفجأة سابته من غير أي سبب، قالي كلمتني تاني وقالت لي ماما تعبانة تعالى قابلنا ورحت أقابلهم لقيتها جايبالي ناس وأخدو تليفوني يمسحو صورها وأرقامها والشات بتاعها، وبعدها راح لأبوه وقاله وأبوه جابهم في القسم لأنه معاون مباحث وهزقهم ونهوا الموضوع تماماااااً.
 
 قال لي عشت فترة وحشة وهما سابوا بعض من أول شهر ١، كان بيحكي لي وأنا بدافع عنها أوي علشان ميحسش إني بحبه مع إن قلبي كان بيتقطع وأنا بدافع عنها ومحروق دمي منها بسبب الزعل اللي وصلته له وقتها، حسيت إن ربنا إداني فرصة أقربله ويقيت جمبه أووووي وهو كان بيكلمني الأول كويس، بعد كده اعترفت له إني بحبه من أول يوم اشتغلت فيه معاه من ٧ شهور وإني منسيتهوش وكنت محرجة أقوله لأنه كان مرتبط، لحد ما بدأ يقل كلامه معايا بس لما أقوله أبعد عنه يقلب ويقولي لا أنا محتاجلك وعايزك تساعديني أرجع زي ما كنت ويقولي متمشيش ولو غبت يقولي مفتقدك.
 
 بدأت أتقبل إنه كلامه قليل ومهما أقوله إني بحبه أو بيوحشني يقولي ربنا يخليكي ليا، كل دا فوّتهوله والله وعديت علشان بس يكون كويس لأن حقيقي حبيته أوووي وأي حد كان يكلمني أعمله سكرين وأوريله، لو إيه حصل أقوله، لحد ما اتكسرت النهاردة، كلمت صاحبتي كانت معايا في الشغل وبحكيلها قالت لي محمد مين؟ حكيت لها كل حاجة، قالت لي دا اترفد من الشغل بسبب إنه سرق شاحن أصلي أيفون ولما واجهوه مشي ومرضيش يدفع تمن الشاحن ولا يرجعه واتعمله بلاك ليست من الشغل دا.
 
 مع العلم إنه متضايق ومخنوق من قعدة البيت وكل يوم أجيبله شغل بس كول سنتر زي ما كنا وهو يقولي مش عايز كول سنتر، أكيد مقاليش إنه سرق شاحن وبعدها قالت لي إنه كان بيحاول يكلمها وبعتتلي سكرين لكلامهم وإنه جابلها شوكولاتة قبل كدا وكان يكلمها يقولها استني نروح سوا، وكان بيطلب يشوفها وهي مبترضاش، البنت دي بثق فيها ومستحيل تكدب خصوصاً إنها وريتني كلامهم ولما كلمته وقلت له خبيت علي، ليه محكتليش؟ قالي دا قبلك مش من حقك تعرفي، إنتي ليكي من أول ما كلمتك، أقنعني إني غلطانة بس أنا سبته خالص، هو محاولش يقولي خليكي، محاولش يبرر حاجة، مقاليش متمشيش، هو طريقته جافة أوووي وقاسي أوووي بس قال إنه بيحبني وقالي إنه عايزني أستحمله بس أنا كمان والدي مااااات ومش مستحمله طريقته.
 
 بس هو كان يقولي حقك عليّا وآسف، كان بيرضيني جدااا كلمة منه، ليه كذب وطلع بالشكل دا؟ ليه مش معترف بغلطة؟ ليه عمل فيّا كدااا؟ أنا كل ركعة بصليها بدعيله فيها ربنا يصلح حاله ويهديه، ليه قسي عليّا كدا؟ ليه قال بيحبني وهو أصلاً محبنيش وكان بس وجودي مجرد بيطلّع فيّا اللي البنت عملته فيه؟ طب أنا أبدأ تاني إزاي بعد ٧ شهور حب ليه؟ أعمل إيه؟ أنا كدا غلطانة إني سبته وموقفتش جمبه؟ ولا أعمل إيه؟ والله العظيم بحبه وأخلصت له الشهور دي كلها، وحتي كان بيعاملني وحش أووووووي لما اتكلمنا واستحملت علشان مضغطش عليه وعلشان يصدقني ويثق فيّا ويآمن لي، كنت بحاول أشيل عنه.
 
 والله حبيته أووووووي ومتمنتش غير إنه يكون حبيب وأب ليا كمان وزوج كمان، اه تخيلت بيت وأسره معاه، هو يجد كذب عليا كل دا، هو كان بينساها بيّا بجد كان بيتسلي بجد!!
 
 
 أفيدوني أنا فعلا حبيته بجنون والله وعملت علشانه كتير، جيت على كرامتي واحتياجاتي كأي بنت أول قصة حب ليها طلعت مشاعرها كلها واستنت مشاعره بس ملقتش غير قسوه منه وأنا والله بحبه أووي اعمل إيه؟ أبعد خلاص وأنا فعلاً قلت له هبعد؟ ولا أنا جيت عليه بجد ومش من حقي أعرف حاجة قبل ما أقابله وليّا بأول ما كلمته؟ أعمل إيه؟ أرجعله وأعتذرله؟ بس أنا غلطت في إيه؟ أنا استنيت مشاعر حب منه بس هو قاسي وحاد أوي ولما ببعد يقولي استحمليني حقك عليا آسف، أعمل إيه؟ قال لي إنه نسي حبيبته ومبقاش يحبها ولو رجعت مش هيرجعلها أبداااً، وبيقول عملها بلوك وكل معارفها من كل حاجة، في حين إنه كل يوم ينزل ستوري واتساب أو بوست انستجرام أو فيس بوك إنه حزين جدااااااا ولوحده!!
 
 أعمل إيه؟
 أرجوكم أفيدوني.
 4/4/2020