|
| 
|
وساوس دينية قهرية شديدة
حضرتك أنا عندي مشكلة مش عارف حلها إيه، مع العلم إني سألت في المواضيع دي كذا مره وكذا شيخ بس أنا مش عارف أرضى عن نفسي، ومش عارف أرتاح خصوصاً إن الحاجات اللي بتجيلي في بالي دي مختلفة وبتيجي وتروح كل فترة وأنا مش عارف أعمل إيه، ربنا يسامحني في اللي هقوله بس أنا نفسي أرتاح والموضوع ده كبير أوي وتاعبني أوي.
في شتايم بتيجي في سري وبالي وحاجات غلط لربنا والأنبياء والرسل وكده، وبفكر في شكوك في العقيدة وأجي استغفر أو أستعيذ بالله ييجي في بالي إن مفيش ربنا ويعني إيه ربنا؟! ومفيش إسلام وكل ده عشان أنا اتولدت مسلم، ويقولي أنت بتسعيذ بمين ومفيش ربنا، وأنا تقريباً عندي وسواس قهري وأنا بصلي وصُمت نص شعبان وبقرأ قرآن وبقول أذكار وبصلي سنن بس أنا برده مش عارف أرضى عن نفسي، طول الوقت حاسس إني مش مسلم طبيعي وإني بقيت ملحد أو كفرت والعياذ بالله، كل ما أصلي أحس إن صلاتي مش مقبولة وملهاش لازمة وإني كده كده خلاص بقى أصلي ليه؟! وإن ربنا مش راضي عني وخلاص مصيري معروف.
في حاجات كتير أوي شبه اللي قولته ده بس أنا بتجاهل وبصلي وبعمل كل حاجة، بس في تشويش في بالي، في جوايا حاجة بتاكل فيّا، حاسس إني ماشي غلط وتعبان وبالي مش مرتاح، كل ما أقرأ آيات في القرآن فيها كلمة شك أو كفر أحس إني منهم عشان فكرت أو شكيت وبقيت كافر ولّا حاجة وأنا مش واخد بالي، كل شوية أحس إني لازم أقوم أغتسل وأقول الشهادة من تاني وكده، بس أنا بتجاهل كل ده والحاجات اللي في بالي دي بتجاهلها بس أنا مش عارف أنا كده صح، أتجاهل وأكمل؟ وكل شويه تيجي ليّا وساوس وحاجات جديدة وبفكر في حاجات غريبة، السؤال أنا أعمل إيه؟
وأنا كده مسلم طبيعي زيي زي أي حد هنا وحسنات وسيئات عادي ولا إيه؟ أنا معرفش الوساوس دي وصلت لحد فين عشان أنا مش فاكر بدايتها وهيا جت مرتين تقريباً قبل كده وبنسي فترة وبعدين بترجع تاني وأنا حاسس إني بتعب نفسي، بس دلوقتي أنا بقيت بطنش خالص ومشاعري بقت باردة، أصل أنا تعبت ومش عارف أعمل إيه تاني، بقيت بكبر دماغي خالص بس في تشويش في بالي وحاسس برده إني غلط وعلي طول حاسس إن ربنا غضبان عليّا وإني كفرت وفي سب بيحصل وشتايم وحاجات كتير زي دي، أنا خايف يكون كل ده مني أنا مش من شيطان أو وساوس، خايف أكون أنا اللي بعمل كل ده وبفكر وبعمل، بس أنا برده بتجاهل كل ده، عايز أعرف أعمل إيه؟ ولو الحاجات دي ارتحت منها وحلت تاني بعد فتره وأفكار مختلفة وجديدة، أعمل إيه تاني؟
وأنا الأيام دي على طول بفكر في اللي حصل زمان وإني مش فاكره ويا تري الحاجات دي وصلت لفين؟
بس برده بطنش وبقول اللي يحصل يحصل ..
14/4/2020
رد المستشار
أهلًا وسهلًا بك وبأسئلتك يا "مروان"، على موقعك مجانين
لا أخفي إعجابي بطريقتك السليمة في التعامل مع الوساوس المزعجة، وأرجو أن تستمر على نهج التجاهل هذا فهو الطريق الأمثل للتخلص من الوسواس، أو على الأقل للحد من تأثيره على حياتك.
طبعًا أنت مسلم كسائر المسلمين، لا علاقة لك بالكفر والكافرين لا من قريب ولا من بعيد، وأمثالك كثر بين الموسوسين، والكل يظن نفسه كافرًا، ويظن أن الأفكار منه وليست وسواسًا، ويرغب بالاغتسال والتشهد، ويفعل ذلك....، ويتعب كثيرًا، ثم يتبلد إحساسه....، إذن هي أعراض واحدة لمرض واحد، وهذا أكبر دليل على أن الأفكار وسواس وليست كفرًا
وأظنك إن ذهبت إلى الطبيب ربما يصف لك دواء يذهب الأفكار ويدعم العلاج المعرفي السلوكي الذي ألزمت نفسك به، فيكون الشفاء في ذلك بإذن الله.
أحييك مرة أخرى على حسن تصرفك، وأسأل لك الشفاء العاجل وطمأنينة القلب، وكل عام وأنت بخير
تعليقات الأعضاء