وسواس قهري اجتراري : الشك في الدين م

كيف أتأكد أن نبوة محمد حق؟
وساوس دينية
 
السلام عليكم. أنا صراحةً بعاني من 3 مشاكل مسببين ليا ضيق شديد جدا. مشكلتي الأولي هي التفكير الزائد عن الطبيعي في الدين، عندي رهبة وخوف غير طبيعي من النار، و كل ما أتخيل إني ممكن أدخل النار بحس بألم نفسي رهيب وخوف شديد. المشكلة إن خوفي ده مش ناتج عن معاصي بأرتكبها أو تقصير أو كدا، الخوف ده ناتج عن شعوري بالشك في الدين، وشعوري بأني لا أعلم ما هو الدين الحقيقي، أنا مرعوب من فكرة عدم اتباعي الدين الحقيقي أو القيام أو الإيمان بالشيء الصحيح الذي سينجيني من أي عذاب محتمل في الحياة الأخرى (إن كان هناك حقاً حياة أخرى) ولكني أرى أن إيماني بحياة أخرى وبعذاب أو نعيم في الآخرة سيكون أفضل حيث لن يسبب لي أي خسائر إذا لم يكن أياً من ذلك حقيقي، ولكن إذا كانت هذه الأشياء موجودة بالفعل وأنا لم أؤمن بها فبالطبع سيكون هناك خسائر.
 
أنا ولدت مسلم في أسرة مسلمة وأهلي إلى حدِ ما متدينين، المشكلة لم تكن في نشأتي، أنا نشأت كشخص مسلم مؤمن بشدة بالعقيدة الإسلامية وأقوم بكل الفرائض الدينية، لم تراودني هذه الوساوس أبداً إلا بعد إتمامي 12 عام تقريباً بس لقيت ليها جواب على طول وهو "الإعجاز العلمي" واستمريت علي هذا الحال بس جالي الفضول صراحةً و تساءلت لما القرآن فيه إعجاز علمي بالشكل الرهيب ده وإن القرآن بلا شك كلام الله، ليه في ملحدين؟! وملحدين عرب وأشخاص كتير حول العالم ما زالو لا يؤمنون بالقرآن حتى بعد اكتشاف الإعجاز العلمي الرهيب ده فيه؟!
 
ومن هنا بقا بدأت حكايتي في الشكوك والظنون، وجدت إن الملحدين أصلاً بيشككو في أكبر دليل كان بالنسبة لي على صحة الإسلام وبيقولو مفيش حاجة اسمها إعجاز علمي، معظم الحقائق العلمية منسوخة من كتب أخرى ألّفها علماء اخرون، حتى أن هناك بعض من هذه المعلومات كانت سائدة وقتها ويعتقد الناس أنها صحيحة ولكن اتضح أنها خاطئة! كما إن في معلومات كثيرة أخرى غير صحيحة إطلاقاً ولا تتفق مع ما أثبته العلم الحديث، أنا طبعاً قرأت وبحثت ووجدت تبرير للشيوخ وتفسيرات مختلفة لكن هذه التفسيرات قد تكون صحيحة وقد لا تكون. على أي حال أصبح بالنسبة لي موضوع الإعجاز العلمي مش دليل ولا حاجة على صحة الإسلام حيث أن الآيات الذي ادّعي البعض أنها إشارات لاكتشافات علمية حديثة قد تحتمل تفسيرات أخرى وبالتالي لا يمكن أن نشير إليها بأنها إعجاز علمي.
 
بحثت عن طريقة أخرى أقدر أثبت بيها عقيدتي فوجدت "الإعجاز الغيبي في القرآن والسنة" وممكن تكون إلى حد ما كانت مذهلة، ولكن وجدت أيضاً من يثير الشكوك حول هذا الأمر، الملحدين قالو إن هناك عرافون كتير عبر الزمن تنبؤا بأحداث كتير وكتير منها حدث، وذلك لم يجعل منهم أنبياء، الأفظع من كدا الشبهة التي أثارها المسيحيون على الموضوع ده، هم قالو إن الشيطان أيضاً له قدرات خارقة، وإن السحرة أيضاً بيستعينو بالجن والشياطين لمعرفة بعض الأحداث الغيبية، وصراحةً دي أكتر شبهة قلقتني وحسستني باستحالة معرفه الحق لأن أي معجزة أو أي شيء خارق للطبيعة أثبته للنبي أو القرآن مش شرط يكون من الله لأن الشيطان كمان له قدرات خاصة، وإحنا كبشر مستحيل بالنسبة لنا نفرق أنهي معجزة من الله وأنهي معجزة من الشيطان أو الجن أو حتى أي كيان آخر نعرفه أو منعرفوش!
 
رغم الرعب الشديد اللي انتابني إلا إني قررت إني أكمل البحث عن الحق، ولقيت بعد كدا إن من أدلة النبوة هو صدق وكمال شخصية النبي، وأنا ببحث في الموضوع ده لقيت شيء آخر أغرب من الخيال الملحدين أثاروه وهو إنكار وجود النبي محمد! وقالو إن شخصية محمد اخترعها العرب حتى يكون لديهم شخصية مقدسة زي ما النصاري عندهم يسوع، وحاولو يؤلفو دين مشابه لدين النصاري يمكنهم من توحيد قبائلهم وغزوهم للعالم، وبالتالي أصبح التراث بالنسبة لي أو الأحاديث والروايات التي تحكي عن صفات النبي وحياته والأحداث الي مر بيها لا يمكن الاستدلال بيه بأي وجه من الأوجه، حتي بعد ما اطلعت على رد الشيوخ في الموضوع ده فهو بردو كلامهم يحتمل الصواب ويحتمل الخطأ وأنا ببحث عن حقيقة مطلقة.
 
المهم إن إحنا حتي لو افترضنا إن النبي كان موجود والنبي كان شخص صالح والصحابة صالحين والتابعين بردو ممكن يكون كل ده خداع، ممكن يكون ادّعاء وتدليس. أنا عمري ما أقدر أعرف نواياهم الحقيقية أو غرضهم الحقيقي من إنشاء دعوة الاسلام، أنا كنت عاوز أدّي لكل حاجة مساحة من الشك.
 
ولو افترضنا حسن نيتهم بالفعل وصحة ما وصلنا من الأحاديث الصحيحة والتراث وكدا والنبي كان صادق النية فعلاً، فهل مش ممكن يكون متوهم؟! وده مش كلام من عندي، وأنتو أدري يعنى كام واحد توهم بأنه كان بيسمع ربنا وبيكلمه وكان بيكون في غاية الاقتناع بذلك، فهو مش كاذب ولكن ده كله شيء بيحصل في نفسه، الوحي اللي متخيل إنه بيتلقاه فهو نابع من داخله وليس من أي مصدر خارجي، فإيه الدليل إن النبي ممرّش بنفس التجربة؟
 
لو افترضنا إنه مش كدا وإنه كان فعلاً بيتلقي وحي، هرجع تاني للنقطة اللي ذكرتها فوق وهي إن الشياطين بردو لديهم القدرة علي ذلك، الشيطان ممكن يخدع ويوحي إلى أشخاص على أساس إنه من وحي من الله، وقد يكون حتى هذا الوحي به بعض من الحقيقة زي الأخلاق الكريمة اللي نص عليها القران وهكذا، ولكن يظل بعد كل ده هو ليس وحي رباني وإن تضمن كثير أو حتى كل ما يريده الله، فهو باتباع هذا الكلام إحنا ممكن نكون بنتبع كلام الشيطان بدون علم، أو حتي مش لازم يكون شيطان ممكن يكون كيان آخر مفكر إنه إله وبيوحي للناس على إنه هو الخالق وهكذا وهو في الحقيقية مش كدا، وممكن يكون الله الحقيقي أصلاً غير مبالي بالبشر أو ممكن حتى يكون مخادع وعايز البشر يفضلو في ضلالهم ومش عاوز يهديهم وإن الوحي ده كان من ملاك مثلاً أو إله آخر، إله خير هو اللي أوحي للناس باعتباره الإله الوحيد الحقيقي، والحقيقة ممكن تكون مش كدا لأن الإله الحقيقي غير مبالي بإنه يوحي للناس أو شرير أو خيّر بس ليه طريقة تانية وخطة تانية لكن الآلهه الأخرى أو الكيانات الأخرى مفهموش كدا وظنو إنه سايب البشر كدا في عميانهم وبالتالي حد فيهم هو اللي قرر يهدي الناس ويبعت ليهم الوحي القرآني وادعي إنه هو الإله الواحد الحق، كل ده مش وارد؟!
 
أنا لم أكتفي بالبحث في الإسلام والقرآن، أنا بحثت كمان في العقائد والطوائف الاخري، كل واحد ليه آرائه ووجهات نظره وطرقه اللي بيبرر بيها معتقداته وفي الحقيقة كلهم يحتملو الخطأ والصواب، مفيش حاجة لقيتها يقينية، حتي إني اطلعت على بعض الأفكار اللي بتدعو الشخص إنه يتصل بالله شخصياً ويراه ويكلمه بدون أي وسيط بس لقيت إن مش كل اللي مروا بالتجربه دي حكو نفس الكلام، معنى كدا إن التجربة دي متوصلش لنتيجة حتمية، كما إن بردو مش شرط اللي اتصل بيه ده يكون الله ممكن يكون أي كيان اخر.
 
بعض الأشخاص اللي حكو تجاربهم مع الموت واللي ادعي إنه مات ورجع تاني وهكذا، كل واحد بيحكي أشياء مختلفة كما إن مفيش أي شيء يدعم ادعاءاتهم دي، وممكن هلاوس.
 
اطلعت حتى على كلام الناس اللي غيرو ديانتهم من الإسلام للمسيحية ومن المسيحية للإسلام، وسمعتهم وكتير منهم بيحكي عن المواقف اللي تثبت العناية الإلهية والإرشاد الإلهي ليهم عشان يعتنقو الدين الحالي، وبعض منهم حكى معجزات حصلتله شخصياً. أنا جربت كل حاجة وبحثت في كل حاجة وقد إيه بكيت وصليت وسجدت لربنا وأنا بترجاه يهديني ويريح قلبي، أنا تعبت جداً من الموضوع ولحد دلوقتي ملقتش حل نهائي ليه.
 
هو أنا كل خوفي من النار، إن كانت موجودة فأنا مش عاوز أخشها. هو بردو يحتمل إنه ميكونش في إله ولا دين ولا أي حد يحاسبنا ولكن هو الإنسان على حسب أعماله، لما يبعث بيروح المكان اللي يستحقه على حسب أعماله من غير ما حد يحاسبه، وممكن يكون في ربنا بس ربنا شرير وعايز يضلنا وإحنا كدا كدا داخلين النار، وممكن يكون في إله خير بس ممكن يكون لحد دلوقتي مش عارفينه،
 
فحتى لو أنا اضطريت أؤمن بالإسلام دلوقتي على أساس إنه حتى لو مفيش دليل قاطع على صحته فإن بردو ليس به خطأ مثبت، طب لو افترضنا إن الإله الحقيقي ده أظهر نفسه بعد كدا بطريقة إعجازية عجيبة هنتبعه ولا لا؟! ولو افترضنا إنه حتى دلوقتي وفي الوقت الحالي في ناس عندهم الحقيقة المطلقة اليقينية دي وإحنا متبعناهاش عشان مش عارفينها مصيرنا إيه؟
 
مش المفردض نبحث أكتر؟ مش المفروض نعرف أكتر؟ بس أبحث أكتر من كدا إيه؟! أنا بقالي 7 سنين ببحث وبدوّر، إيه تاني في استطاعتي أعمله؟ أنا خايف ومرعوب أقبل بنتيجة معينة وتكون غلط وأخلد في النار.
 
أنا مفيش بالنسبة لي أسهل من إني أريح نفسي ودماغي وأعيش كشخص مسلم وأنسي كل ده، بس الرعب من إن يكون مش هو ده اللي مطلوب مني عشان أنجو راعبني، كل اللي أنا عاوزه أنجو من النار.
 
مشكلتي دي مسببالي ضيق شديد جداً ومأثرة على حياتي، الموضوع ده بفكر فيه باستمرار لدرجة حتى وأنا نايم بفكر فيه. أوقات كتير بتمني الموت لأني بحس إن هو ده اللي هيريحني و يجاوبلي على كل أسئلتي لأن ببساطة أنا لما أموت هعرف الحقيقة كلها.
 
أنا مش باخد أي أدوية، عندي مشكلة إني بنام كتير، وعندي رغبة شبه دايمة في الأكل، مفيش أي حد من أهلي بيعاني من أي اضطرابات نفسية. أنا آسف على الإطالة ولكني فعلاً محتاج مساعدتكم، وأنا لجأت لرجال الدين والشيوخ ولم يفيدوني ولم يشفو غليلي. أنا أعتقد الموضوع له أبعاد نفسية، بس بردو أنا مش عاوز أعالج نفسي وخلاص وأتخلص من الأفكار دي فقط، لا أنا عاوز أعرف الحقيقة المطلقة كمان الاي هتريحني. أنا آسف على الإطالة.
 
أنا عندي مشكلتين كمان ولكن ملهمش علاقة بالموضوع ده، ممكن أبعتهم في رسالة أخرى.
منهم مشكله إنتو عارفينها، أنا راسلتكم قبل كدا.
18/4/2020