وسواس قهري اجتراري : الرجل أفضل من الست؟! م1

وسواس قهري اجتراري: الشك في الدين م
الراجل أفضل من الست؟!

السلام عليكم، هي دي مشكلتي التانية، أنا مش قادر أقتنع ولا أتعايش مع الفكرة اللي تعتبر مقبولة في كل المجتمعات وكل الثقافات وهي إن الرجل أفضل من المرأة! يعني إيه الرجل أفضل من المرأة؟ وليه؟!

هل لأنه اتخلق ذكر معنى كدا عنده أفضلية على اللي اتخلقت أنثي، طب ليه؟! محدش بيختار جسده اللي بيتولد بيه. على أساس إيه يكون الرجل أفضل من المرأة بسبب امتيازات منحت ليه وهو لم يسعى أبداً لاكتسابها زي القوة البدنية مثلاً، معظم الرجال أقوي بدنياً من معظم النساء، شيء طبيعي ولا دخل ليهم أبداً فيه، لماذا إذاً يكون الرجل أفضل من المرأة لأنه اتخلق بجسد أقوى؟! وهل أصلاً القوة هي مقياس الافضلية؟ يعني أنا شايف إن الموضوع مش بالقوة خالص، يعني مش شرط القوي هو الأفضل، لكن مقياس الأفضلية في البشر هو القلب الطيب فعلاً، يعني مش شرط القوة، مش شرط الذكاء، مش شرط أي حاجهة. الحاجة الوحيدة اللي شرط هي الروح الحلوة، هي دي اللي بتعمل إنسان أفضل.

الفكرة إن أنا مقدرش أتكيف وخلاص وأقبل إن في جنس أفضل من جنس، في حاجة جوايا رافضة المنطق ده، هو يا إما الراجل زي المرأة تماماً وإن الاختلافات الجسدية والنفسية دي مش ضرورية، يعني ممكن المرأة بردو تكون قوية بدنياً زي الرجل بالظبط وعندها نفس المقدرة البدنية وعندها بردو القوة النفسية، يا إما هم فعلاً متفاوتين ومختلفين ولكن التفاوت ده عمره أبداً ما يكون سبب لأفضلية شخص على شخص أو جنس بالكامل على جنس آخر. إنما أنا معتقد اعتقاد جازم إن لو الرجل عنده بعض الامتيازات على المرأة فلابد من وجود امتيازات أخرى للمرأة على الرجل بحيث في الآخر يتساوى كفتين الميزان، يتساوى تماماً الرجل مع المرأة وإن كانوا مختلفين، مفيش حاجة اسمها إن الراجل هو الكامل والمرأة هي الناقصة أو التبرير بأي شكل من الأشكال للفكرة دي زي إن البعض ممكن يقول إن هي ملهاش دور في نقصها ده لأنها خلقت هكذا، إنما الرجل فهو خلق ولديه قدرات أكتر ولديه أفضلية أكبر بحيث إنه أقرب للكمال! وجعلنا الرجولة هي كل شيء في الحياة وهي الكمال بحد ذاته! وبردو بنبرر الظلم والافتراء الزائد عن الحد ده للمرأة بأننا بنقول إن مش كل ذكر رجل وإن ياما ستات كتير أوي كانوا أرجل من ذكور كتير! يعني ايه ده يا جماعة؟! ليه البشر كدا؟! ليه بندوس على الست أوي كدا؟! يعني إحنا جردناها هي وجنسها من أي أفضلية أو أي مساواة وخليناها هي الأقل، وإن الوسيلة عشان تكون إنسانة لها قيمة وتستحق المساواة مع الذكر إنها تتمتع بالرجولة (الصفات اللي بتميز بعض الذكور) ولكن المرأة مينفعش تستحق المساواة مع الذكر لما تكون نفسها وتكون أنثى مكتملة الأنوثة، لا ساعتها هي أقل والراجل هو الأفضل!

الست إنسان لها مشاعر ولها شعور بالكبرياء والكرامة اللي لا بد أنها بتجرح جرح عميق جداً لما تسمع الكلام دهـ معتقدش في إمرأة في العالم ممكن تكون متقبلة فكرة إنها أقل من الرجل ولكن ممكن كتير اتعودو أو نسوا أو فعلاً اقتنعو بكدا من كتر ما المجتمع بيصورلهم كدا ويأكدلهم كدا، وأصبح هم كتير من النساء إنهم يلاقوا الراجل اللي يرعاهم ويصرف عليهم وخلاص وميعوزوش حاجه أكتر من كدا وبطلو يفكروا في قيمتهم الإنسانية وفي كبريائهم، اعتبروه أمر واقع وخلاص، إنهم أقل من الراجل وميقدروش يبقو زيه أو متساويين معاه، بس هو زي ما في نماذج كدا من النساء يوجد نماذج تانية من النساء ميقدروش يتعايشوا مع الموضوع ده، كرامتها الإنسانية تمنعها من كدا، وده حقهم. أنا راجل وأرفض كدا، أرفض إني أتعامل مع أي امرأة إني أفضل منها، أنا أحط أمي وأختي وزوجتي وبنتي في عنيا الاتنين وأعمل المستحيل عشان أحميهم وأخلي بالي منهم، بس ميكونش السبب إني أفضل منهم، إنما بدافع حبي ليهم، هم أغلى حاجة في حياتي، وعندي يقين تام إن في كل الأحوال أنا متساوي تماماً معهم وهم متساويين معي وإن الأفضلية عمرها ما كانت لجنس معين.
الفكرة التانية بردو واللي تعتبر جزء من الموضوع ده هو تفضيل لخلفة الذكور على الإناث؟! لحد دلوقتي في ناس بتفكر كدا؟!

أنا حاجة جوايا بردو رافضة تماماً التقليد ده تماماً وحاسس إنها حاجة في قمة العنصرية وفي قمة اللاإنسانية، لأن ببساطة ومن غير تبريرات زي ما الابن الذكر سند العيلة وبيشيل اسم العيلة والهرتلة ديه فأنت مش بتختار، أنت مش بتروح تشتري حاجة فبتتشرط وبتقعد تحلل مميزاتها وعيوبها، أنت بتتعامل مع روح بني آدم، والبني آدم ده جاي منك أنت، حتة منك، إزاي تقدر ترفض حتة منك؟! في ناس بتبرر تمييزها وتفضيلها للابن الذكر بأنها بتقول أنا مبكرهش خلفة البنات، ولو جالي بنت مش هتضايق، بس نفسي يبقى عندي ولد!

الناس ديه كل اللي فارق معاها الولد وليهم أسبابهم أن الولد سند وكدا، وهم أهم حاجة يجيبو الولد، البنت جت أو مجتش مش مهم، هم مش هيكرهو يبقي عندهم بنت بس بردو لو مخلفوهاش مش مهم وبتالي هي نفس الفكرة العنصرية! زي ما قلت "الخلفة" وبغض النظر عن إني أشرح إن الابن له مميزات والبنت ليها مميزات لان مش المفروض نتعامل مع الموضوع بالشكل ده، إحنا بنتعامل مع حته مننا، مع أبناءنا وبناتنا، وفوق كل ده بنتعامل مع روح إنسانية.

وبالتالي خلاصة الكلام ده في الآخر إن أنا بقدر وبحترم البني آدم وبالتالي احترامي وتقديري ده واحترامي لكرامة وكبرياء كل إنسان، أنا جوايا برفض كل أنواع التمييز بين البشر أو الإيمان بأي شكل من الأشكال بأفضلية أي إنسان في الدنيا على الآخر لمجرد جنسه أو عرقه أو كدا، وإن السبب الوحيد بنظري هو درجة صفاء ونقاء النفس البشرية دي، هو ده المقياس الوحيد للأفضلية بين البشر.

هو أنا كدا غلط إني بفكر بالطريقة دي؟؟
لأني أنا حاسس إن أنا الوحيد اللي بفكر كدا.
18/4/2020