|
| 
|
زحمة حياة ولمسة اكتئاب م4
رداً على استشارة متابعة 3 !! مش معقول يا دكتور!!
مساء الخير... قلت لي : ((أنا الحقيقة فقط أتوه من كثرة الحكي الذي تحكين)) !!!!!!!!!!!!!!!!! وردي : ...يقطعني لو بتوهك يا دكتور !! طب متجرب تستخدم "Google Maps" أو أقولك خد أي عيل اسند عليه وانت بتمشي وسط سطور كلماتي يا أبوهندي !! أقولك إيه بس إنت بتقولي "بتوه" !! أنا كان لازم أقفش القفشة دي الله ما أنت دمك خفيف بزيادة أنا قفشت قفشتي عشان يبان دمي خفيف زيك !! ولا إإإإييه !! ...
يا سيدي الكريم في البداية أحب أقول لجناب حضرة فخامة سيادة سعادة حضرتك أنا مبحكيش مع حد !! عشت عمري كله نوعا ما بعيدة عن أهلي وعن أصحابي وعشت في أماكن مافيهاش العربي أو اللهجة بتاعتي بالإضافة إلى تخوفي المطلق من الحديث مع أي غريب حولي بحكم أسباب خوف أهلي الشديد علي من كل شيء بالإضافة السياسة كان لي أكثر من اسم وأكثر من هوية ورسمية كمان كنا نتنقل بها، في بلد مش رسمي مزور مية مية البلد بتاعي مطلعين الخريطة بالتزوير والله !! لي علاقاتي هنا طبعا بس مش زي ما تكون مع حد عربي أو حد أثق فيه!!
وعاوزة أسألك .. هو هل إنت إنسان طيب ولا خبيث ؟ هل أنا يجب أخاف منك ولا أتكلم معاك زي مبتكلم مع خالو مثلا ؟ أو أخويا الكبير مثلا ؟؟ هل إنت بتحترم أو تقدر العلاقات الإنسانية الطيبة وتحب ترحم وتتواصل مع بني الإنسان والحيوان والنبات والدنيااااااااااااااااا كلها، وتديهم من ما أعطاك ربي من نعم الفهم وكل قيم الإنسان الإنسانية !!!
غالبا وده برأي الشخصي المتواضع حضرتك عندك خلط بين أنا القديمة التي إنت تعرفها وكونت بالتأكيد صورتك عنها وعن مشاكلها السابقة وخزنتها في عقلك الباطن !! مع أنا الحالية التي جاءت لك بمشاكل مختلفة تماما عما كانت !! وربما أنت كنت سابقا والآن تراني فوق الشبهات من أن يصيبني مشكلة أو تستهيف مشكلتي!! لكن بميل أكتر لفكرة إنك كونت صورة عني ثابتة بعقلك الباطن، فلما تيجي ترد بتتكبس مبتبقاش عارف تحدد المشكلة على حد قولك في أيه ... بتوه !!! دكتور ..بيتوه يا جدعان!! أموت وأعرف رديت علي إمتى بعد الفطار ؟ ولا وقت الصيام !!! أنا سخسخت من الضحك لدرجة إني اتخنقت اقسم بالله بقيت حمرة دم من كلمة "بتوه" دي !! إزاي جالك قلب تكتبها !! طب مفكرتش براعايا فخامتك يا فخامتك !! طب فكك مني يازعيم أنا وحدة مخي طاقق ومجنونة وثابت جناني بالأوراق الرسمية !!! منظرك إيه قدام رعايا فخامتك وقدام اللفيف العلمي بتوع مجانين!! وإنت بتقول بتوه!!! طب لما إنت بتوه إحنا التايهين أساسا نعمل إيه ؟؟؟ أنا بقترح فخامتك تزور معالج نفسي في أقرب وقت وتناقش معه التوهان بتاعك وطبعا هتوهوا إنتو الإتنين فتعالولي عشان أتوهكم أكتر ...سوري أخففكم ألعب بمخكم أهو.. الي يلهمني عليه ربنا ساعتها ...
قلت لي : ((وأبحث فيه عن مشكلات محددة)) لأ إنت متبحثش إنت تدبح عالطول)) !!! من قال لك يا سيدي الكريم أن ما أرسله لك مشكلات تحتاج علاجا أوحلا دائما !! إذا أنا مش عارفة أحلها إنت هتحلها إزاي !! من البداية كنت قلت لك عنواني مشكلاتي مهياش نفسيه ولا عقلية مشكلات حياة ... بأي حق تستصغر وتستهيف مشاكلي !! أي حد عنده أي نوع ألم هو ألم!! أو مشكلة!! أو وجع!! رد غير عادل ولا منصف من إنسان بمثل كيانك العلمي والإنساني قبل أن يكون طبيب أرواح وإن كان ربي فقط وحده من له هذه الصفة بس ماشي ...
وأعيد وأكرر وأفكر حضرتك كتبت لك عنوان مشاكلي حياتية ربما ليس لها حل أصلا أو حلها بيد من يغير الأقدار بين غمضة عين. من فضلك مستخفش بمشكلة إنسان ربنا بعته ليك مخصوص تطبطب عليه ربنا اختارك تكون بتمثله إنت عليك تطبطب أو تعمل الي يمليه عليك ضميرك وقلبك وسيب ربك يكمل الباقي !!
قلت لي : ((لأضع لك الحل مكبسلا ! (يعني في كبسولات)))!! (لأ لأ لأ إنت بتضحك علي إنت هتديني حقنة أنا عارفة وصرررررررررررررررررررررررريخ بقى بلاش حقن والنبي ياااعمو الدكتووور) !!!!!!!!!!!!!!! إنت فعليا إديتني إحدى الكبسولات هذه يا دكتور وائل، حليت جزء منها حضرتك اقترحت لي أتجنب الصدام مع ماما !! وأنا بنفذ أهو ونوعا ما قلت الصدامات يبقى إنت حليت وكبسلتني قبل كل اتصال بأخدها !! الباقي بقى حياتي مشاكل حياتية ومش عادية بنظري أنا أما بنظرك عادية !! دي بقى ليها قعدة عرب دي دلوقتي بالرد عليك تباعا !!
قلت لي : (((فلا أجد إلا مشكلات صغيرة عادية كمشاكل كل الناس))) إنك تستخف بمشاكلي وتشوفها عادية أوكي إنت حر، بس عادي!! ما هو دايما الألم مهما كان سخفيف ميوجعش إلا صاحبه !!
دلوقتي هنتخيل حاجة أنا وإنت وهي لو فرضا كنت بتمشي بالعربية بسيارتك بأمان الله وفجأة العربية اتعطلت بك وسط الطريق بمكان الناس فيه عنصرين للنخاع مبيحبوش يساعدوا لكن لو خليت قلبت !! المهم ... جيت فتحت الباب عشان تنزل تشوف في إيه !!! رجليك انحشرت في كومة طين وصل لركبتك، وبالتالي البنطلون اتوسخ !! وكدة بقيت واقف لا أنت قادر تصعد رجليك لإن العربية هتتوسخ ولا ينفع توقف !! حاولت تعافر !! جيت توطي ترفع البنطلون !! هوووووووووووووب .... الجاكيت علق بحاجة طالعة من السيارة و اتفتق طوليا !! جيت تكلم حد من أصحابك لقيت البطارية فاصلة شحن !! فقررت أنك تنزل من السيارة تحاول تبحث من هنا ولا من هنا !!! هوووووووووووووب خرجت هووب البنطلون انغمس بكومة الطين أكتر ... هوووووب ... اتفتق كللللللللللللله !! واضطريت ترمي البنطلون !!! عادي عادي إنت رجل مش عيب !! قررت تطلب مساعدة من أحد المارة !! بعضهم حاول يساعدك، بإنه تدفع من فلوسك مقابل بنطلون !! ولا هتفضل من غير بنطلون !! دفعت !! وبعدين الشاحن فضلت تشحت وتسترحم من حولك ... فييييييييييييييييييييييييين لما حد قرر يبعلك شاحن !! دفعت !!! ودفعت مقابل الأكل !! المهم فلوسك خلصت !! بس إنت لازم توصل للمكان اللي أنت عاوزه !! حاولت تصلح عربيتك مقابل فلوسك ومساعدة من يرق قلبه لك ويسخره الله لمساعدتك !!! قررت تكلم صحابك الي أنت عارف كويس أوي انه ميقدرش يعملك حاجة بس حسيت إنك محتاج تكلمه !! تحب يكون تصرفه معاك إزاي !!! وليه كلمته !! وفضلت على الحال ده 5 سنوات !! مش 5 أيام ولا شهور ...سنييييييييييييييييييييييييييييين !!!
يا ترى هتحس بإيه مشاعرك أفكارك كله ؟؟ وإنت فعليا مدرب على حل هكذا مشاكل عادية وصغيرة وممكن أي انسان يتعرض لها !! سأترك الرد لعدالة عقلك وقلبك. علما بإني أراك ومشكلتك هذه ليست إلا مشكلة عادية تمر على كل الناس!!!!
قلت : ((وأيضًا متداخلة في بعضها بشكل لولبي))) هو لولبي ده مش أحد أنواع غشاء البكارة إيه علاقته بإنك توصف مشكلتي كدة !! حضرتك عاوز تشوفها كدة لولبية أو تشوفها واضحة لو عاوز !! فكرت أطلب مستشار غيرك بس مبحبش أتكلم عن نفسي عن إحساسي مع حد مش أعرفه بس ممكن أخسر معلومة جديدة أو فكرة جديدة ! لا أعتقد مهم هذا الآن أفكر فعليا بعدم الكتابة والشكوى لك مجددا وربنا أطلب منك لاحقا حذف اسمي تماما ونهائيا.
قلت ((يتعذر فك حلقاته من بعضها!.))) لا سهلة ..تجيب البلورة السحرية وتكلم الجني الأزرق والجني الأحمر و شمهشورش وإن شاء الله تتفك !!! بقى الدكتور وائل أبو هندي يتعذر عليه فك حلقات مشكلة يراها أصلا عادية !! ومع ذلك يتعذر فكها !! يعني هي لا نفسية ولا عقلية !! طب مهي دي مشاكلي الحالية !! دائرة مفرغة ما بين ماما ومكاني بمكان 5سنين !! أجيب لك مشاكل منين تانية عشان حضرتك ما تتهش وتعرف ترد !!
قلت ((وأنا بالمناسبة ضبطت مشاركة منك عن كورونا ونشرت ضمن قصاقيص مجانين 75 ... وقد سعدت جدا بها... وكان اسمك فيها مرة "كركر" ومرة "ريا أخت سكينة"....))) غير صحيح لست أنا وغالبا حضرتك ملخبط والدليل إنك بتوه من حكاياتي فإزاي بقى قدرت تعرفني مع إني معرفتش بنفسي أصلا !! ؟؟ مش أنا يا فندم !.
الحمدلله ألف مليون مرة تغلبت على الإحباط الأول (اللي حضرتك شخصته اكتئاب وغلط طبعا) وده بفضل إني صلحت علاقتي مع ربي وإن شاء الله دائما أفضل قريبة منه وبعيدة عن عباده الظالمين لي. معنديش مشاكل نفسية بمعنى نفسية تتطلب طبيب لكن أكيد لي تراكمات لأحداث سابقة .. معرفش، أو مودي بيتغير بسبب روتين حياتي ممكن أزهق وخصوصا إني بكره الروتين وبحب التجديد دايما، على أد ما أقدر بحاول أنظف روحي وقلبي من كل شيء ومبيأذيش حد حتى لو عندي الورقة اللي تجيب لي حقي تالت ومتلت بسيبها له وبفضل أقعد بعيد وأكتفي بما عندي من أي شيء حتى
معنديش أشياء مثيرة حاليا أعملها ساعات بشغل نفسي بالتصوير والعمل على النت واللي بعمله كهواية، مؤخرا مهتمة باليوغا كفلسفة وكتدريبات روحانية مع مختصين طبعا على النت، بتعلم طبخات جديدة والحمد لله الحمد لله بتفشل وتبوظ وأرمي الأكل بالزبالة يا يتحرق يا يتشوه كطعم فقررت مبتكرش! أنا بعرف أعمل كل الأكل العادي الكلاسيكي المحشي الرز والمرق والنواشف .. وووو ... ..حيواناتي أخذوهم مني كنت ناوية أحكي لك بس خلاص مش هاكلمك عمري تاني أبدا ..واطمن أنا أقوى مما تخيل أو تظن أنا بتولد من رحم الألم ومفيش تحدي بإذن الله يقهرني ما دام منغضبش ربنا ونرضى بأي قضاء له مدام مستورين والفرج قريب زي ميحب سلمته أمري وأمر عائلتي وأولادي مليش غيره الآن هو معيلي وكفيلي .. ومدام بهزر واضحك وأتشاقى معك يبقى مزاجي النفسي كويس والباقي .........................يفرجها ربك ...
بالمناسبة معذرة للإطالة بس حبيت أشرح لك وأفهمك عشان ما تتهوش تاني !
أو ما لها لازمة لن أزعجك بي ثانية.
10/5/2020
رد المستشار
الابنة الفاضلة "Dragonfly" أهلا وسهلا بك على مجانين وشكرا على ثقتك، ومتابعتك خدمة استشارات مجانين بالموقع.
حمدا لله أن تخلصت من الإحباط الأول وعقبى لكل وأي إحباط تجدينه في حياتك، أسعدنا جدا ذلك.... هكذا العشم فنحن نرى فيك صلابة تكفي لمثل هذا وأكثر... رغم لحظات اليأس وتصورات الضعف والظروف التي تقلب كل شيء رأسا على عقب....
لولبي يعني حلزوني متداخل وملخبط ولا يظهر له رأس من رجلين ... هذا هو المعنى لكن لا يوجد نوع من أنواع غشاء البكارة اسمه لولبي !! ويمكنك مراجعة الأنواع في مقالة د. هالة مصطفى في ملفات جنسية ليس من بينها لولبي خالص.
طبعا أنا مستعد جدا لقعدة العرب حالا ...لكن من المؤسف أن الحظر المفروض الآن يمنع مثل هذه التجمعات ... هذه واحدة وأما الثانية فلا أدري هل ما زال ينفع الحديث عن قعدة العرب باعتبار العرب كلامهم محترم مثلا !! في تناقض صارخ مع الوضع الحالي للبلدان التي كانت تسمى دول عربية ؟ ليست هناك بلدة تستحق الوصف بأنها محترمة غير يمكن بلدين أو ثلاثة اشتهروا قديما بأنهم لا يتكلمون ... وربما هذا هو السبب في محافظتهم على احترامهم.
اعتراضك مقبول يا أستاذة .... ولا أسكت الله لكم لوحة مفاتيح أبدا ... ومرة أخرى أهلا وسهلا بك دائما على موقع مجانين فتابعينا بالفضفضة.
تعليقات الأعضاء