اضطراب فصامي وجداني وسمات حدية

معنديش قدرة أحدد هويتي
 
عندي اضطرابات نفسية كتيرة من أكتر من ٤ سنين والأمر بيزداد سوء، دايماً مش قادرة أحدد أنا مين ولا إيه شخصيتي، كل فترة بكون مختلفة أحيانا سريعة الاستثارة ومتحمسة ومندفعة بطريقة غريبة وبعدها اكتئاب شديد والموضوع وصل لهلاوس سمعية، بسمع حاجات غريبة أصوات من جوه عقلي بس كأنهم أشخاص في الحقيقة، مش بقدر أسيطر على نفسي ولا على مشاعري، بحاول أنتحر وأذي نفسي ومش بعرف ليه! وكل فترة بتكون فيها شخصيتي مختلفة ومش بفتكر إيه اللي حصل في الفترة اللي قبلها، مشوشة جداً ومعنديش طموح وفاقدة الأمل في كل حاجة.
 
علاقتي بأهلي مكانتش كويسة خالص ودايماً مشاكل وعدم تفاهم، من وأنا طفلة كارهة حياتي وسطهم لدرجة إني كنت بحاول أنتحر من وأنا عندي عشر سنين!! أنا حتى مش بقدر أسيطر على أفكاري وذكرياتي يعني أحيانا مش بقدر أفتكر أي حاجهة وأحياناً غصب عني بفتكر حاجات وحشة. اتعرضت لأكتر من ٥ مرات تحرش ومن ناس قريبين، الموضوع بدأ من وأنا طفلة من قرايبي وبصورة مشوشة، مش قادرة أفتكر تفاصيل وبعدين من أخويا الكبير من ٦سنين بدأ ومكنتش أقدر أقول لحد عشان محدش بيصدقني، ومكنتش أقدر أدافع عن نفسي بمجرد ما بيقرب مني بتشل وأفكاري بتقف وجسمي بيتصلب وبشوف نفسي في مكان بعيد جداً وضلمة، بسمع كل الأصوات من بعيد، تقريباً بغيب عن الواقع ومش بغيب عن الواقع لما يحصل كده بس لا ده أخدت فترة كبيرة أكون قاعدة وأغيب عن الواقع وأرجع بعد ساعات مش عارفة إيه اللي حصل!
 
كنت دايماً لوحدي في أكتر وقت احتجت فيه أهلي ومحدش كان معايا، دخلت في حاجات أكبر مني فجأة ولقيت ناس بتهددني في كل مكان في الشارع كل ده بسببب علاقة عاطفية فاشلة دخلوني فيها ما يسمى بالصحاب اللي هما أصلاً دخلوني في المشاكل دي. كمان من سنة كنت بحلم بشياطين بتغتصبني وكنت بحس بكل حاجة وبألم فظيع. حالياً عندي صاحبة واحدة وبعيدة عن أي مشاكل بس من حين لآخر فيه ناس بتحاول تهددني وبحاول أتجاهل الأمر. بحب واحد مش موجود، إداني أمل لفترة وهو السبب إني أبدأ أدور عن سبب لمشاكلي النفسية.
 
كل حاجة متلخبطة وتايهة، كل حاجة ضلمة، بخاف من كل الناس ومن كل العلاقات وبترعب من فكرة إن حد يسيبني ويمشي، حتى الشخص اللي حبيته ده أخدنا فترة قليلة مع بعض وبعدها اختفي وبقيت مرعربة طول الوقت بسبب غيابه. أنا مش عاوزة أنتحر تاني أنا عاوزة بس أسيطر على نفسي وعلى الأفكار، عاوزة أعرف أنا مين والجنان ده يخلص، عاوزة أعرف إزاي أعيش ومعنديش طاقة لأي حاجة ولا عارفة أبداً منين ولا عارفة أطلب مساعدة من حد،
 
أتمنى أموت قبل ما أفقد السيطرة على نفسي تاني،
عاوزه أنسى طفولتي والقسوة اللي كانو بيعاملوني بيها والتنمر اللي من أهلي.
15/5/2020