التلعثم منذ الطفولة

التلعثم
 
أنا عندي تلعثم من وأنا طفل، يمكن بدأ معايا وأنا عندي 8 أو 9 لأني فاكر قبل كده كنت بحب جداً أقرأ في الفصل في حصة العربي لكن بعد كده بقيت بتحرج جداً ومبقتش بحب أقرأ عشان التنمر رغم إني كنت شاطر ومتعرضتش لتنمر كتير بسبب تلعثمي.
 
علاقتي بأهلي :
بابا عمره 70 سنة, ساعات بحس إني بحبه، وساعات بحس إني بكرهه، هو مواقفه سلبية كتير لكني واثق إنه بيحبني، لكن جوازه كان فاشل بكل المقاييس أكيد وعلاقته بماما علاقة فيها قلة قيمة وقلة أدب, ساعات بحس إنه مكبر دماغه ورامي كل حاجة على ماما، وساعات بحس إنه قليل الحيلة.
 
ماما عمرها 60 سنة, كذلك الأمر ساعات بحس إني بحبها وساعات بحس إني بكرهها رغم إني واثق إنها السبب في إني عندي تلعثم، شخصية صعبة جداً متعرفش تتعامل معاها إزاي، ولسانها طويل وصوتها عالي, بتخاف علينا بجنون وبشكل مرضي جداً، أظن عندها وسواس قهري لدرجة إنها بتخاف تعلّي المروحة وهي نايمة عشان متقعش عليها، خناقاتها مع بابا من زمان جداً ولسه مخلصتش لحد دلوقتي، هما مش متفاهمين خالص رغم إن جوازهم بقاله أكتر من 30 سنة، لحد اللحظة دي خناقتهم بتكون بلسان طويل وصوت عالي وساعات كمان مد إيد، أيوة لحد اللحظة دي بيتعاملوا مع بعض كده, ماما شخصية تقريباً مبتفهمش في أي حاجة غير حاجات بسيطة جداً لكن عندها إحساس إنها فاهمة في كل حاجة وحاسة إنها بتفهم أكتر مننا بكتير لأنها أكبر مننا (كل خبرتها في الحياة وظيفة حكومة ملهاش أي لازمة ومفيهاش شغل، لكن ده محسّسها إنها أحسن من إخواتها البنات لأنهم ربات بيت، ولأنها طلعت حج بفلوسها) وتقدر تدّي نصايح في أي حاجة، ولو مسمعتهاش تبتدي تغلط وتعلّي صوتها، وقليلة الذوق شوية، ومتسلطة لحد كبير، كل ده بتعمله بعبط مش لأنها شخصية قوية.
 
أخويا عمره 30 سنة، للأسف خد كتير جداً من ماما، طلع شخص قليل الذوق ومعندوش صحاب، وبيقول كلام مينفعش يتقال، وعنده إحساس إنه أعظم شخص في الكون وبيفهم أحسن من أي حد، عنده آراء كتير شاذة وعبيطة بس علاقته بماما طبعاً أحسن مني بكتير، هو بيقدر يضحك عليها لأنه شخص وصولي، وأنا صغير كنت متعاطف معاه لما مكنش معاه فلوس ومش لاقي شغل، لكن لما كبرت وهو كبر وقدر يعمل فلوس شخصيته اتغيرت وظهر إنه شخص أناني ميهمُّوش غير نفسه وبس على حساب أي حد, بيعشق يتكلم على الناس ويقلّل منهم عشان يحس إنه أحسن منهم، اكتشفت إنه مش بيحبلي الخير وكان مضايق لما دخلت هندسة، وكان بيحاول يشتت تركيزي وأنا بذاكر لما دخلت الكلية، وكان دايماً بيسفّه من التعليم والشهادة وكل الكلام ده، دايماً الناس بتقارن بيننا وإني إزاي أنا أعقل منه وهادي عنه. علاقتي بيه سيئة جداً طبعاً، أنا وهو مش شبه بعض خالص.
 
باختصار إحنا عيلة مفضوحة في العمارة, أنا بطّلت أقعد معاهم خالص ودايماً قاعد لوحدي أو قاعد مع صحابي. التلعثم ساعات يظهر وساعات لا، لكن لازم يظهر وأنا بتكلم لكن شدة التلعثم بتختلف. أنا مش قادر أشتغل بسبب التلعثم، اتعلمت إنجليزي وعارف إني قادر أتكلم وأعبر عن نفسي بيه صح وأشتغل بيه لكني مش عارف بسبب التلعثم.
 
وأنا في 3 إعدادي رحت لدكتور في مستشفى توشيبا لكنه كان مُحبَط جداً وقال لي "اتأخرتوا في علاجك وبسبب كده أنت تعودت تتكلم بالأسلوب ده" طبعاً بسبب كده بطلت أروح لأنه مفيش أمل على حسب كلامه.
 
بعدها تابعت فترة وأنا عندي 20 سنة مع speech therapist في مستشفى الدمرداش لكن مجبش نتيجة برضو،
فضلت حوالي 6 شهور أو أكتر لكن مجبش نتيجة في النهاية وبطلت أروح السيشنز. أنا محتاج حل ضروري.
24/6/2020