|
| 
|
من وسواس لاكتئاب لقلق متعمم م20
السلام عليكم
د. وائل.. يارب تكون بخير اللهم امين، وأرجو أنك أنت فقط ترد على الاستفسار. عندي أفكار بتدور في رأسي ومُشَتِّتَة.
حضرتك قولتلي "كثيراً ما تكون عدة اضطرابات متفرقة أفضل من اضطراب واحد مكتمل المعايير" وبعدين في يوم تاني تقولي "عارف مشكلتك الوحيده إيه؟ أقولك إيه؟ تقولي لاقط من كذا حاجه!" أفهمها إزاي دي لأنها لغز بالنسبالي معلش! أنا حالتي أي واحدة فيهم؟
حضرتك بتقولي "فيه حالات أسوء مني مش بياخدو علاج!" أمال أعطتني علاج ليه طالما فيه حالات أسوء مني مبتاخدش علاج؟
حضرتك بتقولي "اللي عندك خلطة قلق واكتئاب" وقولتلي معناها "إنك معندكش وسواس قهري بمعني وسواس قهري، هو قلق وظهر بصورة وسواس قهري" ممكن أفهمها إزاي دي؟ وكمان قولتلي "حتى الرهاب الاجتماعي اللي عندك مش مرض الرهاب الاجتماعي!" أمال اللي عندي إيه؟ والقلق المتعمم ده إيه؟ مبقتش فاهم أي حاجة في أي حاجة أقسم بالله العلي العظيم.
حضرتك بعتلي لينك التواكب المرضي بين الوسواس والرهاب وخطورة الانتحار، أنت بعتلي اللينك على أساس إيه طالما بتقولي مش ينطبق عليا؟ وبتقولي "لازم الاضطرابين يكونوا مكتملين المعايير" أمال بعتو ليا ليه؟ عاوز أفهم بس معلش.
حضرتك قولتلي "الوسواس القهري عندي مكنشي مكتمل المعايير" وفي رسالة صوتية تقولي الوسواس القهرى عندي كان مكتمل المعايير! أفهمها معلشي.
حضرتك فيه دكتور في الموقع قال "إن المرض اللي عندنا اضطراب نفسي جسيم" وبعدين أنت رديت عليّ وقولتلي "حالتك مش جسيمة يا أحمد مادُمنا نتحدث بعيد عن المرض، شخصيتك مش كده" هو المرض جسيم والشخصية حاجة تانية؟ مش فاهم حاجة، هو جسيم؟ ولا مش جسيم؟ ولا حالتي أنهي فيهم؟!
حضرتك بتقول لأهلي أحمد معندوش حاجة! أمال المعاناة اللي أنا فيها إيه ؟! وأنت متفهم كلامهم تماماً وبتقولهم "حالته درجة أولى مرض!".
هو الخلاصة كده مرضي له علاج؟ ولا ملوش؟ علشان أرتاح خالص يمكن ربنا ياخدني أقسم بالله ونرتاح.
في النهاية هل نفس حالتي دي في ناس فعلاً تم شفائها تماماً؟ أكيد بالفعل؟ وإزّاي؟ وعملوا إيه علشان أعمل زيهم؟
يارب ارزقنا الشفاء وأرتاح لأني تعبت من مرض قذر زبالة زي العدو القذر اللي عكنن عليّا حياتي ومش فاهم ليه ولا عارف اتعامل معاه! لكن الحمد لله على كل شيء.
بشوف ناس كتير تكتب "الحمد لله الذي عافانا مما ابتلي به كثيراً من خلقه" الدعاء ده بيزعلني أوي، هل ذنب الشخص ده يكون مريض والشخص التاني يكون سالم معافى؟ ليه ده نصيبه أسود والتاني لا؟ هل طبيعي ده يعيش سعيد والتاني حظه أسود؟ ليه كده؟
ياريت يكون لينا علاج، ولو أني أقسم بالله أشك أصلاً أن المرض النفسي له علاج، لكن لله الأمر.
هل المرض اللي عندي ده فيه خلل عضوي عندي ولا مفيش؟ ولو فيه بقولك "أعمل أشعة" تقولي "مش هيظهر حاجة" أمال الخلل فين بالظبط؟ وليه مفيش عمليات بتتعمل؟ يعني الطب توصل لكل حاجة ووقفت علينا إحنا؟!
مفترض من كلامك إن معاناتي كوكتيل مريت بيه (وسواس قهري، قلق متعمم، رهاب اجتماعي).
نسيت صحيح أقولك إيه الاكتئاب العضوي اللي قلتلي جالي ده كمان؟ هل مرض جديد ولا ضمن المجموعة والكوكتيل الأسود ده؟
قولتلي أيضاً لما بقولك "ساعات مبحسش بنفسي" قولتلي "اختلال الآنية، بس مش عندك المرض ده بمعناه الصحيح" أمال إيه اللي عندي ده كمان؟ مش فاهم بصراحة!.
كل واحد ونصيبه، ودنيا وبنعشها، لكن حتى المرض النفسي بالنسبة للمجتمع وصمة عار رغم إن _أقسم بالله_ بيعانوا أكتر من مريض السرطان نفسه.
تحياتي.
10/8/2020
رد المستشار
شكراً على متابعتك الموقع.
تم تحويل استشارتك لكي أجيب عليها، وسأفعل ذلك. مسار الاضطرابات النفسية عموماً هو:
١_ مسار حميد وشفاء تام بعلاج أو بدون علاج٬ ولكن عدم العلاج يؤدي عموماً إلى انخفاض عتبة الإنسان للإصابة باضطراب نفسي في المستقبل، وهذا المسار الطولاني هو فقط للاضطرابات الغير ذهانية مثل: القلق والاكتئاب والرهاب.
٢_ مسار حرج يتميز بنوبات انتكاسة وهدنة، وهذا المسار بحاجة إلى متابعة طبية للسيطرة على تكرر نوبات الانتكاسة وعلاجها بأسرع وقت ممكن والوقاية منها، وهذا المسار ينطبق على الاضطرابات الذهانية مثل: الثناقطبي٬ الاكتئاب٬ القلق٬ والوسواس القهري.
٣_ مسار مزمن يؤدي إلى تدهور الأداء الوظيفي للإنسان تدريجياً، وهذا ينطبق على الأمراض الطبنفسية العضوي مثل: الفصام، والأقلية من الثناقطبي، والوسواس القهري.
٤_ مسار مزمن لأعراض غير ذهانية تشمل القلق٬ الاكتئاب٬ الوسواس القهري٬ والمراق... هذا المسار لا يصاحبه تدهور أداء وظيفي مثل المجموعة الثالثة٬ ولكن معاناة الإنسان عالية ويدخل في حلقة مفرغة من مراجعات طبية وتغيير العقاقير، ومثل هذا السلوك يتم تصنيفه بـ "حالة سلوك مرض غير طبيعي Abnormal Illness Behavior".
حالتك تدخل ضمن المجموعة الرابعة.
نصيحتي لك هي:
١_ تراجع طبيبك المشرف على علاجك فقط وبصورة منتظمة، وتضع ثقتك به.
٢_ تتوقف عن مراسلة المواقع الطبنفسية لأن المراسلات ترفع من شدة سلوك المرض وتدهور الأعراض.
وفقك الله
ويتبع>>>>>> : من وسواس لاكتئاب لقلق متعمم م22
تعليقات الأعضاء