خفة دم ويمكن قلق لكن وسواس لا ؟ م

خفة دم ويمكن قلق لكن وسواس لا ؟
مساء الخير
 
الحمد لله والشكر ... والشكر لك لردك علي يا دكتور وائل وأنا عاوزة بس الدكتور وائل هو نفسه يرد عليّ دائما
 
أنا سعيدة "الحمد لله" مش وسواس بس زعلت شوية لإني مبيقتش من موسوسينك "بهزر" بس يلا المهم أكون مجنونة من عالم مجانين وأعتقد ثابت جنانا ! وبتهيألي شهادة سيادتكم بإني عرفت أشخص ينفع على كده أشتغل "دكتورة نفسية" يمكن صعبة شوية نخليها ممارس أو متمرس أعتقد متمرس الأصح .... أوكي متمرس بالطب النفسي ومدام حضرتك شهدت لي يبقى خلاص وخصوصا وأنت حكيم المجانين وأبو الموسوسين وسيد العاقلين .. ودي شهادة إن كان صح فيعود فضلها بعد الله لك ولموقعك وفريقك الذي عرفنا وعلمنا إزاي نواجه الواسواس ونديله بالشلوت ...مع أني مبحبش أي حد يرد لي غيرك حضرتك مستشاري الوحيد .دكتور وائل أنا بحب مجانين جدا وكلكم خير وبركة الحقيقة، فإنت الي عرفت تعلمنا وإن شاء الله نكون عند حسن ظنك ونرد تعبك ومجهودك بإننا نتعلم صح ...نفكر صح ونكون مسؤولين عن خيارتنا ونختار بشكل صح ..فشكرا سلفاً.
 
 مبدئيا كنت أتمنى تحط لي شرح منك مثلا أو روابط عن القلق المتعمم عشان آخذ فكرة عنه الفترة اللي فاتت تعبت شوية والحمد لله قدرت أعرف أتعامل معه كويس وحتى لو كان وسواس لإني ترددت أكتب لك خفت تغير تشخيصك وتقول لي لأ ده كده وسواس"أتمنى متغيروش" !! حتى بعد اللي أقوله هو الحقيقة كنت نايمة متممدة بالهول قدام الـ tv ونمت وفجأة وأنا نايمة بس مش داخلة بالنوم بعمق يعني مش حلم ...لأ لأ لإني حسيت ووعيت زي ما يكون بعد الشر بعد الشر مت وزي ما يكون بيدفونني وبسمع صوتهم وهم بيسيبوني خفت جدا وكأني بشوف نفسي من بعيد وفي اللحظة دي بلف ابني كان ورايا حضني فخفت أكتر !! (وأنا بكتب كمان حسيت افتكرته وازدادت دقات قلبي وأهملته وراح الحمد لله) قمت وربنا ألهمني أكتب أبحث بجوجل وقررت مخافش وأواجه وأنا طبعي كده أواجه خصوصا بعد ما قرأت ردك السابق متتخيلش استرحيت أد إيه وكمان بطلت أخاف وأخذت سكرين شوت بالموبايل لردك الجزء الأخير بالتحديد وبقيت كل ما أتعب أو أخاف أشوفه
 
والحمد لله عدت مبقتش أخاف من السكينة حتى الكبيرة لما أستخدمها بالطبخ مبخافش وسبحان الله راحت الفكرة تماما اللي كانت بتيجي تقول لي إنت هتقتلي حد فيها الحمد لله بجد..بس فيما عدا اللي حصل بعدين المهم بحثت ونتيجة البحث كانت عبارة عن استشارات نتية بس مش بموقعكم الكريم وكان الرد أن ذي وسوسة من الشيطان الرجيم لعنة الله عليه عشان يعكر صفو الإنسان وهي كانت استشارة مقاربة تقريبا لمشكلتي ورد الدكتور كان مريح لي وكانت النصيحة هي التعوذ من إبليس لعنة الله عليه فارتحت على طول وكمان بعمل التدريب الآتي :  أتنفس 3 مرات وبعدين أقول أوكي أنا مت واللي يحصل يحصل يعني أواجه وأفضل أحط تصورات من خيالي ..قلت طب ما كلنا هنموت عادي ربنا أرحم الراحمين وهكذا والحقيقة أفادني جدا والحمد لله راح خوفي من الموت ألف ألف الحمد لله وبعمله مع أي فكرة وسواسية "سلبية" أو أي خوف من أي شيء وبس.
 
ده اللي حصل ومش عارفة إذا هتغير رأيك وتقول وسواس أتمنى فعلا أنك متقولش؟؟؟؟؟؟؟؟؟ عموما حتى لو قلت وتغير تشخيصك برضه أنا بعرف أتعامل معه ما بقيت متمرسة. وشكرا جدا
 ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاضل سؤال إذا كان مسموح هو مش لي هو لصديقتي بس هي متكوزة يعني دي مش أنا هي طلبت مني أسألك هي عندها مشكلة بالنوم مؤخرا لما بقت تنام بقت تتقلب كتير وزوجها بقى يألش عليها إيه المصارعة الحرة دي ...وو....إلخ والحقيقة موقف يكسف لأنها بدأت تتحرك أثناء النوم زي مثلا تضربه مش متعمدة والله بتكون في عز النوم فمرة يجيء له شلوت على لوكمية أو تزؤه فيقع ومعرفش والله بعمل ده إزاي مش فاكرة أي حاجة خاااااااااااااااااااااااااااالص من ده
 
وهي لما بتنام بتنام زي الطيارة مش عارفة إذا فهمت قصدي وعموما هي من النوع اللي بتحلم كتير أوي وكل أحلامها أكشن تحسه فيلم أكشن مش حلم هي بتحب الأفلام الأكشن أنا عارفة والحلم اللي حلمته وكانت زئت زوجها فيه وقتها حلمت إنها هي وزوجها بتجري من عصابة بتلحقهم وقدروا يستخبوا وبعدين خرجوا وعملوا خطة وقدروا يحاربوا العصابة وياخدو الفلوس وكانوا فرحانين وطبعا ده مختصر تفاصيل الحلم أكثر زي الجري والسرعة وحاجات ثانية زي إنها تعقد وتعمل الخطة هي لوحدها وتقفز وتعدي أنا والله دي قلقتني جدا معقول سبب تحركها أثناء النوم يكون سبب نفسي لا سمح الله ولا الأحلام ؟؟ أتمنى بجد ترد وكمان لما بتقلب على جهة ثانية هي الحقيقة ولدت أولادها الاثنين عملية قيصيرية فلما بتقلب بتضطر تشيل جسمها كله يعني ترفعه رفع وتحطه هي دي الحركة من قديم ومكانش أي إزعاج لزوجها بس يظهر نوع السرير وحش مش كويس ده تحليلي أعتقد وبالتالي سيادة الزوج بيصحى من النوم علما حسب وصفه القلبة على الجمب بتكون خلال ثواني يعني بيقول مبتلحقيش تقلبي فتقلبي تاني وكل قلبة بخضة هي مش تخينة على فكرة وزنها عادي الحمد لله وكمان هي نومها كويس بس هي بتحب الأفلام الأكشن والبوليسية التحقيق وكده وتحب تلعب إكس بوكس وتحديدا الأكشن والمغامرة بشخصيات بنات طبعا وكمان هي زي ما قلت أغلب أحلامها أكشن كده أو مثلا بتجري من حد أو حد بيجري وراها أو خايفة من حد.
 
فمش عارفة رأي حضرتك إيه ؟؟؟؟وتنصحها تعمل إيه ؟؟؟
هي متقدرش تروح لطبيب لأسباب خارجة عن إرادتها ؟ وشكرا جزيلا.
15/12/2020