وسواس الخوف من الزواج القرف من القضيب

الخوف من الزواج
 
السلام عليكم ورحمة الله وبركاته. أنا بنت مًقبِلَة على الزواج إن شاء الله، وعندي خوف شديد من الزواج، وخاصةً العلاقة الزوجية. ووجدت في موقعكم مجال لِطَرْح مشكلتي التي كان صعبًا عليَّ أنِّي أقولها لأي حد خوفًا من اتِّهَامي بأني قليلة الأدب. وأرجو أن تعذروني على الكلام اللي هكتبه، ولكن ضروري أعرف الحَلّ عشان الموضوع ميكبرش بعد كده.
 
أولًا: أحِبّ أعَرَّفكم إنِّي مُصابَة بالوسواس القهري من مرحلة الطفولة، وظَهَر بِشِدَّة عندي في مرحلة المراهقة لمَّا دخلت المرحلة الإعدادية، ومازلت بعاني مِنُّه، وحاليًا بتعالج منه. مش عارفة هل المعلومة دي هتفيد في استشارتي الحالية ولَّا لا، بس لَعَلَّ توضيحها يكون أفضل.
 
عندي عدة أمور أعتقد إنها السبب في خوفي الشديد، وربما قَرَفِي من العلاقة الزوجية:
١- أنا أَقْرَف بِشِدَّة من العضو التناسلي الذكري (آسفة جدًّا على صراحتي)، ومجرد شَكْلُه بيِقْرِفْنِي، وأنا كده من صغري، كنت لما أُعجَب بِرَجُل مُعَيّن وأفكر في الزواج به من باب التخيل، لما أفتكر هذا الشئ أرجع أقرف تاني. يعني جسمه كله مُتَقَبِّلَاه ما عدا ده، وطبعًا الزواج فيه علاقة، فأنا غير القَرَف بقا فيه شعور تاني، وهو الخوف من العلاقة دي.
 
٢- أنا كنت بمارس العادة السرية في طفولتي وأيام المراهقة، وتوَقَّفْت عنها منذ المرحلة الثانوية، ومرجعتش ليها تاني ولله الحمد، بس خايفة يكون الأمر ده أَثَّر على منظر المَحَلّ عندي فَبَقَا فيه اسْمِرَار في الشَّفْرِتِين الداخليتين وبعض التَّمَدُّد. وغالبًا كانت مُمارَسَتِي خارجية، بس في فترة المراهقة كان عندي حب استكشاف، وأفتكر إنِّي كنت بَدَخَّل إصبعي في فتحة المِهْبَل وأنا مُستَلْقِيَة، وفيه مرَّة حسيت فيها بالألم لمَّا عملت كده، فَخُفْت ومَكَرَّرتِهَاش بعديها، بس أنا كنت عملتها أكتر من مرة قبل كده وخايفة يكون حصل حاجة للغشاء، مع إنِّي مفتكرش ولا مرَّة إنِّي نِزِل مِنِّي دم، لكن أعتقد إن الممارسة الداخلية عند فتحة المهبل ممكن تأثَّر على الغشاء، وأنا خايفة من الفضيحة أو إنِّي أَخَيِّب ظَنّ أهلي فيَّا وأضَيَّع ثقتهم على حاجة أنا تهَوَّرت فيها وتصَرُّف خاطئ ارتكبته وأنا ندمانة عليه. وإن اطمأننت من ناحية الغشاء إنه سليم، هيفضل مَنظَر الأشفار عندي مشكلة، لأني خايفة إنها يكون منظرها غير طبيعي وتبقى فضيحة بردو، وخايفة يكون ملهاش علاج يرَجَّعها لِشَكْلها ولونها الطبيعي لأنَّها عضو مَرِن مش جِلد.
 
٣- إنِّي بِحُكم إنِّي مُوَسْوِسَة من الطفولة، عدَّت عليَّا فترة كبيرة وأنا عندي وسواس الطهارة، وكنت كتير بتخَيَّل نزول إفرازات مهبلية _أكرمكم الله_ أو بيحصل فعلًا نزول لها، وكنت دايمًا بغسل ملابسي الداخلية قبل الوضوء، وحصل التهابات كتير للجلد عندي في المنطقة وما حولها من الرجلين، والمكان بردو فيه اسمرار شديد يكاد يَمِيل إلى السَّوَاد بسبب الالتهابات المستمرة في الماضي، وأخشى بردو ميكونش ليه علاج يرَجّع الجلد لِلَوْنِه الطبيعي. ده طبعًا غير إنِّي كنت مش بهتم قبل كده بنظافتي الشخصية، وده زاد الطين بَلَّة. وحتى بعد ما بَقِيت أهتَمّ لون الجلد مرجعش لطبيعته، ومش عارفة بردو أعمل إيه.
 
٤- إنَّ الرَّجُل وَصَل لي فكرة عنُّه إنّ أهم حاجة عنده مُتْعَتُه، فهل دي فعلًا نظرة الرجل للمرأة؟ هل نظرته ليها على إنَّها أداة للمُتعَة بِغَضِّ النَّظر عن رغبتها أو عدم رغبتها؟ وهل أهم حاجة فعلًا في استمتاع الرجل العلاقة الزوجية؟ لأنَّ دي حاجة أنا مش بَحِبَّها وبَقْرَف وبخاف مِنْهَا وخايفة تِحْصَلِّي مشاكل كتير لو تزَوَّجت وأنا على هذا الحال.
 وعلى فكرة أنا بَقْرَف وبخاف بجد مش أدب مِنِّي مثلًا أو شيء من هذا القبيل.
 
أرجو توَجِّهُوني لطريق لِحَلّ المشكلة لأني خايفة يأثَّر عليَّا لما يتقَدِّم لي خاطب مُتَدَيِّن خلوق وأرفضه وأخسره بسبب مخاوفي دي. وأهلي مش هيفهموا إيه مشكلتي وقتها، وهيبقى شكلي وِحِش قُدَّامْهُم والكلام هَيِكتَر، وأنا عامَّةً تواصلي مع أهلي وعلاقتي بيهم مش وَثِيقَة، يعني تقريبًا مش بعَرَّفْهُم عَنِّي حاجة من مشاكلي الحقيقية وهمومي اللي بتأَرَّقْني، بس هُمَّا عارفين إنِّي عندي وسواس قهري وأخذوني لدكتور قبل كده وكتب لي على دواء، وأخذوني لمُعالِجَة نفسية بس أنا مَحرُوجَة أوي إنِّي أقول الكلام ده قدامها، وخايفة أفضح نفسي قدامها عالفاضي وتكون مش هتقدر تفيدني.
 
أنا عارفة إنِّي هقعد أوسوس، وهَنْدَم على إنِّي بَعَتّ استشارة على الملأ.
وأنا بعتذر لو كلامي فيه خروج على الآداب العامة.
4/6/2021