أغضب أعذب نفسي

 طب نفسي؟
 
 من فتره يمكن 5 شهور بدأت أحس أوقات بغضب كبير جدا، و دا بيخليني أفكر بطريقة عدوانية جدا عن نفسي، زي مثلا إني بغرز سكينة في إيدي،أو في ظهري وأشق عمودي الفقري بيها الحالة بتزيد مع الوقت والعصبية بتزيد برضو وفي الفترة دي بقى الموضوع إني كل يوم لازم يا إما أعور نفسي بسكينة أو أخبط إيدي لحد ما تنزل دم أو أعض إيدي لحد ما اللحم يتقطع، وأفكار ورا بعض سريعة جدا وكلها عن طرق إزاي أعذب نفسي، وتوتر، وأوقات وخز وتسارع نبضات القلب،
 
 • علاقتي مع أسرتي مش كويسة، أمي وأبويا أكتر وقت بشوفهم فيه في اليوم يمكن نص ساعة، قريب من أختي بدرجة بسيطة جدا أمي جالها اكتئاب حاد مرتين، وقبل كدا كان إدمان، وخفت ورجعت تاني دلوقتيي وأبويا برضو،
 
 • نومي غير منتظم، يا إما أنام فترات تعدي ال١٥ ساعة، يا إما أنام ساعتين، وفي الحالتين بواجه صعوبة في إني أنام، يمكن أقعد ٥ ساعات أحاول أنام، الشهية قليلة جدا، مش بحب آكل أي شيء وما بحسش بالجوع إلا نادرا، بس أوقات بحس بجوع شديد ومع ذلك مش بآكل.
 
 • شكاك جدا في كل الناس اللي حواليا، مبعرفش أثق في حد، ودائما بتجيلي أفكار إن الشخص دا بيتكلم علي ورا ظهري كلام مش حلو أو ممكن يكون بيكدب وهو بيكرهني وأفكار كدا،
 
 • بعاني من هلاوس بصرية، زي مثلا أشوف شيء أسود بيتحرك ووقت أرجع أبص مش بلاقي حاجة، أوقات بحس إن فيه حد قاعد معايا رغم أني لوحدي، أو إن مثلا حد قاعد يمشي في الأوضة وبيفتح رغم إني لوحدي في الأوضة والبيت كله نايم، أوقات بسمع أصوات كأن حد بيناديني، أو مجموعة ناس بتتكلم بس وقت أما أسأل الكل بيقول إنه مفيش صوت،
 
 الموضوع من وقت طويل لدرجة دلوقتي أنا اتعودت وبقى عادي بالنسبة لي، وأوقات بتفاجأ أنهم بيقولوا إني قلت كلام وأنا مش فاكر نهائيا إني قلته وباتصدم من الكلام دا،
 
 • مهمل شوية في نضافتي ونضافة الحاجات اللي تخصني، متعود أجمع حاجات ملهاش لازمة زي كراسة فاضية أو مقطعة، سماعة مكسورة، ودائما بشتري نوتبوك أو كراسات كتير وفي الآخر مش بستعملها أبدا ويا حد من أخواتي بياخدها، مثلي الجنس.
 
 • علاقتي مع عائلتي مش لطيفة، أوقات كتير بحس إنهم بيفضلوا أخواتي علي وأعتقد أنه حقيقة مش وهم، وبعيد عنهم خالص، في فترة بعد ما أنا تعافيت من الإدمان كنت قريب منهم نوعا ما، بس دلوقتي بقيت بعيد عنهم أكتر من الأول، طول عمري بعيد عنهم وقليل الكلام معاهم جدا،
 
 • اتعرضت لحادثتين طريق قبل كدا ،بس ماكانتش ليهم إصابات خطيرة أبدا، ضرب من أبويا وأوقات أمي وأختي لما كنت صغير،
 
 • عندي مكروب المعدة (المكروب الحلزوني) بنسبة عالية، ونقص حديد ضعف نظر،
 
 • الاكتئاب بدأ من زمن طويل جدا، تقريبا في عمر ال ١١، وبيزيد بالتدريج، والقلق نفس الموضوع، يعني مثلا أفكار سلبية طول الوقت، إحساس بإني مليش فايدة ومش بعمل حاجة ومحدش بيحبني، وشقلبة جدا بالنفس وكره للحياة والناس و لنفسي ولكل شيء، فقدان الشغف في كل حاجة حرفيا، كسل وخمول دائم، نوم كتير،
 
 أوقات بحس بالذنب إني مثلا عملت حاجة غلط لفلان وأروح أعتذر له كتير وأتأسف وهو أصلا مش بيبقى عارف أنا بتأسف ليه أو إني عملت حاجة غلط، بس دلوقتي شعور اللامبالاة دائم و مش بهتم برأي حد في أو بكلام حد، مبحبش أكلم حد لا سوشيال ولا في الواقع بحس بتوتر كبير جدا وبقالي ٥ سنين ما تعرفتش على حد في الواقع، وفي السوشيال سنتين.
 
 • أول مرة أنتحر كان عمري ٨ سنين تقريبا، حاول أخنق نفسي بس معرفتش، وبعدها شربت صابون بس برضو محصلش حاجة، ومحاولات كتير تانية، مثلا أدوية كتيير، آكل سم أو كدا، وأوقات جرح نفسي بالسكينة بس الجرح مش بيبقى عميق برضو،
 مش عايز أنتحر عشان مش عايز أموت كافر،
 
 • أحيانا بحس بانبساط زايد جدا زي حالات الشعور بالنشوة أو إني مثلا واخد مخدرات أو كدا، بيقعد لفترة طويلة، أوقات بحس بزيادة في الرغبة الجنسية بس أوقات لا، شكاك جدا بس أوقات برضو لا، أوقات بحس إني أحسن من الناس بس مش كتير يعني،
 
 • لو الوساوس هي الأفكار السليية فبيجيلي كتيير من فترة كبيرة وأفكار كتيرة جدا جدا جدا، ومش بتقف أبدا مهما حاولت أشغل نفسي بحاجة، ولو جيت أكتب مثلا، ملاقيش في حاجة أكتبها رغم كمية الأفكار اللي في رأسي، زي إن محدش بيحبني وإن فلان بيمثل إنه بيحبني بس في الحقيقة لا، وإنه بيقول عليا كلام وحش وبيتصنع قدامي، الموضوع بيأثر على علاقتي مع بعض الناس لأن دائما بيبقوا حاسيين يا إما إني بكرههم أو مش بأثق فيهم،
 
 بس فيه علاقات مستقرة جدا لأني بعرف أتحكم نوعا ما في الموضوع ومش بظهر لهم أي حاجة من الأفكار دي وبتعامل ولا كأن فيه حاجة،
ولكم الشكر
 1/8/2021