وسواس قهري ؟ لا وسواس مرض !

هو أنا موسوسة
 
أنا ماني عندي ١٣ سنة تربيت كأي طفلة عادية أما بقى عندي تسع سنين بابا ساب البيت لأنه عنده شغل في الغردقة (أو ده اللي ماما وبابا أقنعونا به أنا وأختي) كنت بروح لنينا مامة بابا وكان بيبقى موجود عادي أما بقى عندي ١١ سنة ماما وبابا رسميا اتطلقوا طبعا عشنا مع ماما وكنا بنزور بابا وبنكلمه عادي وعلاقتي به حلوة جدا
 
شهر مايو اللي فات وتحديدا يوم 3/5 تيتا ماتت أم بابا بعد تواجدها في العناية المركزة لمدة شهر ونص تقريبا بعد عملية جراحية في القلب في آخر شهر خمسة أنا بدأت أحس بوجع جامد في قلبي وماكنش في حاجة في غضون الشهرين اللي فاتوا كنت بحس بأعراض مختلفة مرة قلبي مرة بطني مرة زوري وهكذا يوم 20/7 توفي جدو أبو أمي وغير تيتا اللي أنا محضرتش عزائها رغبة مني في عدم رؤية الأسود إلا أن أنا كنت في محمصة عزا جدو بسواده ودموعه وتحسره
 
بعد انتهاء العزاء بكم يوم بدأت أحس بوجع في القفص الصدري وصدري وهكذا وكان الدكاترة بيقولوا أنه مفيش وأن أنا أبالغ وفي كل مرة من شهر ستة تقريبا بحس بألم بكتب على جوجل أشوف النتائج لو كان في كلمة سرطان أحس بالقلق ولو ماكنش أحس أنه عادي من كام يوم كنت بكلم بنت خالتي فيديو كول ببصلها كأني ببصلها وأنا على فراش الموت رغم إثبات تحاليل الدم والكشف أن أنا زي الفل أما قلت لماما قالت لي متدخليش في مرض نفسي واستغفري وسبحي ربنا وخلاص.
 
أنا بحس بـ panic أما تيجي سيرة السرطان أو الموت وفيه توتر وبسمع ضربات قلبي وساعات بحس برعشة ... ممكن حل ؟؟
(مع العلم إني أعتقد أن ده وسواس قهري)
24/8/2021