الفصام مرض مزمن لكن التعافي منه ممكن !

 ما تشخيص ابني!!
 
ابني عنده ١٣ سنة، وهو ساعات بيشعر أنه أصبح مخه زى مخ صاحبه وأخوه وأى حد آخر.... سواء مخ غبي أوذكي.... فبيقول لي بحس إن مخه بقى مخي، ويشعر أنه أصبح عنده نفس السلوك ويشعر أنه اكتسب هذا السلوك السئ اللي عند شخص ما زي صاحبه وأخوه وبيتضايق من الشعور ده.
 
(وشرح هذه الحالة أنه بيحس أنه بيصبح مثل شخص بيكره فيه صفة وخايف أنه يكتسبها، بيقول لى يا بابا أنا لما بشوف حد فيه صفة مش عجباني زي صفة الغباء والضعف فبخاف جدا إنى أكون زيه.... فبفضل خايف وأفكر لدرجة إني من كتر التفكير والخوف بحس إني أنا هو.... وبالفعل بيشعر بكدة حقيقي.... وتباعا لذلك بيشعر إنه تم تبادل الصفات بينهم.... يعنى ابنى امتلك الصفة السيئة التى بهذا الشخص مثل صفة الغباء مثلا وأن هذا الشخص حصل على صفة الذكاء ابني مثلا .... ولما يحدث ذلك بيشتكي ويقول لي الشخص ده سرق ذكائي مثلا وهكذا.... وده بيضايقه جدا وبيظل الإحساس ده لثواني وبينتهي.... والسؤال هنا.... هل الوساوس بتؤدي إلى الشعور الحقيقي بالمخاوف؟؟؟)
 
وتبعا لشعوره أنه أصبح الشخص الذى يكره صفاته بأنه بيبذل مجهود إنه يرجع لطبيعته وإحساسه بنفسه، كأنه يتخيل وضعية لنفسه كان عليها (مثلا كان قبل ما يحس بالشعور ده كان جالس على كرسي .... فبيستدعي هذه الوضعية والصورة التي كان عليها علشان يرجع لطبيعته ويحس بنفسه) وكذا مرة شعر كأنه يرى نفسه من خارج جسده.... كأنه كاميرا خارج جسده ليرى نفسه والأشخاص الذين بجواره.... ولكن هذا الشعور اختفى ولم يشعر به أبدا منذ ٦ أشهر وأكثر.
 
وساعات بيفكر بأفكار كتير وبيفكر بأشخاص عظماء وأذكياء ونتيجة تفكيره المتعمق أنه بيشعر أنه أصبح ذكي جدا وأصبح عظيم وأعظم منهم وبيشعر ده بجد للأسف، فبيحس أنه اذكى واحد فى الدنيا وذكي جدا جدا.... وساعات بيعتقد إنه ممكن يقرأ أفكار اللي أدامه، وأي شخص بيصادف إنه قال الأفكار اللي على باله فبيعتقد إن الشخص ده بيقدر يقرأ أفكاره.... فبقول له ليه بتشعر بكده .... فبيقول لي لأنه كذا مرة بيقدر يقول لي أنا بفكر في إيه.... وفعلا أنا كذا مرة خمنت صح هو بيفكر بإيه.... ولكن ده من فراستي معاه .... فشعر أني أستطيع أقرأ أفكاره .... بس اللي مش طبيعي إنه يشعر إني بعرف أقرأ أفكاره كلها.
 
(مع العلم أن الأحاسيس دي مش مستمرة .... ساعات بتجي له كذا مرة فى اليوم كلحظات.... ولما بيجي له الشعور ده بيكون مصدقه بجد .... والأحاسيس دي بتضايقه وبعد اللحظات دي ما تنتهي بيسألني هو اللي أنا بحس بيه ده صح يا بابا.... فبرد عليه إن ده إحساس خاطئ ....فبيشغل مخه ويقول لي فعلا أحاسيس خطأ بس لما بتيجي لي بحس يا بابا إنها بجد ١٠٠%)
 
وكان عنده وساوس وأفكار بتيجي له وبتروح زي فكرة تجيله متكررة إنه ضعيف ضعيف ضعيف وغبي ويقاوم ده بأنه يقول في نفسه العكس زي أنا ذكي ذكي وقوى. ساعات يقول لمامته أنتى أخذتي وشي ووجهي وإنه بيتخيل في عقله إنه بيلعب لعبة كان بيلعبها على الموبايل بالصور كأنها حقيقة في مخه، وقال لي وأنا قاعد معاه إنه حاسس إن أنت وماما جوة في الأوضة اللي جوة .... قولتله إزاى وأنا قاعد جنبك.... قال لي أنا عارف إنه مينفعش بس ده إحساس بيجي لي ماليش ذنب فيه.
 
ومرة قال لي إنه حاسس إنه عنده عقلين وإن مخه عبارة عن نصين وكل نص عبارة عن شخص وهوعبارة عن خليط بين الشخصين،  ساعات بيحس إنه لو معملش حركة معينة هيشعر إنه أصبح غبي لو منفذهاش زي مثلا يكون ماسك شنطة فبتجيله فكرة إنه لازم يسيبها علشان هي مخلياه غبي مثلا ولازم يلمس الكورة علشان مهارته متروحش.
 
وفيه جاكت لما بيلبسه بيشعر إن الجاكت فيه حشرات، بيقول إن الجاكت ده بالذات كبير وضخم وبلاقي صعوبة جدا إني أفتش فيه وأتأكد إن مفهوش حاجة.... فبيجيله الشعور إن فيه حشرات، علشان كده بتخيل من شدة الخوف إن فيه حشرات، وكان ساعات بيعيط لوحده بسبب تذكره لهذه الأفكار اللي بتضايقه، والحمدلله هو معندهوش هلاوس لا بصرية ولا سمعية، وكان مشتت التركيز ومش بيعرف يذاكر وأداؤه المدرسي قل جدا، وابتدى يشتكي من التجمعات إنه مبيكنش مبسوط يعني حسيت إن حصل له انسحاب اجتماعي
 
أنا وديته عند دكتور مخ وأعصاب ونفسية للأطفال ولكن هو ماذكرش عنده إيه إلا حاجة واحدة إنه عنده خلل في مادة في المخ
وإداله اتوموكس ايبكس ٢٥ مجم وده بتاع فرط الحركة علشان إحنا قولنا للدكتور هو شقي شوية ومش منتبه لمذاكرته ومش بيركز،  وحسنه شوية بسيطة وبعدين عرضته على دكتور استشارى نفساني ....عطاه باروكستين ٢٥ قرص صباحا وقرص مساء، توداسيدون ٤٠ مساء فقط
 
وجعله يبطل اتوموكس بالتدريج وهو بياخد باقي العلاج وبقاله الآن ٣٥ يوم مواظب عليه.... اتحسن بنسبة كبيرة جدا ولكن قلت أفكار إنه بيكتسب سلوك الأشخاص اللي بيكره صفة فيهم وبيحس إنه أصبح مثلهم.... ولكن قلت بشكل كبير جدا جدا.... وأثناء وهو بياخد الدواء ابتدت تظهر له أحاسيس أخرى ولكن بسيطة.... مثل أن لو حد اتكلم جنبه فبيشعر إن صوتنا بيتعبه وبيقول لو اتكلمتم جسمي بيوجعني مثلا .... وساعات بيشعر لما بياخد الدواء إن صدره طابق عليه
 
يا ترى هو عنده إيه؟ وهل العلاج مظبوط؟ وهل المرض مزمن؟
ويستمر العلاج أد إيه؟
27/3/2022