وسواس الكفرية : الذنب والخزي والدونية ! م

وسواس الكفرية : الذنب والخزي والدونية !
هل استسلمت للوساوس؟
 
السلام عليكم، أنا قريت دكتور كاتب إن ممكن مريض الوسواس إذا متعالجش، يفقد مقاومته للوسواس ويستسلم له، وأنا خايفة أن يكون اللي بيحصل معايا دا فقدان مقاومة ومعناه إني والعياذ بالله كفرت أكتر من مرة، دلوقتي يا دكتور أنا بقيت أحس إني بعمل حركات على الأفكار اللي بتيجي في عقلي.
 
بيجيلي سخرية أو استهزاء بالدين أو بالله والعياذ بالله، أنا عارفة حديث إن الله تجاوز لأمتي ما حدثت به نفسها ما لم تتكلم أو تعمل، بس أنا يا دكتور بقيت أحس إني بعمل، عمل بالجوارح وبحس إن ربنا هيحاسبني عليه طالما بقي عمل بالجوارح، يعني مثلا كنت بقرأ قرآن في القيام وجئت عند آية فالله خيرا حافظاً، ولاقيت جواي حاجة بتقولي هزي رأسك بالنفي، بدأت أتوتر وحاسة إني لازم أعمل أي حركة معرفش حسيت الإحساس دا ليه بس المهم إني أحرك نفسي ومهزش رأسي، حركت جسمي للوراء شوية بس لاحظت إني حركت رأسي ناحية اليمين وكأني كنت ههز رأسي يمين وشمال بالنفي، ومعرفش فعلا كنت عاوزة أهز رأسي بالنفي ولا ذا عشان كنت بقرأ في المصحف وأحرك رأسي مع السطور!
 
موقف ثاني، كنت بسمع محاضرة وعظية لمعلمتي، وقالت الذنب عيب في حق كل مسلم ومطلوب من كل مسلم ترك كل الذنوب والتوبة منها كلما وقع فيها، كلامها مفيهوش أي حاجة اهو!! طبيعي جدا وأي حد مش هيجي في باله ذرة فكرة أو هاجس، إنما أنا جاء لي اعتراضات وأسلوب مش محترم جوايا بيتكلم، فدخلت لمعلمتي أستفهم منها وقلت لها المطلوب مني أترك كل الذنوب كلها؟! طب الإنسان ضعيف وعارف إنه هيذنب، طيب التوبة بتحتاج مشاعر ندم وحزن، هل هنستشعر المشاعر دي كل يوم؟!
 
دا اللي قلته ومقدرتش أقول أكثر من كدا، الأفكار اللي جوايا كانت سخط ووحشة أوي يا دكتور، وأنا عارفة إن السخط والاعتراض كفر، لو قلت أنا متلفظتش بالأفكار دي وكلمت المعلمة بكل أدب وكنت حريصة متكلمش بأسلوب وحش وغير مهذب عن ديني، ألاقيني أقول طب ما دا المنافق بيعمله، بيكن الكفر بداخله وظاهره إيمان.
 
 موقف تاني، حصل مني موقف معرفش كان من التألي على الله ولا لا!! يعني أنا قلت جملة احتمال كبير تكون تألي على الله
 فلاقيتني جوايا بسخر من كلمة تألي على الله، سخرية من الله والعياذ بالله، وجت كلمة ضحك في بالي، وأنا والله ما كنت عاوزة أضحك دا حتى فكرة السخرية سخيفة ورخمة وكمان حرام أولا يعني، المهم لاقتني، بحرك شفتي بجنب كدا كأني هبتسم بس مكنتش ابتسامة، مش عارفة أوصف لحضرتك، ووأنا بحرك شفتي بجنب كدا استعذت بالله من الشيطان جوايا، وقلت إيه دا أنا كنت هبتسم!؟!!
 
فضلت مثبتة تعبير وشي شوية قلت جوايا لا دي مش ابتسامة لا، وفضلت أكررها أكثر من مرة وأنا مش متأكدة كانت ابتسامة ولا لا، وأجرب أكثر من تعبير وش، كان ذا؟ ولا كان ذا؟ طب كانت شفتي مرفوعة أوي كدا؟! طب هو الواحد بيبتسم بجنب إزاي!! كل دا بعمله قدام المرآة، لحد ما جبت أختي وورتها كل تعبيرات وشي اللي شاكة فيها، وقالت لي لا كلهم مش ابتسامة .... حتى قلت لماما برضه وقالت لي لا دا شكل حد قرفان أو مضايق، بس أنا حاسة إن جوايا كان عكس كدا، كنت عاوزة أضحك، بس لما موجة التوتر والقلق بتهدى بقدر أوصل لإحساسي شوية ... المهم إني معرفش ليه عملت الريأكشن دا من الأول ... ولا ليه هزيت رأسي وأنا بصلي في أول موقف حكيته لحضرتك، ومواقف زي دي كثييير.
 
كل يوم تجيء لي أفكار وألاقيني بعمل حركات بوشي ملاقيش ليها تفسير غير موافقة على وساوسي أو بحمل الحركات اللي بتصدر مني أثناء وجود الوسواس بحملها تفسير كفري دائما.. هو أنا كدا مقاومتي للوسواس بتقل؟ أنا استسلمت له؟
 
 ربنا هيؤاخذني باللي بعمله؟
 ولا دا ابتلاء وصبري وألمي أؤجر عليه زي ما معلمتي قالت لي؟!
 14/4/2022