الأخطاء المعرفية والاكتئاب : لاعقلانية مغرقة!

أريد علاجا لمشكلتي
 
أبدأ قصتي من البداية نوعا ما شو بقدر أحكي معلومات تفيد قصتي ... بالبداية أنا نشأت في أسرة كلها خلافات عائلية بين أبي وأمي ونعكس على مشاكل دايما بالبيت من ضرب لمسبات لتهديد وكل طفولتنا والمدرسة عشنا بحالة إنه أهلي راح يتطلقوا أو لا
 على الرغم من إنه كان محصولنا العلمي عالي ودرست بكلية الطب بالجامعة
 
أول ما تخرجت كأي بنت عنا بتتخرج بصيروا يتقدموا لها الشباب للخطبة ... أنا ما كنت أحس إنه مثل ما بدي ... طبعا بحكم تقييدات الأهل علي من كل النواحي فكانوا الناس يفكروني معقدة فاللي بتقدموا لي كانت فئة الشباب الغير مهتمة بحالها واللي مثل الزلام من ناحية الشكل والحياة إنه شغل وبدهم يتزوجوا مشان يكونوا أسرة وولاد إن شاء الله أكون وصلت الفكرة
 
 أنا بحكم شكلي الحمدلله جميلة وروحي اللي بدي شاب شخصية مثل البنات أخطب وأتزوج وأصير وأروح وأسافر وهيك ... فبيوم من الأيام تعرفت على شاب طبعا بدون علم الأهل وكان بس عن طريق النت وكان أول حب بحياتي كنا نحكي 24 ساعة مع بعض كان مثل ما بدي كان كل شيء بحياتي عوضني عن كل شيء ... تقريبا قعدنا سنة ونص مع بعض ويتقدموا لي عرسان وأنا أرفض لأني بحب ... هلا جاء الشاب اللي بحبه تقدم لي لكن للأسف أهلي رفضوه لأنهم شافوا إنه أقل مستوى من ناحية العلم والمادي ومقارنة في اللي كانوا يتقدموا لي ... من هون بدت معاناتي أكتر حاولت أنتحر مرتين لكن المرتين نجيت منهم ... طبعا الشاب راح وعملي بلوك من كل شيء ... وأنا دخلت بحالة اكتئاب وفقدت كل شيء مهما أوصف الحالة اللي مريت فيها بس أكيد لبنت حاولت تنتحر مرتين بتتخيلوا شو وضعي كان.
 
 أنا بنت قلبي كتير رقيق ما بتحمل طبعا كنت أتعرض لكتير ضغط من الأهل من ناحية مسبات من ناحية تهديد وأنا ما قدرت أحكي لحد إنه بحب لأنه عنا الحب محرم جدا ... طبعا بحكم إني وحيدة حتى لو أطرح هيك موضوع على أختي ما رح تفهمني رح تحكيلي فش حب وأي حدا بتخطبيه رح تحبيه شو ما كان وطبعا صاحباتي نفس الاشي ما حدا بيفهم كيف لما أحب وأتعلق ... فصرت أسمع للشيوخ على اليوتيوب وهيك وشفت قصص الناس مع الدعاء واللجوء لربنا ... وإنه كيف فيه أشياء مستحيلة عن طريق الدعاء بحصل عليها ... فصرت كل يوم أصلي وأدعي ربنا إنه يرجع هاد الشاب يحكي معي ويتقدم لي ويصير نصيبي ... تقريبا قعدت 4 سنين بدون يأس وأنا أدعي وأصلي وأرفض كل حدا بتقدم لي بدون ما أشوف لأنه قلبي كله عند هداك الشاب ... وبيوم فتحت حسابه فلقيته خطب فحكيت خلص ما بقدر أدعي لأنه البنت الجديدة مش ذنبها وأنا ولا عمري أذيت أو اعتديت على حدا
 
 فهون بدت صفحة جديدة وحكيت هلا لازم أتعب على شخصيتي أنه أتقبل حب جديد ... ورجعت لنفس القصة ... وطبعا بحكم إني كبرت شوي بالعمر وقتها كنت 28 وبحكم إنه طلعت علي سمعه إني ما بدي أتزوج وأني متكبرة فما كان فيه خطاب ... فحكيت أركز بشغلي وخلاص هيك نصيبي ... كانوا الخطاب صفر ولا حدا بتقدملي وحكيت ما بدي أرجع أعيد معاناة الحب لأني بتعب كتير إذا تعلقت بحدا ... قعدت فترة لحالي إلا شاب اجى بدو يحبني طبعا حاولت كتير إنه ما أحب وما كنت أرد على رسائله وأحكي له أنا ما بدي أحب وابعد عني وحكيت له بدك إياني تفضل اخطبني إذا وافقوا أهلي ماشي ما وافقوا ما بدي أتعلق من جديد وحاولت شهور وأنا أرفضه طبعا هو أصر كتير إنه بدو إياني وما رح يتركني وأقول له كلكم بتحكوا هيك قالي لا أنا غير ورح تشوفي ... وبحكم إني كنت لحالي وما في خطاب للأسف وسوس إلي الشيطان ووافقت واللي خلاني أوافق حكالي شهرين وبتقدملك ... ورجعت حبيت للأسف وهو يماطل في قعدت يمكن سنتين ... وأنا بس أحب خلاص ما بقدر أترك وبصير أصدق كل شيء بحكي لي إياه ... وطبعا من أول ما أحب بصيروا الخطاب ييجوا وبرجع أرفض بحكم إنه قلبي بكون كله عند اللي بحبه وبصير يحكيلي أرفضي رح آجي أخطبك ... وبعديها بدا يطنشني ويهملني وبعدها تركني لأنه المرة أهله ما وافقوا علي ... المرة هاي ما دخلت بحالة انتحار مثل أول مرة ... بس قلبي بنكسر بطريقة رهيبة بدخل بحالة اكتئاب بدون أكل بدون حركة بواسي حالي بالشغل كالعادة وضغط الشغل والله بس بعلم بالحال.
 
طبعا هون تقريبا كان عمري 31 بس تركني وسجلت بالماستر مشان أشغل حالي وصار عندي عقدة خوف من الشباب خوف من تأسيس أسرة خوف أني أجيب بنت وتكون مثلي وتعاني وما أقدر أحافظ عليها ... طبعا مجرد ما أقوي شخصيتي وأرجع نفسيتي ببطلوا الخطاب يتقدموا لي بصير أتمنى يتقدم لي شاب وأخطب مثل البنات وأكون أسرة بس ما حدا بتقدم لي صفر قعدت لحالي سنتين مين ما يبعتلي أعمل بلوك ما بدي حدا يدخل حياتي بدون خطبة لأني عارفة حالي قديش بنكسر ... صدقا كنت وحيدة لا صاحبات ولا أخت كل تركيزي بالشغل ... فأبدعت بشغلي ونجحت الحمدلله أنا طبيعتي كتومة لأني إذا فضفضت لحدا ما حدا رح يحس أنا شو بعاني ما حدا بملك مثل قلبي فما رح يحسوا رح يحكوا لي عادي هينا حبينا واحنا بنحب خطبنا لحدا تاني المهم اللي بيجي وبخطبنا بنوافق عليه وهيك أغلب المجتمع عادي بحبو تنين وتلات مع بعض وبخطبوا أي شاب تقدم وبعملوا للي بحبوه بلوك أنا مش مثلهم أنا إذا حبيت بصير إذا تطلعت على شاب أعتبرها خيانة
 
 المهم نفس الشيء صار عمري 33 تقريبا 34 وللأسف نفس الشيء شاب حاول بكل الجهود إنه يحكي معي ونفس الوعود ونفس كل اشي وأنا أحكي له هيك الكل وابعد عني أنا ما بتحمل وبتعب وبيأس ووووو بس ما حدا بستوعبني وأصر وأنا غير وأنا أبصر شو وبحكم إني لحالي قلت أجرب بلكي هالمرة تظبط وطبعا كالعادة أول ما أحب وأتعلق برجعوا الخطاب ييجوا ويتقدموا بس أنا قلبي بكون للي بحبه ونفس الشيء مرقت سنة وسنة ونص طبعا هلا عمري صار 35 سنة وهو أصغر مني ب 4 سنوات وطبعا لهلا مش متقدم لي وهاديك المرة حكالي أهله صعب يوافقوا بس هو بحبني وما رح يتركني بس لسا مش مأسس حاله  ... قبل أسبوع تقدم لي شاب أنا رفضته من عدة نواحي الناحية الأهم إنه أنا بحب وقلبي متعلق وبخاف من الفراق قلبي كتير بنكسر إذا تركت حدا سواء صديقه ولاحتى جماد إذا نكسر بعز علي عندي شكله مشكلة التعلق كل اشي بعز علي أتركه وقلبي بنكسر ... فكيف لما يكون شاب بحبه!!
 
أولها كنت أقول له بس يتقدم لي شاب أولها كان يقولي ارفضي هلا بقولي وافقي احنا لمتى بدنا نضل هيك ... بيقولي بحبك بس بيقولي أنا بعتبر حالي قاسية إذا أنا اللي تركت أنا مستحيل أترك وييجي الاشي مني بخاف أندم لأنه قلبي كله معه ... طبعا لو بدي أقسي قلبي وأتركه بخاف صرت أكون أسرة بخاف يطلع مش منيح وأندم بخاف أصير أحكي يا ريت لو ضليت مع هداك الشاب بلكي ظبطت وكان نصيبي وكمان بصير أحكي لو بدي أوافق مشان سنة الحياة بس ما بدي يكون نصيبي بالآخرة بحس من كتر ما قلبي استنزف إني بس بدي أتزوج مشان أسكت المجتمع مشان أبي وأمي يرضوا علي لأني عاله عليهم صرت بكل مكان بستحوا في قدام الناس بفتخروا بكل إخوتي إلا أنا لأني مش متزوجة وما وافقت على اللي بدهم إياهم وبعتبروني سودت وجهم ... طبعا أنا هلا داخلة بحالة اكتئاب خايفة من اليوم اللي رح ييجي وهاد الشاب يتركني تعبت من البكي وكسرة القلب وما في عنا هون مكان إني ألجأ لعلاج نفسي بعتبروها عيب بحكم إني دكتورة كمان إنه كيف بعتبروني قوية مع إنه هاديك شهادة أما أنا كقلب كتير ضعيف وبنكسر كتير ... رح تحكوا لي أشغل حالي مشغلة حالي كتير سواء بالشغل وقراءة الكتب وعندي حديقة بزرعها وعندي حيوانات أليفة طبعا دايما منتقدة بكل اشي بعمله.
 
بس أنا صار عندي عقدة من التعلق وهلا خايفة هاد الشاب يتركني بيوم وبدعي يا رب أموت قبل ما يتركني وما أريد أعيش الكسرة
وكمان لو شو ما اجوني هلا يتقدموا لي أنا ما بقدر أوافق وما بقدر أتركه وأكسر قلبه لأني بعرف المعاناة ... الشاب الأول الحب الأول رجع لي من كم شهر وبيقولي مش مبسوط من زواجه ومن زوجته وإنه لهلا بفكر فيي طبعا أنا قلبي انطفى ناحيته ... رح تحكوا لي رح تقدري تنسي هاد كمان صح بس شو بعد ما يصير عمري 40 وراحت حياتي بتكون!!!
 
نفسي بعلاج إني أقدر أقوي قلبي
وبعتذر طولت بس حاولت أختصر قدر المستطاع
18/5/2022