حصار معرفي أو وسواس قهري أنا تعبت ! م7

حصار معرفي أو وسواس قهري أنا تعبت! م6
 سيناريوهات في دماغي مش بتخلص
 
 من استشارات سابقة كثير متشخصة وسواس قهري وعندي perfectionism رهيبة، من شهرين تقدم لي شاب وقعدنا مع بعض رؤية شرعية وأعجبت بأخلاقه ودينه وهو أعجب جدا بشخصيتي وانبهر بأخلاقي وحفظي للقرآن وسماعي الدروس والدورات الدينية وأنا لقيته شخص طيب وبيصلي وحافظ القرآن فمن أول قعدة قلت موافقة، طبعا دا تسرع والمعالجة بتاعتي قالت لي وافقت بسرعة كدا، قلت لها آه
 
 ليه أنا وافقت بقى، لأن في أول رؤية اختبرت فيه كذا صفة أنا شفتها في خطيب قريبتي وكرهتني في الجواز وهو أن خطيب قريبتي متسلط ومش عايزها تاخد كورسات ولا تطور من نفسها ولا عايزها تركب مواصلات ولا تروح مكان من غيره ومش عايزها تشتغل وغيور جدا وبيفتح موبايلها وخلاها تمسح قرايبها على الفيس .. المهم أنا اختبرت فيه حتة الشغل وإن أنت توافق إني أشتغل قال لي معنديش مشكلة بس متجيش على صحتك، قلت تمام واتفقنا على وضع بعض المعايير في الشغل وهو إني مثلا من نفسي لو لقيت شغل فيه اختلاط هيوقعني في فتنة أو هيبعدني عن الدين هسيبه وإن مش هشتغل في شركات مثلا أخرج منها الساعة 6 المغرب وهكذا يعني
 
 ولكن كل كلامي كان مضمونه أنه ساب لي حرية الاختيار وإن احنا نتناقش في كل قرار بخصوص الشغل، ليه أنا بقول كدا لأن شُفت خطيب قريبتي بيقولها أنا اللي هقرر بعد الجواز أنهي شغل ينفعك ولا لا وكل لما تيجي تقوله على فرصة شغل يقولها لا دي مش مناسبة دي فيها وفيها وبمعنى أصح يحط لها العقدة في المنشار .. أنا مكنتش طايقة خطيب قريبتي دا وكنت مش بتمنى أبدا أرتبط بواحد زيه وكنت بكرهها فيه لأنه شخص معقد فأنا طول ما أنا قاعدة في الرؤية الشرعية بكتشف فيه هل هو متسلط ولا لا، كان كل كلامه عبارة عن طمأنة لي وأنا أعجبت بشخصيته بس كان فيه عيب أتمنى إني أعرف أهندله وهو إني كنت بتكلم كتير أووي أووي وكان هو بيسمع بس ودا غلطة كبيرة أنا عملتها
 
 المهم بعد لما روح كلمني ماسنجر ورديت وتمام قعدنا نتعرف على بعض أكتر وارتحت أكتر وأكتر، ولكن كان فيه حاجة أنا مش متقبلاها شكليا خالص ولكن من انبهاري بأخلاقه مفكرتش فيها خالص.
 
 ماما مبقاش عاجبها خالص وأنا إخواتي عمالين يقنعوني أن الرجل بأخلاقه مش بشكله واقتنعت بس بعد كذا يوم بدأت ترجع كدا لحتة الشكل دي أنا مش متقبلاها نهائيا كلمت الدكتور النفساني بتاعي قال لي دي من عند ربنا واحنا مش بنختار الناس بناء على شكلهم، ولكن بصراحة مكنش رد موفق خالص لأني اكتشفت أن لو مكنش الشخص مالي عيني بنسبة 100٪ مينفعش أوافق ولا ينفع حد يقنعني به أنا لازم أكون مقتنعة به .. المهم اتعرفنا وبدأ يطلع فيه عيوب وهو أنه مش قادر ياخد أي قرار ودائما آراؤه تتغير لما بيرجع لولدته وإن أهله مسيطرين عليه بشكل كبير .. أنا اترعبت وبقيت قلقانة حتى قلقي دا ظهرله جدا وبقى عمال يطمئني ويقول لي متخافيش أنا بستشيرهم بس ولكن لا لا مواقف كتير مش عارف ياخد فيها قرار فبدأت أحس إني لا .. اتقفلت من الموضوع والحمد لله اتفشكلت من غير خطوبة كنا لسه فى فترة تعارف
 
 حاليا أنا حالتي زي الزفت ودماغي مش بتبطل سيناريوهات وجوايا حالة غضب جامدة جدا، جوايا حالة غضب من إني إزاى كنت هتجوز واحد مش مالي عيني، وجوايا حالة غضب من الدكتور أنه إزاي كان بيقولي أن اللي أنت فيه دا وسواس وأن لو رجعت أخذت الدواء موضوع شكله هيهدأ معك بس كان فيه حاجة غريبة حصلت لي وقت التعارف وهي إني مكنتش عايزة أسمع رأي أي أحد هيشككني في شكله يعني قرايبي يقولوا لي متقبلة شكله من جوايا بقول لا ولكن أقولهم محدش يكلمني مش عايزة أسمع كان حصل لي حالة إنكار كان صعبان علي أنه كويس بس ازاي هفشكل الخطوبة
 
 ودلوقتي جوايا أفكار كتير مش قادرة أحدد هل هي وسواس ولا حقيقة ومهتمة أوي كل فكرة تجيء لي عايزة أطمئن هي وسواس ولا حقيقة لدرجة وأنا في الموضوع دا كنت عمالة أقول طيب يارب تفكيري يكون وسواس مش عارفة أنا حد زيي كدا في النقطة ذي ولا لا؟ بقيت أتحجج بالوسواس حتى ولو الأفكار اللي بفكر فيها حقيقية
 
 جوايا غضب أن الشخص اللي كان متقدم لي بعد لما وافق على الشغل رجع قالي أنا حاسس إنك عايزة تحققي حاجات كتير وعايزة تاخذي كورسات كتير وبتفكري في نفسك وبس، معنديش ثقة في حد دلوقتي، بيحصل لي حاجة غريبة بقى ومش قادرة أوقفها إني بعمل سيناريوهات إني قاعدة مع شخص رؤية شرعية وبحكي وبتكلم في مواضيع وهو يرد عليّ وأنا أتناقش بجد مش قادرة أوقف السيناريوهات دي وحتة التسلط دي والطاعة للزوج عندي فهم غلط لها وإني مبحبش حد يتحكم فيّ والقرف دا .. عندي مواضيع فيها تفكير ثنائي كتير، فيه مواضيع زي الشغل والتسلط بتقلب معايا بعند شديد جدا، اللي هو لما ارتبطت بحد رافض شغلي هرفضه فورا.. أو لو ارتبطت بحد متسلط هرفضه ودا فعلا بيحصل لأن بقعد أقارن نفسي وأقول فلانة جوزها مش متسلط وسايب لها الحرية أنا أتجوز واحد متسلط ليه
 
 قراراتي انفعالية ومتطرفة تفكيري ثنائي دائما، دايما بقارن نفسي باللي حواليا وبحب أسمع تجارب أصحابي علشان أكتشف أن كل اللي مخطوبين لهم فيهم عيوب وإن مفيش حد كامل بسأل كتير أوي وبقعد أسأل الناس في تفاصيل علاقاتهم بغرض الاطمئنان لما ببقى قاعدة مع ناس بتحكي على علاقاتهم بيدور في دماغي أفكار كتير مش بقدر أقفشها بجد تعبت جدا، مش عارفة أنا السيناريوهات دي هتقف إمتى مش عارفة السؤال الكثير المبالغ فيه والاطمئنان هيقف إمتى!!!
 
 تعبت من الكمالية وتعبت من المقارنة وتعبت من السيناريوهات اللي مبوظة تركيزي
 ممكن حضرتك تحلل الحالة اللي أنا فيها لأني تعبانة جدا
 21/7/2022