|
| 
|
إصابات الولادة والوسواس: المهم العلاج يا ناس! م8
الحمدلله على كل حال
السلام عليكم ورحمة الله يا دكتور وائل، أنا كنت عارف أني بعد أيام من الراحة من الوسواس والأفكار وإحساس الواحد بالطمأنينة لازم يحصل حاجة... بس مكنتش أتوقع إني الموضوع دا يرجع لي تاني بكمية القلق دي!!
البداية كانت لما كنت قاعد بقلب في الفيس عادي وافتكرت واقعة اللعب الجنسي اللي حصلت في الطفولة مع ابن خالي اللي أصغر مني بسنة كنت قلت عليها لحضرتك يا دكتور قلت لي إن دا شيء طبيعي وفعلا أنا نسيتها من بعد اليوم دا، بس المرة دي افتكرتها بتفاصيل أكثر، وهي إني كنت بعمل دور مؤنث يعني كأننا كنا بنلعب عريس وعروسة رغم أننا ولدين وأنا كنت بقوم بدور المؤنث!!!
ومش عارف إزاي رغم إني في نفس السن كنت بلعب نفس اللعبة مع بنت خالتي اللي كانت في سني وكنت ببقى العريس عادي وكنت بحب كوني ولد ومفيش مشكلة فمش عارف إزاي أنا مش عارف أنا بقول إيه بجد!! هل ممكن أكون كنت بعمل كدا بدون وعي مني ولا دا فيه مشكلة ولا إيه!! وبرضو مش عارف أقول إني متأكد من التفاصيل دي بنسبة 100 % بس لما بفتكر بحس أن دا حصل بجد وعاوز أعرف هل دا حصل ولا لأ لأني هتجنن!!؟ أنا عارف أن حضرتك يا دكتور مش هتعرف تقولي إن اللي حصل دا حقيقي ولا لأ بس عاوز أعرف هل ممكن الوسواس يخليني أحس أن في حاجات حصلت في الماضي رغم أنها محصلتش بالفعل؟
وهل اللعب الجنسي ممكن يخلي في ميول شاذة عند الشخص ويفتكرها لما يكبر، لأن من ساعة ما افتكرت الموضوع دا يجيء لي وسواس يقول لي أن الأفكار والأحاسيس اللي جائتني دي كانت ميول مش وسواس!!! رغم إني والله كنت كويس بقالي أكتر من أسبوع والأفكار والخيالات دي كانت شبه معدومة وكنت كويس بس مش عارف إيه اللي حصل، بعيدا عن إني عاوز رد مطمئن من حضرتك يا دكتور زي ما أنا متعود بس عاوز برضو عاوز حل إزاي لما أوقف الشك والحيرة اللي جوايا دي بعد كل فترة راحة من الوسواس
لأني كل مرة بحس أن كدا الوسواس خلاص هيروح وفجأة يرجع بنفس القوة
وآسف على تعبي ليك يا دكتور
26/7/2022
رد المستشار
الابن الفاضل "Ahmed" أهلا وسهلا بك على مجانين وشكرا على ثقتك، ومتابعتك خدمة الاستشارات بالموقع.
حضرتك في الطفولة كنت تمثل اللعب الجنسي وكنت تلعب الدورين وهذا عادة ما يحصل... وهو دليل على السواء ففي حال عدم توفر ذكر وأنثى يضطر أحد الطرفين إلى تمثيل دور فرد من الجنس الآخر... هذا أمر طبيعي وليست له أي علاقة بالشذوذ... أما الانغماس مرة أخرى في التفكير فيه تحت أي حجة فليس إلا انزلاقا مع الوسواس تستطيع إن أردت ألا تفعله لأن القصة كلها أتفه من أن تجهد نفسك محاولا التذكر ... والفخ أن ذلك لن يزيدك إلا شكا فيما تتذكر.
وبالتأكيد يا "Ahmed" ممكن (الوسواس يخليني أحس أن في حاجات حصلت في الماضي رغم أنها محصلتش بالفعل؟) هذا شكل شائع في مرضى وسواس الشك التحقق القهري و.ش.ت.ق .... والوسواس طبيعته أن يخدعك وأن يوهمك بانتهائه فقط لتفاجأ به مرة أخرى يصفعك من حيث لا تنتظر... واصل علاجك وتذكر ما قلته لك (عليك أن تتعلم من كل مرة تخفق فيها في إهمال الوسواس وتجاهله، وتتعلم أثناء العلاج ألاعيب الوسواس وحيله حتى تتمكن من مناجزته بنفسك إن عاودك بعد انتهاء العلاج.)
ومرة أخرى أهلا وسهلا بك دائما على موقع مجانين فتابعنا بالتطورات.
ويتبع>>>>>: إصابات الولادة والوسواس: المهم العلاج يا ناس! م10
تعليقات الأعضاء