|
| 
|
هل هذه الأدوية مناسبة لعلاج الوسواس القهري؟
السلام عليكم ورحمة الله، بنتي عندها 14 سنة. وحيدتي مالهاش إخوات ووالدها مسافر مبينزلش إلا أجازات قليلة جدًا يعني تقريبًا متعرفوش إلا من الصور والحوار بينهم معدوم، الأب نفسه جاف عاطفيًا ومش بيحاول يقرب من بنته... لما بيحاول يكلمها هي مش بتتجاوب معاه ومحملاه مسؤولية إنه مجاش وهي صغيرة وكارهة تكبر ودايما عاوزة تحس إنها لسة صغيرة وتزعل لو جسمها بدأ يكبر... وزنها 43 كيلو وهي ضعيفة البنية، متفوقة الحمد لله في دراستها
أنا بعمل من المنزل وهي كل حياتي مهتمة بيها ومصاحباها دايما ومش من النوع الشديد والقاسي بالعكس أنا تقريبا بحس إن هي اللي شخصيتها أقوى مني... البنت كانت طبيعية تماما لكن من سنتين ونص بالظبط بدأ يبقى عندها وساوس من ناحية النظافة والخوف من التلوث والخوف من التقبيل ولمس أوكر الباب وحاجات زي دي... استمر الوضع دا سنة وبعدها راح لوحده وجه بداله تدقيق في كلامي وتحقيق على كل كلمة تسأل قصدك إيه وبتقولي كده ليه لحد ما تطمن إن الكلمة عادية مش فيها معنى وحش ليها ودا كانت بتعمله معايا أنا بس وتتكسف تعمله مع حد تاني. بدأ التدقيق في الكلام يزيد معاه قلق ونوبات هياج وبكاء وصريخ لو ما اقتنعتش وتقولي دماغي هتفكر في كل دا إزاي أنا نفسي أفقد الذاكرة وتخبط على دماغها وكانت مع الانفعال الشديد بتكسر في حاجتي ومرة بالمقص قطعت هدومي وشدت خصل كاملة من شعرها والأكتر من كل دا أنها قعدت مرة 3 أيام بدون أكل وشرب عشان مستنية تخلص تحقيق في الكلام اللي ضايقها اللي هو بيبقى أصلا كلام عادي أو نصايح عادية بس هي ما بتقبلهاش.
كنت عايشة معاها في عذاب حرفيًا لا كنا بنعرف ننام ولا ناكل ولا نعيش حياتنا زي الناس. لو عندها مشوار أو درس كانت دايما تتأخر عنه عشان حركات بتعملها أو دوامات تفكير في دماغها. دايما كان عقلها مشغول ومش عاوزة إني أعمل أي صوت أو حركة جنبها. أهملت صلاتها ومذاكرتها كنت بخاف أتكلم معاها عشان الكلمة العادية ممكن تعمل مشكلة أيام وصريخ وغضب.
لما الوضع بقى كده أخذتها لطبيب نفساني بعد محاولات إقناع شديدة. الطبيب شخصها وسواس قهري. أعطاها في البداية نص قرص أنافرنيل كجرعة أولية ثم استقر على قرص أنافرنيل 25 مرة في اليوم وقرص أمبيرامين 25 مرة في اليوم وربع قرص أوباليكس مرة في اليوم... بقالها شهرين ونصف على هذا العلاج. الحمد لله الأعراض اتحسنت بنسبة 65% تقريبًا... بس لسة في بعض الوساوس الخاصة بالتلوث ولسة بتتعصب لو حست إني بكلمها بعصبية أو بطريقة مش عاجباها تثور وتنفعل وتشد شعرها تاني. أنا دلوقتي محتارة هل جرعة العلاج دي مش كافية ليها ولا محتاجة تتغير. الطبيب قال ان بنيتها ضعيفة عشان كدة استقر على الجرعة دي وعاوزها تستمر عليه كمان شهرين.
ولكن أنا سمعت إن جرعة أنافرنيل لازم تكون على الأقل 100 ملجم عشان تعطي مفعولها. محتارة أعمل إيه وخصوصا إن الدراسة بدأت والبنت بقت متحمسة جدا وبتذاكر تقريبا معظم اليوم وفرحانة إن تركيزها رجعلها بعد ما كانت في دنيا تانية ومش عاوزاها ترجع تنام كتير زي الأول وخايفة أطلب تغيير الدوا أدخلها في خمول ونوم وهمدان بعد ما نفسها اتفتحت للحياة والمذاكرة. أعمل إيه؟؟
ممكن تفيدوني بآرائكم
ولكم جزيل الشكر
7/8/2022
رد المستشار
شكراً على مراسلتك الموقع.
ليس هناك ما يثير الإحراج في الرد على استشارة تطلب التعليق على وصفة طبيب آخر ولكن رغم ذلك فإن لابد من التعليق على البعض منها. الصراحة لا أظن ان الموقع يتفق على مثل هذه الوصفة التي تحتوي على عقارين من نفس الصنف وبجرع ضئيلة٬ ومن ثم إضافة عقار آخر.
النقطة الثانية وهي الأهم بأن ظهور هذه الأعراض في هذا العمر يتطلب متابعة دقيقة للحالة العقلية من قبل استشاري في الطب النفساني لليافعين له خبرة في علاج هذه الحالات في هذه المرحلة من العمر. رغم أن الوسواس القهري اضطراب يظهر في هذا العمر ولكن أيضاً في هذه المرحلة من العمر قد تكون أعراضه مجرد ستار يختفي خلفه اضطراب آخر.
نصيحة الموقع هي راجعي طبيبا استشاريا في الطب النفساني.
لا توقفي العقاقير واستمعي إلى نصيحة طبيب آخر.
وفقك الله.
تعليقات الأعضاء