وسواس الكفرية: لا يغير حالتك الإيمانية م

وسواس الكفرية: لا يغير حالتك الإيمانية
 العقل السليم الغير مستقيم
 
 السلام عليكم ورحمة الله وبركاته، السادة الأفاضل شكرا جزيلا لكم على مجهودتكم الكبيرة. ببساطة أنا لدي مشكلة صغيرة ولكن معقدة أنا عقلي عدو لي ودائما أفكارى تهاجمني وتنعتني بأشياء سيئة أشعر أنه يوجد شخص داخلي عدو لدود لي يهاجمني في أي شيء إذا فعلت شيئا جيدا يقول لي أنت فعلت ذلك كي تثبت أنك شخص صالح ولكن أنت سيئ وإذا لم أفعل شيئا يقول لي أنت شخص سيئ لأنك لم تفعل.
 
 في بعض الأحيان هذا الشخص الداخلي يقول لي أشياء سيئة جدا عن أهلي وزوجتي وأقوم بتكذيبه ولكن في بعض الأحيان يتهمني في ديني أيضا فأضطر أن أرد عليه وأشتمه ليس بصوت ولكن داخل عقلي فأقول له غور في داهية أو عندما يتهمني بشيء بشع أقول له إنت عبيط يالا؟ وكنت كذلك فترة حتى فكرت في مرة هو أنا بشتم مين ومين اللي جوايا ده اللي بيتهمني ده أنا ومفيش حد جوايا وساعتها بدأت أشعر بالقلق أنا بكلم مين في دماغي.
 وبردوا عندى شوية تصورات مش حقيقية زى إن زوجتي هتضربني بالسكينة مع إني أنا متأكد أن ذي فكرة سخيفة بس بحس بقلق بسيط وبفضل أتخيل إنها هتيجي تضربني بالسكينة.
 
 وفي فكرة محرجة جدا وأنا عارف إنها تافهة بس ساعات بحس إني أذكى من أي حد وذكائي خارق وإني بضحك على الناس وبستغل ذكائي في إني أضحك عليهم مع إني صريح الحمد لله ولا أحب أن أضل إنسان. أيضا هذا الشخص الداخلي أو الصوت الذي في عقلي ده بيتهمنى في أي شيء بعمله لدرجة إني أصبحت مشتت مش عارف الصح من الغلط.
 
 ساعات بردوا بحس وأنا بصلي في المسجد لو حد عدى من وراء ظهري إنهم ممكن يضربوني أو يخبطوني وبردوا عارف ومتأكد إنها فكرة سخيفة بس بقلق وأنا عارف إنها مش حقيقية. طبعا كل ده في الحاجات العادية إنما في حاجات تانية زي الدين سيئة وبتتعبني جدا تتعلق بالايمان والصلاة بردوا نفس الصوت الذي في عقلي ده بيهاجمني، أنا حاسس إنه عدوي لأنه لما بيتكلم ببقى حاسس إني شايفه فى خيالي على إنه أنا بس بيفضل يشككني في نفسي أو مثلا وأنا بدعي أو بصلي يقول لي إنت عاوز تضحك أو إنت بتضحك وأضطر أكشر جامد عشان أبقى متأكد إني مش بضحك وأنا مش واخد بالي.
 
 أنا اتهلكت من كثر الأفكار وتعبت بحس بإرهاق جامد وحياتي أصبحت ليس لها قيمة وحاسس إني فقدت طعم الحياة. أنا آسف يا دكتور أنا عارف إن رسالتي مضطربة لكن أنا فكري مشوه وأحاول أوضح لحضرتك الصوت الذي في عقلي ده أو حديث النفس مش عارف ده إيه.
 
 آه في حاجة كمان أي فعل بعمله يعني لو بآكل وعادي يعني سبت الأكل من إيدي بسرعة الصوت ده يقول لي حرام فأضطر أشيل الاكل براحة وأحطه ثاني براحة عشان تأنيب الضمير. أو لما أتوضأ وأيدي تلمس الحيط أحس إني لازم أغسل إيدي لأن ممكن الحيط يكون مش طاهر أو أغسل إيدي بعد الاستحمام ولو لمست حاجة بعدها لازم أغسل حتى لو رجلي جت عند البانيو مثلا بحس باشمئزاز وأحس إن في وساخة جاءت عليّ ولازم أغسل رجلي وإلا ييجيء لي تأنيب ضمير وأحس إني مش نظيف. بس موضوع النظافة ده مش مشكلة كبيرة بالنسبة لي أنا كل مشكلتي في الأفكار لأنها بتهاجم شخصيتي وبتهاجم ديني وبتهاجم أهلي.
 
 وأخيرا على سبيل المثال في الجزء الأخير لأني كتبت أولا الأفكار بتهاجم شخصيتي وثانيا وبتهاجم ديني فعقلي دلوقتي بيقولي شفت إن الدين مش أهم حاجة عندك إزاي وإن شخصيتك أهم!!
 أنا كده بقى لي ٢٤ ساعة. وشكرا جزيلا لكم.
 22/1/2023