الفصام وحكة الجلد الخوف المرضي م. مستشار

الفصام وحكة الجلد.. الخوف المرضي م1
 السلام عليكم
 
 أنا شاب أبلغ من العمر 39 سنة. للأسف الشديد من وأنا صغير ولحد دلوقتي وأنا شخص جبان جدا ومنعدم بمعنى منعدم الثقة بالنفس. وكنت أُضرب بشكل يومي من زملائي في المدرسة وفضلت كده لحد ثانية ثانوي. الخوف كان ومازال يشلني بيجعلني مشلول غير قادر على الدفاع عن نفسي إذا تعرضت لمضايقات من أحد الأشخاص.
  
  وللأسف ورغم أني ذهبت لدكاترة كثيرة لم تتحسن حالتي يمكن كان الاكتئاب يخف قليلا فقط عند أخذ الدواء. الغريبة إن الدكاترة شخصتيني فصام عقلي.. أنا مشكلتي أني مش عارف إزاي أتخلص من ذلك الخوف وأكيد بيبقى باين علي لأني بسبب ذلك الخوف لما أكون ماشي في الشارع وموجود في مكان عام يوجد به ناس كتير. ببقى باصص في الأرض ومكشر يعني باين أني عبيط .
  
  للأسف أني مدرك لذلك ولكني مش عارف كيف أتخلص من كده. وتعرضت قبل كده أني حد خلاني ماشي في الشارع وخبطني في بطني جامد. لأني كنت ماشي باصص في الأرض ومكشر. وقبل كده تم ضربي على قفايا من زملائي لما كنت في المدرسة.. أنا تعبان جدا وللأسف مدرك لحالتي ولكني مش عارف إزاي ممكن أتخلص من هذا الخوف المرضي. أنا بخاف زي الطفل في عمر 5 سنين. يعني مثلا لو شوفت بوكس شرطة في الشارع أترعب جدا زي الأطفال. ده غير طبعا حالتي أني بخاف من الناس وبخاف بالأخص من الأطفال في سن الرخامة لأن دول بحس أنهم بيركزوا معايا وطبعا لما طفل في سن الرخامة يشوفني ماشي في الشارع باصص في الأرض ومكشر، ممكن أوي يشتمني ويضربني.
  
  وأنا الخوف ده بيشلني بيخليني لست قادر على أني أزعق لذلك الطفل وأضربه.. هل هناك حل إني أتحسن ولو قليل للأسف الدكاترة آخر واحد فيهم لم يعطيني حل وقالها في وشي بس مش ليا كان معي مرافق قالها له بس بالإنجليزي، أني معنديش مقدرة ولم يعطيني أي حل.
  
  أنا دلوقتي باخد دواء فينلاماش واسمه العلمي فينلافاكسين قرص صباحا ودواء ميرتيماش نص قرص بالليل
  ودواء دوجماتيل فورت 200 قرص مساءا
  17/4/2023