غربتي .. أعيشها مع زوج بخيل!

السلام عليكم ورحمه الله وبركاته

أحب أن أشكركم في البداية على ردودكم الحاسمة والصائبة في المشكلات الواردة إليكم وهو ما دفعني لإرسال مشكلتي لعلي أجد راحة لعقلي وقلبي لأن حقيقة غير قادرة على حسمها أو إيجاد حل نهائي لها، وأرجو أن تتكرموا وتسارعوا بالرد علي، وآسفة للتطويل.

أنا سيده متزوجة منذ عام تقريبا وعمري 23 سنه ارتبطت بزوجي وأنا بالسنة الثالثة وأنا بدرس بالكلية كان ارتباط تقليدي وكنت مش موافقة في البداية عليه ومترددة ولكنى وافقت تحت ضغط من والدتي وهو قريب لنا من جهة والدي وما كنتش موافقة نتيجة لما كنت أسمعه عنه من أنه بيعرف بنات وليه علاقات بالإضافة لأني كنت بسمع عنه أنه بيعمل مشاكل كتير مع والدته وعصبي لكن كان لماما رأي تاني أن كل شاب لازم بيكون ليه تجارب قبل الزواج ويعرف بنات وأن مستحيل ألقى راجل ماعرفش بنات قبل ارتباطه.

أما بالنسبة لمشاكله مع والدته فهي كانت ترى أنه والدته عصبية وهى اللي بتستفزه وأنه إنسان طيب جدا بس محتاج اللي يفهمه ويعرف يتعامل معاه وبالفعل اتخطبنا 3 سنين خلالهم لقيت أنه فعلا إنسان طيب وأنه بيحاول أنه يتغير علشان يرضينى وحسيت أنه فعلا بيحاول يكون أحسن وخلال الفترة دي حبيته جدا وارتبطت بيه جدا لدرجة أنه حتى لما كان بيتصرف تصرف بيضايقني وأكون عارفه أنه غلط كنت بتجاهل التصرف ده وأبرره كل غلطة وأطلعه في الآخر مش غلطان.

زي ما بيقولوا مراية الحب عامية وأنا حبيته لدرجة الإدمان لدرجة أنى ما كنتش شايفة حد في الدنيا كلها غيره ومهما كان بيعمل فيا أو يغلط بحقي كنت بسامحة لحد ما اتجوزنا وفات سنه على جوازنا خلال السنة دي أنا كنت حاسه أنه فعلا اتغير وإن كنت بلاحظ فيه بعض العيوب زي أنه أحيانا بيكدب علي وبحس أنه بيخبي حاجات علي بس كنت بعديهاله وبسامحه وحتى ما كنتش بعاتبه عليها. لحد ما فات 8 شهور من جوازنا وكنت حامل بالشهر السابع وكنا سافرنا لدولة من دول الخليج وبعد ما استقرينا فيها بعت عقد لأخوه الصغير، وجه وأقام معنا خلال الفترة دي، اكتشفت فيه حاجات ما كنتش شفتها فيه قبل كده، اكتشفت أنه بيفضل إخواته علي، وبيعاملنى على أني غريبة عنه، وأن هو وأخوه حاجة واحدة، ولقيته بيستخسر في كل حاجة، عايز ما يصرفش علي أكتر من أكلي بس وأي حاجة تانية لا.

وفى المقابل كل قرش يكون معاه زيادة يبعته لإخواته بالرغم من أن حالتهم المادية كويسة وأنى لما أطلب منه حاجة يرفض يجبهالي ما انكرش أني كنت عارفة من الأول أنه كده وأثناء الخطوبة لأنه عمره ما افتكرنى في مناسبة وجابلى حتى ولو هدية بسيطة بس كنت علشان حبي الشديد ليه بطلعله مليون عذر بالإضافة إن والدي ما كنش مخلينى محتاجة أي حاجة بالدنيا بس بعد ما شفت معاملته مع إخواته وإزاي ما بيستخسر فيهم حاجة وبيديهم كل مليم بيزيد عن فلوس أكلنا وما بيستخسر فيهم أي حاجة.

حسيت أنا قد إيه رخيصة عنده وإنه عمره ما حبني بس حتى بخله علي سامحته عليه لأني كنت لسه بحبه لكن بعد مده من جوازنا بالتحديد وأنا حامل بالشهر التاسع عرفت أنه بيتفرج على مشاهد وصور جنسية عرفت بالصدفة بس برده طلعتله مليون مبرر وسامحته وبدأت أكلمه بطريق غير مباشر وأفهمه وأحاول أصلح فيه وأطلب منه يحافظ على الصلاة وأفهمه إن أي حاجة هو بيعملها ابننا هيتعلمها منه وهيعملها هو كمان بس.

وأعتقد أنه بطل الموضوع ده فترة بس بعدها بمدة برده لقيت نفس الحاجات دي على جهازه بعد ما ولدت بمدة كبيرة واضطريت في النهاية أنى أصارحه وأوريله اللي على الجهاز وأنكر وادعى واحد من صحابه قعد على اللاب توب بتاعه وأنه أكيد هو اللي عمل كده ما كنتش مصدقاه وكنت متأكده أنه بيكدب وده لأن كل واحدة بتعرف جوزها كويس أوي وبتعرفه لما بيتغير وبتعرفه كمان امتى بيكون كداب وامتى بيكون صادق بس برده للأسف سامحته ودعيت ربنا أنه يهديه ويصلح حاله علشان خاطر ابننا على الأقل اللي جه الدنيا ومالوش أي ذنب في تصرفات أبوه.

ولأنى عارفة كويس إن أهلي مش هيوفقوا على طلاقي منه بسهولة وأنه حتى لو وافقوا واتطلقت منه هعيش معاهم كأني في سجن أو كأني عامله مصيبة ومفروض أني أموت أو أقضي بقية عمري محبوسة هو ده كان السبب الرئيسي في أني أصبر عليه بالإضافة أني مش عايزة أشوه صورته قدامهم أو قدام أي حد لأنه بالنهاية أبو ابنى المهم بعد ما سمحته.

بدأت تانى أحاول معاه أني أصالحه وبدأت أفهمه تاني وانصلح حاله تاني بس 3 أسابيع أو شهر بالكتير أوي ورجع تاني للأسف للموضوع ده وأنا المرة دي ما بقتش قادرة لا أسامحه ولا حتى أبص في وشه وفي نفس الوقت مش قادرة أقول لأهلي أني عايزة أتطلق منه لأني مش هقدر أقولهم على السبب أنا حاسة إن مفيش حل لمشكلتي دي غير أن ربنا يريحني وياخدني علشان أرتاح من الهم ده لأني لا قادرة أعيش معاه ولا قادرة أتكلم مع حد ولا أقول لحد.

وأنا دلوقتي عايشة معاه لوحدي في إحدى دول الخليج وماليش أي حد حتى أتكلم معاه علشان كده كتبت لكم علشان تساعدوني وتلاقولي حل أنا بجد تعبانة أوي ونفسي أموت علشان أريح نفسي من الهم وتعب الأعصاب اللي أنا عايشة فيه ليل نهار ده.

أرجوكم ساعدوني وابعتولي الرد بأسرع وقت ممكن لأن كل يوم بيعدي علي هنا لوحدي بالغربة وأنا ساكته بموت فيه 100 مرة
أرجوكم ساعدوني.
31/08/2023