حماتي سبب مآساتي

السلام عليكم
 
أنا اتجوزت في بيت عيلة كنت في الأول بعامل ربنا وبتقي الله في حماتي كنت بعمل كل حاجة ترضيها وكنت تحت رجلها كنت أنا من دون سلايفي كويسة معاها وكانوا سلايفي يقولوا عليها وحشة وأنا كنت بقول حرام عليكم مع الوقت اكتشفت أنها فعلا وحشة وبتفرق جامد بيني وبينهم لقيتها بتعامل اللي بيعاملها وحش زي الفل زي ماتكون خايفة منهم والكويس بتديه فوق دماغه وجاية عليه مهو كويس يستحمل بقا
 
 تقعد تخلي سلايفي مايخدموش وتحبهم ويصعبوا عليها وتديهم هما وعيالهم فلوس وأنا وعيالي أبدا ما تمد علينا حاجة بتستخسر فينا كل حاجة بعدين لما لقيت الموضوع كده بقيت أعاملها وحش ومابقتش احترمها وبقيت برد عليها زي سلايفي مابيعملوا .. وللأسف كانت بتشكي لجوزي وتخرب بيني وبينه مش متقبلة أني أعاملها وحش عايزاني قطة مغمضة زي ما كنت جوزي ماكنش بيتدخل بيني وبينها كان يقول انتوا ازعلوا واتراضوا مع بعض أنا ماليش في كلام النسوان ده
 
 وأنا كملت في اللي أنا فيه وبرضو مرجعتش أعاملها كويس وبعدين بقت تحترمني .. بس للأسف أنا زعلانة على نفسي .. زعلانة أني بعاملها كده مش أخلاقي ولا تربيتي هي أجبرتني أن انقلب كده
 
 أنا مش عارفة أعمل إيه هل أنا أرجع أعاملها كويس وتفضل هي تيجي عليا .. ولا أعاملها وحش وتحترمني وماتجيش عليا .. مهي كده أصلا مفيش وسط وربنا يسامحني على اللي بعمله ده مهما كان دي ست كبيرة وأنا مارضاش حد يعامل أمي كده فقولولي أعمل إيه
 14/9/2023
 
 وأضافت عبر صفحة اتصل بنا تقول:
 نفسي أعرف أنا كويسه ولا وحشة
 
 السلام عليكم مبدئيآ أنا متلخبطة ومش عارفة أبدء فأي موضوع لأنهم كتير .. بس هبدء الأول بموضوع ابني وعيال عمهم وباقي أطفال العيلة أنا واحدة كنت مختصرة وفي حالي خلفت ابني هو وبيبي كنت بخليه معايا مش بنزله بس دلوقتي عنده سنتين ونص لازم يختلط بالأطفال عشان ميبقاش منطوي ويتعرف على العالم اللي حواليه واحنا بلد أرياف يعني العيال بتقعد تلعب كلها مع بعض مفيش حد بيقعد في بيته .. بقى والده يقولي خليه يلعب تحت مع عيال عمه نزلته يلعب معاهم .. أهل الأطفال دول على طول بيقعدوا يقولو لعيالهم اضرب ده وتضرب ده حياتهم كلها ضرب والواحد لما يقول لابنه اضرب وكده دى شطارة وجدعنة منه يعني وهيطلع راجل ومايخفش
 
 أنا الأول كنت بقول لابني عيب أخوك ماتضربوش لحد ما حسيت أن ابني بقى بيخاف من العيال الأصغر منه وحسيت أني بمحي شخصيته .. لما أقوله عيب .. هو العيب دلوقتي في الزمن ده أن ماقولش لابنى عيب .. بقيت بقوله اضربه أي حد يضربك اضربه وأنا خايفة يحصله حاجة يضربوه جامد يتعور كده يعني .. أنا محتارة مش عارفة أعمل إيه أعلم ابنى الكراهية والضرب ولا أقوله عيب وألغي شخصيته ويطلع خايف من الأطفال اللي زيه وميعرفش ياخد حقه
 
 أنا نفسي أعلم ابنى القيم والأخلاق والصح والعيب لكن في الزمن ده بقى غريب وبقى لازم تعلم ابنك الحاجات الوحشة غصب عنك
 ادوني حل لأن الموضوع ده مهم جدا بالنسبالي
 14/9/2023