وسواس النجاسة في البنات: أكره دخول الحمام!

مشاكل في الطهارة
 
 أولا أرجو إطلاع شيخ موثوق ليعطيني فتوى بجانب الاستشارة حتى يطمئن قلبي بفضل الله. أنا مكسوفة جدا من اللي هقوله بس حقيقي أنا الحمد لله تعبت أوي بجد.
 
 الموضوع بدأ من حوالي خمس سنين مثلا. بقيت مش بعرف أستنجي. بقالي خمس سنين كل يوم وكل مرة بدخل فيها الحمام أستحمى بعد ما أخلص، لحد ما حقيقي بقيت بكره الحمد لله دخول الحمام، وبستنى لحد ما أكون مش قادرة عشان أدخل.. أنا بجد خلاص مش قدرة تعبت أوي أوي الحمد لله. اللي بيخليني أعمل كده هو إن أولا لما- اعذرني- أتبول بحس إن البول (ومش مجرد إحساس ذي حقيقة) إنه يسيل أو بيمشي على ظهر فخدي والمقعدتين، والشطاف طبعا مش بيروح لهم لأنه متوجه على السبيلين.
 
 ثاني حاجة في الحمام الإفرنجي أحس أن مياه الشطاف بتخبط في المياه النجسة اللي تحت وتخبط فيّ بعدها ومش بعرف فين ومش بعرف أغسلها.
 
 ثالث حاجة هو إني قرأت أن المرأة يجب عليها غسل ظاهر الفرج بس أما الباطن لا وإذا في مياه من الشطاف مثلا دخلت الباطن وبعديها خرجت كده تكون نجسة ولازم أستنجي منها، أنا مش عارفة أعرف إزاي الظاهر من الباطن وأحاول أققل ضغط المياه بس برضه بحس إن المياه بتدخل ولو قللتها أوي أحس إني مش طاهرة وبحس - اعذرني- بزي حموضة كده جوه فبحاول أحط مياه لحد ما الإحساس ده يروح، مش عارفة إذا وجود الحموضة دي ببقى أنا طاهرة بيها ولا لا، وإني بتنظفيها كده بدخل مياه في باطن الفرج ولا لا.
 
 رابعا مش بعرف أتطهر - اعذرني- من الغائط لأني عندي زي البواسير وأحتاج استخدام يدي وده اللي بعمله وأنا بستحمى وأنا قعدة، لكن في العادي مش بعرف أستخدم يدي ومياه الشطاف شغالة وإلا أخاف إني أتبهدل، وساعات مش بعرف أستخدم الشطاف مياه جامدة لإني ببقى مشروخة أو صائمة وخائفة مياه تدخل في الدبر.
 
 خامسا مش بعرف خالص أستنجي من الإفرازات أي حاجة عشان أحسها تحتاج مياه جامدة وأنا مش بعرف بسبب بخاف تدخل في الباطن، ومش بعرف أستخدم يدي عشان شفت إن مينفعش أدخل في باطن الفرج.
 
 هما الخمس حاجات دول اللي بقالي خمس سنين مش عارفة أعمل إيه جربت طرق كثير وبرضه مش عارفة ومش بعرف خالص أستخدم يدي والشطاف شغال وكل مرة أدخل فيها الحمام أستحمى وأغسل الحمام كله تقريبا وأخلع هدومي كلها، على حاجة مش بتاخد دقيقة. والله الحمد لله تعبت أوي.
 
 أرجوك أي رخصة تخليني أعمل حمام زي الناس وزي وأنا صغيرة. المشكلة إن المشاكل دول أنا مش شايفاهم وسواس لأنهم بيحصلوا، وأرجع أقول العالم كله يستخدم الحمام الإفرنجي ومحدش بيعمل كده وبرضه حرام أوي أوي كمية التبذير في المياه بالطريقة الرهيبة ذي.
 
 أرجوك أيسر حاجة والله تعبت رخصة أرجوك!!
 وأنا آسفة على ما قلته وشكرا.
 6/3/2024