استنجاء البنات: ظاهر وباطن وإفرازات!

وساوس في الاستنجاء والوضوء وأريد علاجا للوساوس
 
السلام عليكم ورحمة الله وبركاته، مش حابة أن أكتب بياناتي، أنا عندي وساوس مش فاكرة كانت عندي قبل كدا ولا لا بس مع بداية التزامي والموضوع ابتدأ يزيد وداخلة في ست شهور والموضوع بقي مرهق وبقي يومي أغلبه وساوس ويا دوب بصلي الصلوات الخمس وببقى مش قادرة أنجز حاجات تانية في يومي ولو أنجزت يبقى قليل جدا
 
 آخر حاجة وصلت لها وسواس الاستنجاء، وممكن كنت أقعد في الحمام مش أقل تقريبا من ثلث ساعة
 
 أنا شفت أكثر من رسالة في موضوع التفريق بين ظاهر الفرج وباطن الفرج وعاوزة أتأكد الذي فهمته صح ولا لا لأن تعبير كل ما هو ظاهر أثناء الجلوس في مثلا واحدة قالت إن فتحة البول والمهبل مش بتبان عندها أثناء الجلوس، فهل إن ظاهر الفرج هو لحد ما بين الشفرتين الصغيرتين وفتحة البول والمهبل من برا ومن جوا بقى على حسب امتدادهم كام سم هو ده الباطن؟ وهل اللي بيسألوا عن إن لو لمسوا أو دخلوا الماء لباطن الفرج قصدهم إنهم بيدخلوا صباعهم جوا مخرج البول وفتحة المهبل والشرج ولا حتى لمسهم من برا في آراء مختلفة من حيث يفسد الصيام ولا لا؟
 
 وأعتذر عن الإطالة يا ليت لو حد يشرح كيفية الاستنجاء الصحيح للمرأة لأني أقضي وقتا كثيرا في الحمام هل إني أنظف ما بين الشفرتين الصغيرتين ثلاث مرات بعد كدا ما بين الشفرتين الكبيرتين ثلاث مرات ولا ازاي لأني دورت كتير جدا واللي فهمته دلوقتي لحد متردو عليّ إني أرش مياه ما بين الشفرتين الصغيرتين بدون لمس وبعدين أنظف بيدي ما بين الشفرتين الكبار ثلاث مرات أو خمسة أو سبعة، أعتذر عن الإطالة والتفاصيل الزيادة لكن الموضوع تعبني وبقضي وقت كتير في الحمام
 
 ومعلش سؤال كمان أنا ينزل عندي إفرازات بس في أوقات متقطعة ومرة تكون كثيرة أوي ومرة تكون قليلة وبقيت بتوضي لكل صلاة هل ده صح ولا دي افرازات مش بتنقض الوضوء ولا إيه؟
 وعاوزة أعرف دلوقتي علاج الوساوس إيه يعني أنا فهمت إن علشان أعالج الوسواس في حاجة علاجها أن أتعلم عن الحاجة يعني مثلا عندي وسواس في الاستنجاء أتعلم الاستنجاء إزاي وأطبق وخلاص بس هل علاج الوساوس بيكون من كل حاجة لوحدها ولا عامة لأن خائفة أكون بعالج كل حاجة لوحدها بس أخلص من حاجة وأخش في حاجة فهل الطبيعي إن بعالج كل وسواس يجيء لي ولا المفروض إن معنى علاجي من الوسواس إن متعاملش مع أي حاجة في حياتي بوسوسة وإن المفروض موسوسش في أي حاجة
 
 ويا ليت لو دكتورة رفيف اللي ترد عليّ وعلي أسئلتي بالتحديد
 ومش إحالة لأسئلة سابقة وشكرا جدا
 26/3/2024