|
| 
|
هل أنا مريضة نفسية ولا لأ؟ جائز!
علاج اضطراب الشخصية الحدية
أنا بعت استشارة قبل كده، وكان تشخيصي أني غالبا عندي اضطراب الشخصية الحدية، وحبيت أتأكد فقريت كتب وسمعت فيديوهات كتير عنه وللأسف طلع عندي فعلا، فأول سؤال عندي هل ينفع أتعالج ذاتيا في البيت؟ ولا لازم أروح لطبيب نفساني، تاني سؤال هل فعلا في ناس اتعالجت منه ولا علاجه صعب زي ما قريت؟
فيه مشكلة كمان عندي غالبا مقولتهاش في أول استشارة.. أنا بنسى بطريقة صعبة جدا والأمر ده بدأ من وأنا في تالتة ثانوي، ممكن أقول حاجة وأرجع أقولها تاني كذا مرة وأكون ناسية فعلا، كمان بنسى مواقف حصلت في حياتي، بحس زي ما تكون دماغي ممسوحة مفيش فيها أي حاجة، لدرجة مرة واحدة بتسألني أنا في سنة كام بصيت لها شوية عقبال ما افتكرت، وأوقات في حاجات مش بفتكرها خالص أصلا، حتى في المذاكرة بقيت مهما أذاكر بنسى جامد بردو على الرغم أني مكنتش كده وأنا صغيرة، مع العلم إن في فترة تالتة ثانوي حصل معايا مشاكل كتيرة جدا في البيت وضغوط نفسية وارتبطت مرتين وبعدوا عني بنفس الطريقة وهي أنهم حبوا حد تاني أثناء ما احنا مرتبطين
وعندي مشكلة كمان أن تركيزي ضعيف جدا ممكن يكون حد بيكلمني وأنا مش مركزة معاه خالص حتى في المحاضرات مش بركز وأنا بذاكر بسبب أن صوت دماغي أعلى من أي أصوات حواليا، وعندي مشكلة أن دماغي مش بتوقف تفكير والأمر فعلا تعبني، دماغي هلكتني محتاجة أنها تسكت شوية شغالة ال24 ساعة تفكير وخناق مع أشخاص ضايقتني وأنا ماخدتش حقي منهم فبفضل أتخانق معاهم في دماغي وأقولهم كلام يجرحهم عشان أحس أني أخدت حقي
وعندي مشكلة أن لما حد بيأذيني بنسحب في هدوء من غير ما أعاتب أو آخد حقي أو أعمل أي موقف دفاعي عن نفسي، وبخاف جدا أن حد يتخانق معايا أو يزعقلي ولو ده حصل جسمي بيترعش وبحس أني متلجة وضربات قلبي بتزيد جامد، وعلى طول مبعرفش أنام بواجه صعوبة في أني أنام طبيعي بقعد وقت طويل جدا عشان أعرف أنام، ولو نمت نومي متقطع، وأوقات بأخد دواء أوبليكس بتاع الكحة عشان في نسبة منوم، بأخده عشان أرتاح وأنام ودماغي متفكرش، ودايما بحلم بكاوبيس وأحلام وحشة وخصوصا أحلام جنسية مثلية بكون أنا وواحدة صاحبتي مثلا أو واحدة قريبتي
وعندي مشكلة تعباني هي أني تفكيري جنسي بشكل غير طبيعي ومش قادرة أسيطر عليه أبدا، كل تفكيري في الراجل واحتياجي منه جنسي بحت، حتى في فترة التعارف تفكيري عنه بيكون جنسي وتخيلات جنسية وغصب عني لازم أنظر إلى عضوه الذكري من على الهدوم وبعمل كده مع أي حد ومبعرفش أتحكم في نظراتي، أنا واصل بي الأمر أني أكون بقرأ قرآن أو أذكار وبردو بتخيل تخيلات جنسية وبحس بإثارة جنسية، وبحاول أبطل العادة السرية وبعدين برجع لها تاني
حاليا أنا محتاجة أعرف تشخيصي إيه وإزاي أقدر أتخلص من كل المشاكل دي، وهل أقدر أتعالج لوحدي في البيت عن طريق كتب ونصائح ولا لازم أزور طبيب، وإزاي أقدر أتعامل مع الشخصية الحدية وأتعالج منها؟؟ رجاء بلاش نشر الاستشارة على الموقع وردوا علي على الإيميل
28/5/2024
رد المستشار
شكرا على متابعتك.
التشخيص عبر مراسلة المواقع الطبية لا يمكن أن يكون دقيقاً مقارنة بالتشخيص الذي يتوصل إليه استشاري في الطب النفساني على أرض الواقع. هذا هو السبب الأول في نصيحتك بمراجعة طبيب نفساني للتشخيص ومن ثم العلاج. كذلك اضطراب الشخصية الحدية يحتاج إلى خطة علاج تتضمن علاج طبي أو نفساني واجتماعي.
الفقرة الثانية من استشارتك تتطرق إلى أعراض طبنفسانية معرفية وسلوكية. هذه الأعراض قد يكون مصدرها اضطراب الشخصية الحدية وقد تكون أعراض اضطرابات نفسانية أخرى كثيرة الملاحظة في المراجعين الذين يتم تشخيصهم بهذا الاضطراب.
لا تزالين في مقتبل العمر وليس المهم التشخيص وإنما العلاج وقد يتم تقديم النصيحة لك بتغيير نمط حياتك فقط أو هناك الحاجة لعلاج طبنفساني منتظم.
وفقك الله.
تعليقات الأعضاء