|
| 
|
أنا كنت من حوالي سنة بتابع مع دكتور رجيم علشان أخس وفضلت متابعة معه 5 أشهر علشان أخس وخسيت 25 كيلو وفي مرة كنت بقوله إني عايزة أثبت علشان شكلي كده بقي مقبول وإني مش حابة أخس أوي قال لي طب نتكلم في الموضوع ده لما أخلص اللي داخلين معاكي، وسابني للآخر وفضلت أنا وهو لوحدنا في الغرفة وعاكسني باليد وكانت صدمة بالنسبة لي إنها حصلت من حد قريب مني مع العلم بأنها ماكانتش معاكسة جامدة أو آذتني، بس الفكرة نفسها ضايقتني الكلام ده من شهر أربعة اللي فات، يعني من سنة تقريبا ومن ساعتها وأنا بتجيلي حالات باكل بكمية كبيرة أوي، وبعد ما أخلص أكل يجيلي شعور بالذنب فأعمل مجهود كبير أوي علشان أحرق أو أقعد ماكلش يومين مثلا وفي الغالب وزني بيبقى ثابت لما بيحصلي الموضوع ده مرتين في الأسبوع.
بس ساعات بيجيلي الحوار ده بكرره 2 أو 3 في اليوم فوزني يزيد 10 أو 15 كيلو في شهر واحد مع العلم بأني كنت وصلت مع الدكتور لـ95 وكان وزني أول ما بدأت معاه 122 وبقى وزني دلوقتي 126 وأنا أصلا المفروض وزني يبقي 85 علشان أنا رحت قبل كده لدكتور قاس نسب جسمي ولقي نسبة العظم كثافته عالية فقال لي كده بس الموضوع ده مش عارفة أبطله إزاي وفوجئت وأنا بدور على حاجات على النت إنه بيسمى الشره المرضي ولقيت أعراضه بتتناسب مع اللي بيحصلي بس أنا لسه موصلتش لمرحلة إني أحط صباعي في فمي وأرجع مع العلم بأني حاولت أعملها مرة بعد ما أكلت بس تعبت ومعرفتش أرجع مش عارفة أنا عملت بحث على النت في الموضوع ده بس محدش كاتب العلاج أرجو الإفادة.. أنا ليه بعاني من المرض ده وأعالجه إزاي؟ وهل أنا فعلا وصلت لدرجة المرض ده ولا لأ؟
كمان احنا في عائلتي في هوس من تخننا من واحنا صغيرين يعنى مثلا أنا وأختي اللي توافها الله بسبب التخن كنا بنروح نعمل رجيم من واحنا في ابتدائي علشان بابا كان بيتكسف من شكلنا قدام صحابه، وطبعا كنا مبنمشيش على الرجيم علشان كنا عيال مش مستوعبة يعني إيه خسي علشان شكلك فكان فيه نقد بشع من البيت وبص بقرف لينا واحنا بناكل ده غير انتقاد الناس لينا في الشارع، ومن القرايب بس فأنا كنت قصيرة وطولت فجأة في الثانوية العامة فكان شكلي حلو مكنتش عايزة أخس بس الموضوع ده ضايق أختي الكبيرة وخلاهم يركزوا الانتقاد عليها مع العلم بأنها كانت واعية لوفاة ماما وهى 7 وأنا كنت ساعة وفاة ماما 5 وكانت واعية لزواج بابا من خالتي بعد سنة لوفاة ماما فكانت كارهة الوضع وعلى خلاف دائم معاها ومع والدي، أما أنا فكنت من النوع الأهبل زي ما كانت الناس بتقول علي أو ساعات بيقولوا خبيثة علشان بسكت بس أنا شايفة إني كنت من النوع الجبان أو الكتوم كنت بخاف من ضرب بابا لأختي أو معاملته ليها فكنت بسكت وأوافقه على كل حاجة فهي اللي كانت في وش المدفع فكبر الموضوع معاها لغايت ما بابا جاله عقد عمل في السعودية وسافر وأنا في أولى ثانوي وأختي في ثالثة وده ادى أختي مساحة إنها تتخن من غير ما حد يحاسبها وتخنت لدرجة كانت تخليها بتتكسف من شكلها وصلت لـ135 كيلو مع العلم بأنها كانت قصيرة مش طويلة زيي فكان باين عليها التخن لغاية ما وصلت لدرجة إنها طلبت من بابا إنها تعمل عملية تدبيس معدة وبابا فضل رافض سنة ومع إلحاحها وبعده عننا اللي بقى مخليه ملهوف علينا مش بيرفض لنا طلب عملتها وماتت بعديها بثلاثة أيام طبعا كانت هي أختي المقربة أوي علشان هي الوحيدة من أمي وباقي إخواتي الثلاثة من خالتي.
بابا نزل بعد ما هي ماتت في نفس اليوم مشافهاش غير وهي ميتة طبعا كان هو وخالتي كانوا منهارين جدا فكان لازم حد يمسك نفسه فكنت أنا كنت علشان أعيط لازم محدش فيهم ياخد باله لازم أكون لوحدي فكنت بعيط كل يوم قبل ما أنام لوحدي لمدة ما يقرب عن سنة لغاية ما اندمجت مع جمعية خيرية وحبيت النشاط الخيري والأيتام بقالي سنتين فموضوع أختي خف بس مارحش اللي أنا حاسة بيه من شعور بالذنب علشان زي ما أنا قولت كنت جبانة فكنت بخليها تاخد اللوم كله فبعد ما ماتت بقيت حاسة أني أنا السبب في إنها وصلت لحالة المتأخرة ديه من المرض النفسي بقيت حاسة علشان أنا كنت رفيعة إني موقفتش جنبها بس وجت لي فترة كنت باكل علشان مرفعش وبابا يحس أني خسيت فيتحسر أنه عمل العملية لأختى فوصلت تقريبا لشكلها حتى إني في بعض هدومها بقيت ألبسها بس وفاة أختي من 3 سنين بالضبط.
ومن السنة اللي فاتت بابا قرر ياخدنا معاه بره كلنا وأنا علشان الوحيدة اللي في الجامعة أنزل علشان الامتحانات فنزلت في شقتنا في بيت العيلة بس قاعدة لوحدي مع سؤال الأهل فقط كل كام يوم فده بقى يتيح ليا الفرصة أكبر إني أمارس الموضوع ده من غير ما حد يشوفني وبقى الموضوع بالنسبة لي أصعب مع العلم بأني بحب خالتي جدا وفعلا ساعات بحس إنها ماما وبنسى أنها خالتي وبحب أخواتي بس في مشاكل أسرية عادية بتحصل بيني وبينهم على طول دماغي بتروح على إنهم مش إخواتي وأني خلاص بقيت لوحدي وبقى عندي هوس إني نفسي ألقى الزوج الصالح اللي يبقي معايا علشان يريحني مع العلم بأن أخواتي من كتر ما ماما بتقف جنبي ضدهم بيقوللها أنت بتميزيها عننا وكمان بابا اللي كان بيحب أمي الله يرحمها بجنون وأنا شبهها بقى يعاملني معاملة خاصة جدا اللي خلا برده أختي الكبيرة الموضوع الاضطهاد من والدي يزيد عندها علشان كان دايما يقول عليّ أحلى منها.
وبعد ما أختي ماتت بقى يميزني أكتر وبعدي عنه ونزلوني لوحدي بقى الموضوع تعبه أكتر وزاد من لهفته لحد ما أنا بقيت أحس أن سلوكي مع الناس مش سوي.. متقلبة مش عارفة ليه من كتر ما بابا خلاني مغرورة ولا إيه بس أنا محبوبة برده أوي من كل اللي حولي بس أنا بينطبق علي المقولة اتق شر الحليم إذا غضب بولع في الأخضر واليابس وممكن واحدة تبقي صحبتي أوي أبعها وأقاطعها وماتعرفش عني حاجة تاني يعني يا أكره أوي يا أحب أوي
وفي حاجة كمان بالنسبة لموضوع تخني أنا مقتنعة جدا بجمال وجهي مع العلم بأن الكل بيشكر في جمالي جدا إلا أني مش شايفة كده بس ساعات بحب وشي، وشي بس جسمى لا.. استحالة.. مش عارفة ليه بس علشان ماما كانت دايما بتقولي أنت مافكيش غير وش بس أنا عندي 21 سنة دلوقتي وأختي اتوفت وأنا 18 بس وهى ماتت ساعتها 21.
24/06/2024
رد المستشار
شكراً على مراسلتك الموقع.
استشارتك مرتبكة جداً وهي أشبه بحوار مع نفسك أو مع إنسان آخر، ولا توجد أسئلة موجهة للموقع وكأنها رسالة تشاركين فيها الموقع عن معاناة شخصية وعائلية.
هناك ثلاثة مواضيع تم طرحها عشوائياً ومع:
١- البدانة.
٢- الحداد على الأخت.
٣- التعرض لتحرش وصدمة نفسانية.
البدانة هي مرض العصر وربما حالها حال العديد من المظاهر التي تم تطبيبها وهناك فيضان من عقاقير للتخلص من السمنة المفرطة هذه الأيام بالإضافة إلى عمليات جراحية يتم عملها بدون الالتزام بقواعد وتوصيات صحية. لا شك أن ما حدث مع أختك لعب دوره في حياتك النفسانية والحداد لا مفر منه ولابد من التعامل معه تدريجياً. في نفس الوقت بدلا من الحديث عن الريجيم والعقاقير والجراحة للتخلص من الوزن الزائد هناك مجهود الإنسان نفسه. لا يخفى على أحد ما هي المواد الغذائية التي يجب تجنبها من أجل تخفيض الوزن وضرورة التزام الفرد بإيقاع يومي منتظم وممارسة التمارين الرياضية للحفاظ على وزن صحي. ذلك أفضل بكثير من مراجعة هذا الطبيب وذاك للحصول على توصيات غذائية لا يجهلها أي إنسان في عصرنا هذا. تخفيض الوزن يجب أن تكون مهمتك أنت وتحلي بالصبر وتدريجياً ستصلين إلى وزن مقبول بدلا من هدر الأموال واستعمال عقاقير وجراحة معدة وأمعاء.
لا تعانين من اضطراب أكل ولا تحتاجين إلى مراجعة طبيب نفساني أو معالج نفساني للتعامل مع البدانة. ما حدث مع الأخت مأساة طبية وربما على الإنسان أن يدرك بأن خير وسيلة للتخلص من البدانة هو جهوده وخطته الشخصية.
ما تعرضت له من معاكسة لا يساعد أي امرأة ولا يجب أن تعودي بتاتا إلى هذا المركز. ما يجب أن تفعليه هو الكتابة إليهم حول ما حدث وإن كان من تحرش بك سينكر بالطبع.
أخيراً نصيحتي لك هو أن تحرصي على خفض الوزن بطريقتك الخاصة وأنت طالبة جامعية وتدركين ما هو الطعام الصحي وغير الصحي. هذا الطريق هو المفضل ونتائجه أفضل بكثير من عقاقير وجراحة.
وفقك الله.
تعليقات الأعضاء