وسواس انتقال النجاسة من القمة إلى طظ!

وسواس انتقال النجاسة وصل للقمة
 
السلام عليكم، عندي وسواس انتقال النجاسة ووصل لحد غير طبيعي أعرف إن عندي وسواس وإن محدش يفكر ولا يعمل الذي أعمله بس مش قادرة أوقف لو قاومت تجيء لي أعراض بشعة وخفقان وأدوخ وأتعصب على الأولاد وزوجي ومش بستريح إلا أما أقوم أعمل الأعمال الوسواسية وأطهر كل حاجة بطريقتي
 
قبل ما أبدأ أنا رحت لكذا دكتور وجربت علاجات كثير كلها منفعتش معي وجاءت لي كل أعراضها الجانبية أعراض بشعة مقدرتش أتحملها والدكتور قال وقفي فورا جربت كذا نوع النوع الوحيد اللي مجابش أعراض فلوزاك بس معمليش أي حاجة نهائي ولا حلوة ولا وحشة ولا كأني آخذ حاجة وجربت جلسات سلوكي معرفي ومنفعتش برضه والدكتوره تعبت مني وأرهقت وقالت لي هحولك لدكتور ثاني
 
المهم عندي كام سؤال أرجو الرد عليهم
1- أولا عند تشطيف ابني على الحوض بيطرطش مايه طبعا أنا بحاول أبقى حذرة بس برضو مهما عملت أكيد فيه مايه بتطرطش بالنسبة لي مايه نجسه وتشطيفه بقى تقيل جدا مش عارفة أعمل إيه
 
2 -- وبعد ما بخلص تشطيفه الذي يأخذ وقت طويل للأسف لدرجة الولد بيزهق وأنا كتفي بيوجعني جدا المهم برش مايه في كل الحمام والحوض والحيطان وبعدين أدعك الحوض بحذر شديد أحسن يطرطش صابون وبالنسبة لي جوه الحوض نجس عشان عدى عليه البراز خصوصا الحوض فيه دهون وأوساخ أما تعدي عليها النجاسة تلصق فيها فميكفيش إني أرش مايه وخلاص لازم أدعكه
 
3--الاستنجاء بدأ يأخذ وقت كبير جدا مني أغسل الفرج وبعدين يمين وشمال الفخد عشان طرطش عليه مايه وعشان بحس إن بييجي عليه رشاش بول كمان وبعدين بغسل الوراء كامل المنطقة لنفس الأسباب طرطشة المايه
 
4-- الاستنجاء أثناء الدورة بالنسبة لي أصبح رعبا أقعد أقل شيء ربع ساعة استنجاء من البول أثناء الدورة والمشكلة مش في المدة المشكلة في كمية الرعب والقلق والتوتر أثناء الاستنجاء كمثال وأنا بغسل الفخد يدي لمست المنطقة من الأمام فتنجست فأغسلها وأرجع أغسل الفخد تاني فألمس كرسي الحمام أو المايه تطرطش على المكان من الأمام فأغسل ثاني أو وأنا بغسل من الخلف يدي لمست المكان من الأمام فأبدأ من الأول أغسل الخلف كله من اليسار للمنتصف لليمين وهكذا وهكذا أشياء كثيرة
 
5-- بعد الانتهاء من قضاء الحاجة أعتقد أن كرسي الحمام كله نجس فأبدأ برشه كله هتقولوا ليّ ليه نجس هقول عشان ماء التشطيف والبول اللي بيطرطش والاستنجاء من البراز بيطرطش وعند شد السيفون المايه بتطرطش على الكرسي كله والغطا فبضطر إني أرفع القاعدة كلها وأبدأ أرش الحمام كله وأنا عارفة إن محدش بيعمل كده بس أنا مقتنعة إن فيه نجاسة ولازم أشيلها
 
6 -- ابني 7 سنوات عند قضاء الحاجة ساعات يده تبقى متسخة بأكل مثلا وزيت ودهون وهو صغير فيمسك في القاعدة من الخلف يسند نفسه فيوسخ قاعدة الحمام وأجيئ أشطفه من البراز فبيسيب يده وينحني للأمام فبعد التشطيف أغسل القاعدة بالشطاف عشان ماء الاستنجاء فأشك في المكان الذي فيه دهون إن النجاسة لصقت فيه
 
7-- ابني الصغير في بعض الأوقات بيصحى والبول في الحفاضة واصل للأمام قريب جدا من بداية الحفاض من فوق ناحية البطن فلما أغير له أخاف مع الحركة الحفاض ينزل لتحت شويه والمكان الذي كان فيه البول من الحفاضة القديمة يلمس ملابسه وأخاف أكتر يوقع ماء على المكان فينشر النجاسة أكثر وأكثر وأخاف عموما أما أغير له بدون تشطيف إن الحفاض يتحرك من عند الفخد كده فالمكان الذي كان فيه البول أصبح بره الحفاض
 
8 -- ابني الكبير أما بيرجع من المدرسة لازم أخليه ياخد دش كامل بشعره عندي شعور مؤكد إن كله نجس يده وشعره وملابسه خصوصا إني مش بدخله الحمام لوحده في البيت هو 7 سنوات بس إدراكه وجسمه أقل من عمره فمش بيعرف يستنجى وهو مشتت الانتباه ومش بيركز أصلا وبحس إن الشنطة والكتب والأقلام وكل حاجة فيها نجاسة أتعامل معها بحذر وساعات أغسل يدي مع كل لمسة
 
9 -- حتى المشي في الشارع أصبح رعبا بالنسبة لي ماشية أبص في الأرض وأزعق عشان يأخذوا بالهم مما في الأرض والماء أحسن تبقى مياه صرف صحي بحس إن كل حاجة نجسة
 
10 -- حتى العلاقة أتهرب منها بسبب للخوف من نجاسة المذي وأن أي ولد يصحى من النوم فجأة هعمل إيه وأمسك الباب ازاي وإيدي نجسة وأمسك الولد ازاي وأتعامل معه ازاي حتى الاغتسال بخاف منه بخاف المايه تيجي عليه وتطرطش وشعري بيبقى عليه زيت فهل المايه كفايه للتطهير وفيه زيت على شعري ومعرفش زوجي بيتعامل ازاي في الاغتسال فبخاف إنه متساهل زيادة ويمسك أي حاجة ويده فيها نجاسة
 
11 -- أخاف أحط أي نوع كريم أو زيت حتى بخاف طول اليوم يديّ يبقى فيها زيت وأضطر فجأة أشطف الولد ويدي فيها زيت أو دهون والنجاسة تلصق فيها فعلى طول رايحه جايه أغسل بصابون كثير
 
12-- أثناء الدورة الشهرية أحس إن الفوطة الصحية بتتحرك للأمام والخلف مع الحركة أو النوم وبالنسبة لي هي كلها نجسه فمثلا من الأمام كانت لامسة المنطقة وبعدين رجعت للوراء فالمنطقة التي كانت لامساها نجسة وهي رجعت للوراء فالمنطقة بقت لامسة الملابس الداخلية فنجستها! وبقول ما كل الستات زيي وفيه اللي بيشتغلوا شغل صعب وبيتحركوا أكثر مني ومحدش بيقول الفوطة بتتحرك واتنجست بس مش قادرة ساعات بقوم أغير ملابسي كلها وأستنجي وتعبت
 
فيه أسئلة كثير وطول اليوم عندي أفكار مش بتروح بقيت بتمنى الموت وأخلص من الذي أنا فيه مبقتش عايشة أصلا بستنى اليوم يخلص بفارغ الصبر مش عاوزه أهتم بنفسي ولا البيت ولا عاوزه حاجة ولا عاوزه أستحمى ولا أعمل أي حاجة أنا أعمل غصب عني عشان أولادي وزوجي وبضحك وبتكلم وبهزر بس أنا من جوايا في صراعات وتعب غير عادي
 17/12/2024