متدشملة إنه الاكتئاب الهباب!

مساء الخير

عجبني جدا موقعكم وأرجو تفهموني أنا شكوتي ممكن تبقى غريبة شوية، بس بجد بقولها لأني مش لاقية حد أقولها له.. أنا حاسة بالقرف وده التشبيه الأدق للإحساس الذي أنا حساه تجاه الحياة.. مبقتش بخرج عشان قرفانة من الناس، قاعدة من الشغل بقالي فترة عشان قرفانة من الشغل، مبرتبطش عشان قرفانة من العلاقات..

بقرف لما بشوف مسلسلي المفضل وبقرف لما باكل ومبكملش الأكل ومبكلمش صحابي عشان قرفانة من علاقتنا.. حتى أهلي بقينا كل شوية خناق والقرف ده بيطولني أنا كمان بالبطئ..

أنا من برا حد مقبل على الحياة جدا حتى في أحلك ظروفه هو متفائل.. كل مرة بكلم فيها حد وبحاول أفضفض زي ما دايما بسمع لهم محدش بيصدق إني مضايقة ولا إن عندي مشكلة.. آخر مرة بكلم صاحبة متكلمناش من زمان بتقولي بتعملي إيه بقولها ولا حاجة بتقولي مستحيل إنت مبتقعديش فاضية لازم تكوني بتعملي حاجة أو بتستفيدي من وقتك وحد تاني يقول لي إنت عمرنا ما سمعنا لك صياح..

تعبت من القولبة اللي الناس بتحطني فيها عشان الصورة اللي قررت أختارها لنفسي، تعبت أبان في وسط أصحابي أجمد حد وفي وسط عيلتي أجمد وأبر ابنة.. تعبت بجد ومش لاقية حد يفهم تعبي ده

ليه بيتاخد عننا صورة إننا فعلا رائعين واحنا متدشملين!!
هو عشان أتفهم لازم أبقى شكاءة بكاءة وماشية أوزع طاقة سلبية على خلق الله!!!
23/02/2025