حبيب ماما لابد يعرف أن القوامة للزوج!

 مساء الخير عليكم

شكرا بجد على الموقع التحفة ده، بصراحة أنا تفاجأت إنكم جد كده وبتساعدوا الناس ببلاش، أما مشكلتي فهي
أنا امرأة متزوجة من ٥ سنين وقبلها ٣ خطوبة لرجل محترم وحنين جدا وابن ناس وعندي ولد ٤ سنين، إحنا نعرف بعض من الجامعة كنا زمايل وهو كان بيحبني الأول ومن حبه فيّ حبيته وحبيت حنيته

بس المشكلة إني أنا وهو مش شبه بعض أنا والدي متوفى والكبيرة على ٤ بنات، أعمل من سن صغيرة ومتحملة المسؤولية وبجيب لنفسي اللي نفسي فيه وهو ولد وحيد على ٣ بنات الصغير المتدلع اللي عمره ما شال مسؤولية غير بعد ما تجوزنا

بصراحة أنا مقدرة إنه بيحاول من أول ما تخرجنا وأنا كنت أساعده في البيت وأنا وهو واحد لحد ما سمعته بيتكلم مع مامته وفاكرني نائمة وأنا مكنتش مديه اهتمام لحد ما اسمي اتقال فابتديت أنتبه* متعرفهاش مرتبك ومتخليهاش تطلب والفلوس اللي محوشها دي هات هجيب بيها غويشة وهحوشلك فيها عشان ابنك وعشان مراتك متطمعش فيك
وأنا اتكسرت أوي من الكلام ده بالذات إني من أول يوم بحط أكثر من ثلثي مرتبي في البيت من غير ما أتكلم عشان فاهمة أنه بياخد x طلع بيقبض ٥ أضعاف x ده

من بعدها مابقتش أحط فلوس في البيت زي الأول وبقيت أطلب الطلبات بتاعة البيت التي كنت بجيبها أنا لو اللبن خلص ولا الأرز كنت أنا بجيب تاني بقيت أقول له هات
لو قصرت في البيت مع شغلي يقوم علي الدنيا أنا طول عمري بلا أب ولا أخ افتكرت أني هبقى مسؤولة من رجل يعوضني ذا لا هو شايف إني معي مرتبي أصرف عليك ليه
كمان تكلم على شعري طبيعته كيرلي رحت فردته تكلم على وزني خسيت جدا وبقيت ألبس براحتي تكلم على البيت بقيت بحاول ٩٠٪ من شغل البيت والأكل يبقى خلصان مع شغلي اللي بيخلص ٧ بالليل

عادة أجيب له أغلى الهدايا لعيد ميلاده وعيد الحب هو بيجيبلي أرخص حاجات وأحيانا مبيفتكرش، أنا متعودة إني لم أقبض المرتب أجيب حاجة حلوة للبيت زي ما والدتي كانت بتعمل هو حتى لو خرجني يفضل يقطمني وشايف إن ذي رفاهيات ملهاش لازمة هو اتربي على كده بس في الخطوبة مكانش كده كان كريم جدا ومينفعش أسيب شغلي أنا عندي أقساط قول هتخلص كمان ٦ سنين وأخواتي بجهزهم بس أرجع أقول هو حنين وطيب ولم أقول له فلوسي خلصت ممكن يديني ٢٠٠ ج مثلا أكمل بها الأسبوع أو لو قلت له نفسي في حاجة بيجيبها لي وعارفة إنه بيحوش عشان ابننا

وهو متمسك بي وبالبيت وأنا عمري ما أهد بيتي
بس ساعات التعب بيغلبني وأقعد أقول دنا العزوبية كانت أريح لي لأنه ساعات بحس إني جبت آخري
28/02/2025