يوميات شاب (4)
((الحلقة الخامسة))
...... يا بيه قوم يا بيه بأه...... ما تقوم يا جدع بأه الله"
ده عبد العال بيصحيني..... آآآآآآآآآآآآآآه حط صاروخ في مناخيري.... ده إيه ده؟
-بصلة يا بيه تصحصحك كدة
- خلاص يا عبد العال......خلااااااااااااااااااااااص
- طب يا بيه حمد الله على السلامة...... شفت إيه يا بيه؟
- شفت إيه فين؟
- جوه الأوضة خلاك تسخسخ كدة
- أوضة إيه؟.. يا نهار إسود الشيخ فين؟
- لسه جوَّه
- تعالى بسرعة...... نلحق الراجل
"طبعًا جرينا وفتحنا الباب ولقينا......."
- هي دي جزمته يا بيه بس هو فين وإيه الدخان ده؟
- يبقى الراجل ولع بجد
- إنت شفت إيه قولِّي
- شفت نار كبيرة كده على شكل بنى آدم هتاكل الشيخ كان منظر رهيب جدًا
- يا ساتر يا رب
- المهم إحنا نبلغ الـ....
- لاااااااااااااااااااااااااااااااء نبلغ إيه وسين وجيم وإنتوا اللي قتلتوه ملناش دعوه أهو كلب وراح
- الله مش ده اللي كان بركة من شوية؟
- بركه آه إنما ساعة البندر معرفوش.... آخد إعدام أنا يا بيه وهم مش بيقتلوا حد دول خطفوه بس
"بيني وبينكوا كلب وراح بجد هو مش واخد ميت جنيه شامله التأمين وبدل طبيعة عمل؟....... براحته بأه"
- ادخل بأه يا بيه ريح نـ......
- أدخل فين إنت اتهبلت يا عبد العال؟
- أمال هتنام فين يا بيه؟
- في الخرابة.. في أي حتة بس مش هنا
- إمممممممممممم طيب تعالى معايا في أوضتي
"وهنا بأه تجلت شهامة ولاد البلد يا جماعة أوضة عبد العال أغرب مكان ممكن تدخله في حياتك مكونة من سرير طبعًا جواه فتحه مقفولة بقفل وترابيزة وسبرتاية وحصيرة......حاسس إني ماقبل التاريخ فعلاً"
- طب وأنا هبات فين يا عبد العال؟
- يا باشا السرير تحت أمرك وأنا هنام على الحصيرة
- لا يا عبد العال أنا مش عا....
- يا باشا أنا بنام على الحصيرة كده كده
- أصل......
- يمين طلاق تلاته لانت نايم على السرير
"طبعًا استجابة لليمين نمت على السرير والقفل في نص ضهري بالضبط وهو نام على الأرض بس فيه حاجه غريبة......."
- إنت مش هتغير هدومك يا عوباد؟
- وأغيرها ليه يا بيه؟
- تلبس هدوم النوم
- هع هع هع (كأنه هيرجع) هو النوم راخر بقاله هدوم؟
- طبعًا
- أنا كنت بحسب العيد بس هو اللي له هدوم طلع النوم كمان هع هع هع (هيرجع تاني)
- طيب نام يا عبد العال
"ومكدبش خبر قلع الجزمة ونام" وأنا طبعًا مش هيجيلي نوم دلوقتي أقولوكوا على حاجه حلوة نتسلى مع بعضينا أنا ليه بأه سموني الشاذلى؟.. أصل أبويا.... "الله يخرب بيتك يا عبد العال إنت مقلعتهاش من إمتى دي"؟؟ استنوا أفتح الشباك.... طيب كده حلو أوي هنعرف نتنفس.... أبويا بأه سماني الشاذلي ليه عشان عندنا في العيلة....
- خخخخخخخخخخخخخخخخخخخخخخخخخ
"دي السيمفونية التاسعة لعبد العال عشان تكونوا فاهمين.... المهم أنا اسمي الشاذلي عبد ربه محمد محمود أحمد عبدربه محمد أحمد.... مش ملاحظين حاجة؟ عائلة بدون ألقاب يعني مينفعش أقول أنا من عيلة محمد مثلاً قام أبويا بأه الله يسامحه حب يكسر السلسلة دي وسماني الشاذلي عشان الأجيال القادمة طب وهو مستفيد إيه؟ مش عارف بس كويس أهو ابني يبقى اسمه محمد الشاذلي بس برده بعيني....أصل نظرية السندوتش في الأسامي مشهورة أوي يعني أنا لازم يبقى ابني اسمه عبد ربه الشاذلي عبد ربه يا إما أبويا مش هيعرفني تاني.... ولا بأه وأنا في الكلية وآخر امتحان ليا فيها وكنت....."
- خوييـــــــــيــــــــخخخخ خويخخخخخخخ خوووووووخ
"لا ده بالعقل كده الريحة زائد الناموس زائد الصوت زائد القفل اللي في نص السرير يبقى العفاريت اللي فوق أحسن يلا بينا.."
- بسم الله الرحمن الرحيم..........
- مش عيب برده يا شوشو عاوز تخلص مني؟
- مين؟؟ ست الحسن والجمال؟؟
"دي طبعًا هند اللي بموت فيها"
- آه اللي مش عاوز تشوفها تاني.. يا هرَّاب
- أبدًا والله ده أنا خايف من جوزك بس يطلعلي
- جوزي مين؟
- المارد مش إنتى متجوزاه
- مين اللي قالك كده؟
- عبد العال
- لأ طبعًا ده عاوز يتجوزني بالعافية بس أنا مش موافقة فعمال يطاردني في كل حتة
- آه علشان كده مجنون وممكن يعمل أي حاجة
- بس متخافش أنا بزوغ منه وأجيلك
- طب الشيخ الغلبان ده راح فين؟
- أخده تحت يشغله شوية ده كان قارفنا سيبك منه خلينا في المهم
- خير؟
- بلاش الحركات دي واعقل لحسن ياخدك إنت المرة الجاية وما بالك بأه لو عرف إني بحبك؟
(الله يا عبد الله)
- حب إيه هو أنا فيه بيني وبينك حاجه لا سمح الله؟
- أنا بحبك يا شاذلي فيها إيه دي؟
- مفيهاش حاجه بس..........
- وهو إنت هتلاقي أحسن مني فين؟
"وقربت مني وبصت في عينيا أوي.... حد شاف عيون جنيَّة من قريب قبل كده اممممممممم ولا من بعيد" طيب أوصفلكوا بأه: أحلى عيون في الدنيا عسلي وصافية باختصار جميلة جدًا.. ولا البرفان بتاعها حد شم ريحة جنية قبل كده؟ برده لا...طب أوصفلكوا بأه حاجه كده تدخل على القلب علطول مش المناخير زي بصلة عبد العال وأنا طول عمري قلبي ضعيف............ فينك يا عبد العال يا حمار تيجي تشوف"
- مش هلـ.. هلـ.. هلاقي أحسن منك طبعًا
- طب ماتيجي
- طب وهنلحق نرجع إمتي؟
- نرجع؟ إحنا نتجوز تحت ونعيش في تبات ونبات
- لا ياختي. حلوة آه.. بحبك آه.. إنما تحت دي مضمنهاش
- طب أقولك على حاجه أحلى تعالى معايا تجرب وتشوف ساعة واحدة معجبتكش نطلع تاني
- والله فكرة.... بس لأ يا ستي مش هروح حتة أنا معرفهاش
- براحتك نأجلها شوية؟
-أييييييييييييييييييوه نأجلها
- طيب أنا اتأخرت أوي وهمشي بأه
- ليه منتي قاعدة؟
- لا طالما إنت مش عاوز تيجي معايا ومش بتحبني كده ده إنت ما صدقت قلت أيوه
- أبدًا بس مفكرتش قبل كدة إني أنزل تحت
- خلاص فكر وأشوفك بكرة أوك؟..... سلام
- سلام
"خرجت من الشباك كالعادة.... طيب دلوقتي أنا في مشكلة كبيرة حياتي طبيعية جدًا إيه اللي بيجرالي ده؟.. خلينا في المهم أنزل أجرب ولا إيه؟.. ولو نزلت هرجع تاني ولا لأ طيب ولو اتجوزنا هـ... "الله أكبر الله أكبر"... الفجر أذن طيب أروح أصلي وأنام بأه واشوفكوا بكرة إن شاء الله.
واقرأ أيضا
يوميات شاب (3) / يوميات شاب(2) / يوميات شاب (1)
تعليقات الأعضاء