شيء......من العذاب......

الساعة 6 صباحا.....منبه الموبايل...
 صحيت....دخلت الحمام.....لبست.......صليت....كوباية شاي وسندوتش الجبنة.....
 بقت ستة وربع......مكياج وتسريح الشعر ربع ساعه....نزلت ستة وخمسة وتلاتين دقيقة
 
 تاكسي..محطة طنطا لو سمحت....شباك الحجز...تذكرة ف قطر سبعة لو سمحت...
 مافيش ياآنسة.......طب سبعة وربع.....برضه كله محجوز.....أول ميعاد فاضي كام لو سمحت
 الساعه 11.......المحاضرة الساعة 9........شكرااااااااا
 مره غياب كمان وهاشيل المادة دي الدكتور بيتلكك ع الغياب.........
 القطارات العاديه........غير صالحه للاستخدام الآدمى.......
 ميكرو باص من بره المحطة........نفر مصر.....نفر مصر ...رمسييييييس.......
 ركبت....لسه فاضل 3 أنفار....السواق كذاب.......معلش.....مفيش حد جه.......
 سراين عربيات نجدة......موكب محافظ الغربية.....أصل بكره تجهيز الانتخابات
 ظابط جاي جري........يا له يا أسطى من هنا......كله يتحرك من هنا بسرعة....
 اللى يتلكع....هات رخصه يا أمين....حاضر ياباشا.........
 يا دي النهار اللي باين من أوله هانطلع ناقصين يافنديه......
 الأجرة زيادة نص جنيه......ولا تنزلوا ونروح......لحد ما أيام الانتخابات السودة دي تعدي
 لا.....لا.....لا.....توكل ع الله ياسطى.......طلعنا 7ونص..........
 طلعنا كوبري بركة السبع.....الكوبري تحت الأنشاء الطريق واقف شوية
 ربع ساعة .اتحركنا......شريط كاسيت لداعية إأسلامي....صوته رخيم....
 بيهدي الأعصاب....ينيم.....بنام .....رأسي خبطت ف الإزاز....أفوق
 الساعه 9 وخمسة......وصلنا رمسيس........جريت على موقف أحمد حلمى......
 أتوبيس 47...الزمالك.........زحمة جدااااا......أتحشرت........
 غيابى كتير ف المادة دي.....الأتوبيس زحمة جدااا.....واحد واقف جنبى.....
 ياكابتن.....أينعم الأتوبيس زحمة بس أنت مش دايخ.....عشان تريح عليا
 قوى كده..........سوري يا آنسة......بعدت عن الأخ الدايخ.........
 واحد متشعبط ع السلم.....وقع.......شهقات وصرخات من بعض الركاب
 وبعدين.....ماهو يستاهل تتكسر رقبه اللى خلفوه.....أحنا مش هانبطل استهتار بقى..
 ياراجل حرام عليك تلاقيه وراه معاد ولا شغل هوه كمان........
 شغل إيه ياأستاذ.....دس عيال نشالين بيقف ع السلم عشان يخطف وينط
 أحسن إنه وقع.........
 وصلت.....نزلت بسرعة......وصلت الكلية.......الأتيليه على السطوح الدور السادس.......
 الأسانسير........للدكاترة فقط يا آنسة.....الطلبة ع السلم....
 طلعت ع السلم وصلت المحاضرة.....الساعة عشرة إلا تلت
 الدكتور واقف........زغر...لي....ممنوع الدخول ياآنسة آخر ميعاد للدخول تسعة ونص
 المحاضرة ميعادها تسعة......اأتفضلى بره لو سمحتى........
 يا دكتور أنا بسافر........
 ماليش دعوة.....
 {الدكتور من طنطا بس عايش ف القاهره}
 يا دكتور مانت عارف الطريق وكوبري بركة السبع.....
 ما تجيبيليش سيرته داياما ذلني...............
 طب أدخل بأه.......؟؟؟؟؟
 لأ.......... شكرااا........
 نزلت اكتأبت ساعتين .....مشيت لحد أبو الفدا.....أتوبيس 49
 عاوزه أروح التحرير أجيب بن لبابا من باب اللوق...
 بابا مابيشربش إلا البن ده بالذات.....حاضر.......
 رحت المطحنه......اشتريت.......مشيت لحد رمسيس
 محطة القطر.......الساعة واحدة وخمسة.......فيه حجز واحد وتلت من فضلك
 رد بعد خمس دقايق......آه فيه......
 أخدت التذكرة وجريت.......رصيف4.....لحقت على آخر دقيقة ركبت.....
 الراديو......نجوم أف أم......وصلت بنها الإرسال راح.....نمت.....
 القطر وصل طنطا.....نزلت.......
 تاكسي.........تاكسي...البيت.....
 روحت......نمت بهدومي ومكياجي......الحمد لله.....
 بكرة أجازة عشان كليتي لجنه أنتخابية.....آهي فايدة م الانتخابات
 المهم أنام......أنام.......ظلام تام..........
 ستاااااااار
 
واقرأ أيضاً:
لستُ أنـا ! / فَـداحَـهْ ! / بَعْدُ وَبَعْدُ.../ فِـقْـهُ الرَّغْـبَةِ ! / سببٌ مَبْـحُـوح ! /  جَـوازٌ لا يَـجُـوزُ ! / ذَوَبَـان! / عبث الفرشاة! / قِـطَّـةٌ ،، / آخر العمى