ليلة القبض على حفيظة

الساعة الثانية صباحا.....
 صوت رنين المحمول أيقظني من إغفاءه خفيفة أمام التليفزيون......
 الدكتور أحمد.....نائب القسم......
 لم أتعود أن يتصل بي أحد من النواب في مثل هذا الوقت المتأخر....
 فهناك الأخصائي النوبتجي تحت الطلب لأي طارئ بالقسم.........
 وكل الإخوة الأخصائيين على قدر عالي من الكفاءة...
 ربما كانت.....مشكلة طبية تتعلق بأحد من أهله ويريد مشورتي.....
 آلووو.....
 أيوه يا أحمد.... خير
 آسف يا دكتور....آسف جدا...بس الحقيقة كان لازم أتصل بسيادتك......من الناحية الإنسانية على الأقل
 إنسانية......؟؟؟؟؟.... حد مات من القسم......؟؟؟
 لأ يا دكتور..........
 أومال إيه.....؟؟؟؟
 حفيظة يا دكتور...........
 حفيظة شد حيلك ... مالها....؟؟؟ شدت حيلها قوي قطعته ولا حاجة.....؟؟؟
 حضرتك بتهزر يا فندم وأنا ركبي ساببة......
 واستشعرت من ارتباك أحمد وهو شخص هادئ بطبعه أن هناك حدث جل
 فتركته يتكلم دون مقاطعه.........
 من حوالي ربع ساعة... دخل القسم ثلاثة أشخاص..... رئيس مباحث أول المنصورة واثنين من ضباط المباحث
 وطلبوا حفيظة بالاسم........... ولما ندهت عليها الضابط شاف البطاقة بتاعتها وأخدها معاه في البوكس ومشي
 حاولت أعرف منهم فيه إيه..؟؟ وواخدين حفيظة على فين...؟؟؟ ما فهمتش غير إنه موضوع متعلق بالمريضة
 اللي هربت من القسم....من 3 أيام
 مين المريضة دي يا أحمد وحالتها كانت إيه....؟؟
 المريضة جملات أبو زيد.....بتاعة الفصام البارانوي.....
 أيوه يا أحمد....دي النايب....النوبتجي يومها.... بلغ بيها القسم فور هروبها وسجل البلاغ في سويتش المستشفى 
 أيوه يا دكتور والضابط نفسه قال لي إنه معاه صورة البلاغ بتاعة القسم...................
 طيب.....إيه المشكلة....؟؟ مش أول حالة تهرب ونبلغ عنها....؟؟؟..وبعدين حفيظة مالها ومال
 القصة دي كلها دي تومرجية القسم ومش مسئولة عن هروب أي مريض....؟؟؟؟؟
 مش عارف والله يا دكتور عاطف.....اللي فهمته إن فيه اتهام ...معين موجه لحفيظة بش ما حدش
 من الضباط شرح لي أي حاجة هوما جم قبضوا عليها ومشيوا على قسم أول المنصورة.......أنا قلت أبلغ سيادتك.......
 اتهام......؟؟؟؟ اتهام بإيه.......؟؟
 دي بت غلبانة ما تقدرش على حاجة... دى كبيرها خنصرة ورك فرخة من أكل المرضى
 أو كام بيضة من متعهد التغذية ..... أو الرغي طول النهار مع الواد سيد.........
 أتهام......إتهام إيه بس....؟؟؟
 ووجدتنى لا إراديا أرتدى ثيابي .. فأستيقظت مرفت على صوت بحثي عن ملابس للخروج........
 عاطف أنت خارج دلوقتي...؟؟؟؟ رايح على فين....؟؟؟ حد من أخواتك تعبان ولا حاجة....؟؟؟؟ فيه إيه...؟؟؟
 ما تشغليش بالك يا ماما...مشوار ساعة وراجع على طول
 مشوار الساعة اتنين الصبح......؟؟؟؟؟؟ مش تقول لي رايح فين..؟؟؟؟
 رايح القسم يا مرفت
 ليه..........؟؟؟؟؟؟؟؟؟؟؟؟؟؟؟
 البت حفيظة قبضوا عليها من المستشفى وودوها على قسم أول...المباحث قبضت عليها
 ليه......؟؟؟ هي سلوكها...كده ولا كده....؟؟؟
 يا شيخة حرام عليكي...... دي حفيظة تعلم.... أبو لهب.... العفة......يبقولو فيه اتهام موجهه ليها
 أتهام.......؟؟ وأنتفضت مراتى وكأنها أمام مستشار محكمة الجنايات بدار القضاء العالي
 أنا جاية معاك....
 يا ستي أنتي عاوزة جناية وتشبعي فيها مرافعة... ما فيش داعي. ... دي بت غلبانة....مش ناقصة
 إعدام من أول جلسة.......
 كده.....طب روح طلعها أنت م القسم يا دكتور............
 فكرت شوية....... والله صحيح ....... وجود مرفت معايا كمحامية يمكن يسهل لنا الأمور وتقدر تفهم إيه الوضع
 ونشوف حل للبت الغلبانه دى.........
 طب بأقول إيه يا مرفت .... تعالي معايا أهو أنتي عارفة القسم ونظامه....
 آسفة..........
 عشان خاطري معلش....أنا محقوقلك..........
 ورقتين......؟؟؟؟؟؟
 ورقتين فلوسكاب ولا سادة..........
 ورقتين كل ورقة بمية يا حدق........يا بتاع النفسية....ها تجيب ولا أكمل نوم........؟؟؟؟؟؟
 
 للمرة المائة............
 كم أمقت انتمائي إلى جنس الرجال.....الطيب ....المسالم.....الشهم......اللي ما بيستغلش الظروف
 قلت أيه........؟؟؟؟؟؟؟؟؟؟؟
 موافق.......................
 سبقتني الأستاذة بحكم المهنة والتعود إلى غرفة مأمور القسم.........
 مرفت عباس المحامية يا فندم..... جوزي الدكتور عاطف.....
 اتفضلي يا أستاذة أي خدمة.....؟؟؟؟
 والله سعادتك أنا جاية أعرف حكاية التومرجية بتاعة المستشفى اللي المباحث جابتها من شوبة.........
 آآآآآآآة.....البت بتاعة جريمة القتل...........
 قتل.............
 جلست على أقرب كرسي طالته يداي لأني شعرت بدوار في رأسي..........قتل ....
 حفيظة مش ممكن أنا أعرفها من عشر سنين..........وفقدت النطق تقريبا......
 ممكن سيادتك أضطلع على محضر التحقيق....{ قالتها الأستاذه التي...لم تبدي أي دهشة لما سمعت...}
 طبعا يا أستاذة......يا شاويش حسن......مع الأساتذة لحد طارق بيه في المباحث ...عشان تتطلع ع المحضر
 ومشيت خلف الأستاذة زي التلميذ الخيبان وقد أسقط في يدي تماما.....
 سلامو عليكو يا طارق بيه........
 أهلا أستاذة مرفت.......
 دكتور عاطف جوزي......
 أهلا يادكتور........
 أيه الموضوع ياطارق بيه.........؟؟؟؟؟
 الموضوع يا أستاذة أن فيه مريضة هربت من قسم الأمراض النفسية من 3 أيام والقسم بلغ عن هروبها
 وعندنا البلاغ فعلا......النهاردة تليقينا إشارة بوقوع جريمة قتل في قرية ميت عنتر.....
 واحدة قتلت جوزها بإيد الهون.....
 ولما قبضنا عليها وجدناها هي نفس المريضة اللي هربت من قسم النفسية من مدة....
 وبسؤال المتهمة عن سبب قتلها لجوزها قالت أنه من مدة....بيخطط عشان
 يقتلها ويخلا له الجو مع بنت عمه اللي بيحبها......عاوز يقتلها ويورث أرضها ويتجوز بيهم بنت عمه
 دا على حد قولها.........فراحت هي هربانة من المستشفى ....ودخلت البيت بالليل وهو نايم
 وضربته بأيد الهون لحد ما مات.......ولما سألناها.... مين اللى قل لك أن جوزك كان عايز يقتلك..؟؟؟
 قالت حفيظة........مين اللي حرضك على قتله...............؟؟؟؟... حفيظة.....
 وهنا....لم أتمكن من الاستمرار في السكوت......يا طارق بيه....دي مريضة نفسية إزاي تاخدو على كلامها
 إزاي الناس ممكن تتبهدل من تحت رأس أوهام مرضية....هيه كرامة الإنسان سهلة كده
 عشان تتوجه له تهمه الاشتراك في القتل لمجرد أدعاء من مريض نفسي....دي حالتها معروفة بوجود ضلالات وأوهام مرضية دي من أعراض المرض ممكن يتهيأ لها أي شيء ممكن تدعي إني أنا شخصيا بتحرش بها جنسيا مثلا.....
 ممكن يكون الإنسان رخيص كده........ف نظر القانون.
 نظر اللي الرجل شذرا.......وكز بعصبية على شفتيه......
 يا دكتور......أحنا مباحث مهمتنا....التحقيق..... وعمل التحريات.....وتقديم كل المشتبهة فيهم للنيابة
 الكلام اللي سعادتك بتقوله ده ممكن تبقى تقدمه..... بورق رسمي...... للنيابة....لما النيابة تطلب منك أو الأستاذة تطلب ده...
 وجذبتني الأستاذة من يدي......وهمست في أذني......عاطف بلاش تتكلم لو سمحت.......}
 متشكرين يا طارق بيه ممكن نستأذن سيادتك في زيارة المتهمة حفيظة........
 وعلى مضض....وهو ينظر إلي شذرا......أوي يا أستاذ......
 وجاءت حفيظة وهي بين الصراخ والعويل والبكاء
 وما أن رأتني حتى ارتمت على قدمي.......الحقني يا باشا.... بنت المجنونة دي ها توديني ف داهية......
 وأخذتها مرفت من يدها.........
 حفيظة ما تخافيش خالص....الموضوع منتهي ....إنتي بكرة ها تروحي لعيالك....معلش الليلة هاتباتي في الحجز
 وبكرة في النيابة ها تروحي لعيالك أنا بوعدك بكده........
 وراحت حفيظة في نوبة دعاء حااااااد...إلهي تسترها معاكي يا ست الأستاذة
 ربنا يخليلك البيه....ربنا ما يوقعك في ضيئة......وظلت تدعو إلى أن أخذها الشاويش حسن عائدا بها
 إلى الحجز.........
 وفي الطريق لمنزلي....طلبت مني مرفت أن أحضر لها في الصباح الباكر ملف المريضة بالكامل
 مع تقرير وافي معتمد من المستشفى عن حالتها العقلية......
 ولم يغمض لي جفن حتى الثامنة صباحا حيث توجهت لقسم النفسية وأداره المستشفى...وشئون المرضى
 وخلال ساعتين كنت أمام مبنى النيابة ومعي الملف كاملا...........
 وأخذت مرفت الملف.....ودخلت مع حفيظة عند وكيل النيابة........
 لمده ساعة كاملة.....خرجت بعدها زوجتي وورائها حفيظة تزغرد..........زغاريد... من أمو.. ديل.......
 إفراج من سراي النيابة.........بدون ضمان........
 وعدت لمكتبي بالمستشفى ..........منهك القوى تماما..........اعمليلي شاي يا حفيظة..........
 حاضر يا باشا.......هاخلي سيد يعملهولك هواااااااا
 وأنتي ما تعمليش ليه يا حفيظة.........؟؟؟؟؟؟
 أصلي استقلت يا باشا................
 حتى أنت يا بروتس......إذن فليمت قيصر............
 
واقرأ أيضاً
هل أنت مصاب بالفضول المرضي؟؟ / مدونات العيادة النفسية: سيدتي الجميلة / قيس....وليلى........رؤية 2006....... / تعرف حكايه دون كيشوط / نصائح وهمية (4/ خلى بالك من عيال اليومين دول.. / عيال صايعة.. بس عندها منطق..!! / ليست شرم الشيخ وحدها.. ياريس..