حكاوي القهاوي (35)

حكاوي القهاوي (34)
 
 (163)
 دعاء اليوم
 يا رب اللي عندنا يكون عندهم شوية من اللي عند الغنوشي ويجيء علينا الصبح ونلاقي مؤتمر صحفي بيستقيلوا فيه كلهم، يا رب آمين.
 
 (164)
 ناس عندها دم
 علشان طلع للست وزيرة خارجية فرنسا علاقة بعيلة بن علي في تونس؛ الست استقالت فوراً من منصبها الوزاري. طب اللي عندنا يترموا فين وهم اللي كانوا أصحابه وفي لجنة سياساته؛ وبيهزوا للبيه وأبنه ذيلوهم كل يوم عشان ما يرضى عنهم. صحيح ناس عندها دم وناس مفيش.
 
 (165)
 الصرصار
 كان فيه طفل صغير ماشي جنبي وعدى جانبه صرصار، الطفل ملاه الرعب منه وصار له كل ما صار. طمأنته وقالت له ماتخافش؛ روح أضربه ده في الآخر مجرد صرصار. استجمع الواد قوته وضربه بجزمته ضربه راح فيها على الفور وإتقطعت جثته لمية حته وبقى في خبر كان. لاقيت الواد ملاه الرعب أكتر مما كان؛ سألته خايف ليقوم عليك ويعمل فيك اللي فيه عملته؛ هز راسه بالموافقة وقال لي آه. قلت له بص.. شوف هو خلاص أنتهى؛ حركت برجلي جثته لما وشه الهدوء عليه بان؛ راح الواد جرب قوته وشاطه برجله وهنا قال هييه الحمد لله بقى الصرصار فعلاً في خبر كان. الحكاية دي افتكرتها لما شفت مظاهرة حب مبارك وعيلته وكل كلابه وقططه. عشان كده يا جماعة تعالوا نحط الريس وعيلته في ميدان ونخللي واحد واحد من الخايفين ليرجع لهم ثاني ومنهم ينتقم، يشوط شوطة برجله عشان ما يطمنوا إن مبارك وعيلته وكلابه بقوا خلاص هو في خبر كان.
 
 (166)
 أم العيال والهجرة
 بصت أم العيال على ولادها وقالت، جبناهم الدنيا ليه ينظلموا. قوم بينا يا أبو محمد نشوف لهم هجرة على أي بلد غير دي البلد بيهم ترضى، بدل العيشة في المخروبة اللي ما فيها غير الحزن والهم والبلوى. قلت لها حرام يا ولية دول من ربنا نعمة. قالت نعمة أيوه بس إيه ذنبهم ينخلقوا في بلد عيشتها غمة. قلت لها بكره الحال يتغير؛ ردت وقالت يتغير إزاي بس يا حسرة. بكره تشوفي وأبقي افتكريني بالرحمة. بصراحة أنا قلت الرحمة وكان قصدي لما ربنا يفتكرني، عشان ما كنش عندي أمل أنه ممكن تنزاح في يوم دي الغمة. بس الله يسعد قلبهم ويخلد شهداؤهم أدونا الأمل في بكره؛ وإن بلدنا راح تكون بإذن الله أحلى بلد وأعظم أمة.
 
 (167)
 على مسئولية المدام
 بصت لي المدام وقالت عندي لك فكرة. قلت أستر يا رب هاتي؟!! ردت وعينها بتلمع ماتيجي نحل أزمة صحفنا القومية؛ ونخرجها من خيبتها القوية.قلت ما شاء الله ودي تيجي إزاي يا ذكية؟!! ردت وقالت يا راجل خليك مرة في حياتك مُبدع، فيها إيه يعني لو مسك إبراهيم عيسى رئاسة تحرير الأهرام ويعمل فيها زي ما كان في الدستور بيعمل. بصيت لها بإعجاب وقلت عفارم عليك يا مدام!!! والله فكرة ولا بألف من أفكاري!! باين عليّ لازم أتنحى وأسيبك من النهارده تقودي إنت البيت. أصل وسبع صور
 
 (168)
 هو صحيح.. صحيح في مصر عايزين تغيير
 في سنة تسعين جت لي وأنا المسكين حوالة من بره. رحت البنك فرحان أصرفها قالت لي الموظفة؛ من فضلك يا سيد روح الفرع الرئيسي وهات لي من هناك إمضاء. معقولة يا مدام عشان أصرف حوالة ألف وأدور ع البنوك عشان دي الإمضا؛ وأنا مالي هي دي شغلتي ولاّ شغلتك أنت؟!! قالت لي هو كده يا سيد إذا كان مش عاجبك روح للمدير إشكي، هو كده القانون إذا كنت بتحلم إنك للفلوس تمسك. رحت من غيظي أسأل فين المدير؟ دخلت للراجل وأشتكيت له والشكوى يا سادة لغير الله مذلّة.
 
 قام الراجل معايا مشكور وراح للست يترجى؛ يا ستي أنا لكسر الروتين جابوني؛ أرجوك خلصي الراجل وخليه يمشي. الست نفخت ونفرت وقالت طيب هات؛ وراحت ماسكة دفتر وقعدت أصل وسبع صور يا سادة للبيانات تكتب. الست ماسكة القلم وبقوة عمّالة تدوس.. تغرس؛ لأجل ما المسكينة تضمن إن الصورة السابعة فيها الكتابة تبان. وقتها فهمت من مسكة قلمها إن الجمود الفكري راح يفضل معشش جوّانا. وقتها فهمت ليه عن الروتين مش ممكن يوم نبعد. وقتها فهمت إن أقصى طموحنا إن السبع صور راح ينزلوا بعد بوس الأيادي لخمسة.
 
 افتكرت يا سادة الحكاية القديمة دي وإحنا بنتكلم النهارده عن التغيير، وسألت نفسي تغيير؟!! طب إزاي؟ وإحنا لسه زي ما احنا ما تغيرنا؟ اللي راح نسمعه بكره من الباشا ضابط الشرطة؛ إنه قررنا نحن أن نتغير وبدل ما يكون لكل مواطن خاذوق قطره تلاتة سنتي قررنا تعديل قطر الخاذوق ليكون بس إتنين سنتي، وكمان بدل ما يكون نصيب الفرد خمستاشر قفا راح يبقوا عشان خاطركم بس حداشر؛ واحمدوا يا غجر بقى ربكم، وفي هذا منتهى التغيير في تعاملنا نحن الشرطة أسيادكم وأسياد اللي جابوكم ويسرنا يا شعب أن نخدمكم. راح يكون الفساد مع التغيير قبل الركبة بشبر؛ بدل ما هو فوق الركب. يا أهل مصر..
 
 يا أهل مصر المحروسة اللي كانت في يوم مخروسة، إذا كنتم بجد عايزين تغيير؛ إذا كنّا بجد عايزين البلد حالها ينصلح، يبقى الحل إننا لازم نجيب عقل جديد. يعني نجيب وزير مدني للشرطة مايعرفش في لغة الخازوق والضرب ع القفا. ونجيب شباب بفكر جديد مالحقش بالفساد يتطبع. ونجيب قاضي يركب على نفس الصندوق من لجنة الانتخاب، وحتى في وقت نقله من اللجنة ما يخلّيه إلاّ لما فرز الأصوات ينتهي ويخلص، ونجيب حكومة مالهاش صلة ولو من بعيد بمبارك وعصبته وحزبه الواطي. ساعتها بس نضمن إن التغيير راح ينجح، وإن بلدنا من كل الوساخة أكيد راح تنضف.
                                                       ويتبع >>>>>>>>: حكاوي القهاوي (36)                                    
واقرأ أيضاً:
الحرب النفسية وغسيل الدماغ/الثورة في مصر وأبعادها النفسية/ دروس في الحرب النفسية/ كيف تخلص المصريون من الخوف من الحميمية/ حكاوي القهاوي